Ndi Ete ye Eka Mi Ẹkpemek Ido Ukpono Ẹnọ Mi?

EDIWAK owo ke Poland ẹsidọhọ Mme Ntiense Jehovah ẹte: “N̄kamamana ndụk ido ukpono mi, ndinyụn̄ n̄kpa do.” Oro ọwọrọ ke mmọ ẹda ido ukpono nte n̄kpọ ufọk. Ndi emesikop utọ ikọ emi ke edem mbufo? Emi esinam mme owo ẹnam n̄kpọ didie? Esinam owo ada ido ukpono ntre ntre, nte n̄kpọ oro onyụn̄ anade ẹka m̀mê nte ikpîkpu ido eset oro anade ubon ẹtiene. Ndi emi ekeme nditịbe nnọ nditọ Mme Ntiense Jehovah oro mme ete ye eka m̀mê mme ete ete ye eka eka ẹkekpepde mmọ akpanikọ?

Ikedịghe ntem ye Timothy, emi eka ye eka eka esie oro ẹkedide ata mme asan̄autom Abasi ẹkekpepde enye ndinịm ata Abasi ke akpanikọ nnyụn̄ mma enye. Timothy ama ọfiọk N̄wed Abasi “toto ke nsek.” Nte ini akakade, enye ama edikụt ke Ido Ukpono Christ oro eka ye eka eka esie ẹkedụkde ekedi ido ukpono akpanikọ. ‘Ẹkekpekpek enye enịm’ se N̄wed Abasi etịn̄de aban̄a Jesus Christ. (2 Tim. 1:5; 3:14, 15) Ntem, okposụkedi emi mme ete ye eka emi ẹdide Christian mfịn ẹsisịnde ofụri ukeme ẹn̄wam nditọ mmọ ẹkabade ẹdi mme asan̄autom Jehovah, oyom nditọ emi ẹbiere ke idemmọ ndinam n̄kpọ Jehovah.—Mark 8:34.

Edieke oyomde eyen fo anam n̄kpọ Jehovah ke imaesịt onyụn̄ aka iso ọsọn̄ọ ada ke idaha ekededi, ana owụt enye eti ntak oro edinamde enye enịm ke se ekpepde imọ edi akpanikọ. Emi ayanam enye enen̄ede ọsọn̄ọ ada ọbuọt idem ye Abasi.—Eph. 3:17; Col. 2:6, 7.

Se Nditọ Ẹkpenamde

Albert * emi ete ye eka esie ẹkedide Mme Ntiense ọdọhọ ete: “Mma mfiọk ke Mme Ntiense Jehovah ẹkpep akpanikọ, edi n̄kekemeke ndidu uwem nte mmọ ẹkedọhọde.” Ekeme nditie fi ntre n̄ko edieke edide uyen. Ntak mûsịnke idem ukpep nte Abasi oyomde idu uwem man enem fi ndinam se enye amade? (Ps. 40:8) Albert afiak ọdọhọ ete: “Mma ntọn̄ọ ndibọn̄ akam, edi ikememke utom inọ mi ke nsonso oro. N̄kenyene ndisịn ọkpọsọn̄ ukeme man n̄keme ndibọn̄ akam. Edi ikebịghike, mma ndifiọk ke Abasi ekeme ndida mi nte edima eyen esie edieke ndomode ndinam se inende. Emi ama anam mi ntọn̄ọ ndinam ukpụhọde.” Edieke anamde ufan ye Jehovah, edikam inenem fi ndinam se enye ọdọhọde.—Ps. 25:14; Jas. 4:8.

Kere ban̄a mbre emi esimade, yak idọhọ  nsa obukpọk, nsa isọn̄, kad, m̀mê n̄kpọ ntre. Mbre oro idinemke fi edieke mûdiọn̄ọke nte ẹsibrede. Edi edieke ekpepde nte ẹsibrede onyụn̄ ọdiọn̄ọde ndibre enye ọfọn, ọyọdọn̄ fi ndisibre enye ndien ndien, amakam ekeme ndisio ini nnịm mbre enye. Ntre ke edi ye ndutịm esop Abasi. Da ini tịm idem nọ mme mbono esop. Tiene buana ke mme edinam emi. Inamke n̄kpọ m̀mê edi isua ifan̄, nti uwụtn̄kpọ fo ekeme ndisịn udọn̄ nnọ mbon en̄wen.—Heb. 10:24, 25.

Ntre n̄ko ke edi ye nditịn̄ se enịmde ke akpanikọ nnọ mbon en̄wen. Akpanam emi ke imaesịt, idịghe ke edinyenyịk. Bụp idemfo ete: ‘Ntak emi n̄kpanamde mme owo ẹdiọn̄ọ Jehovah? Ntak emi n̄kpamade enye?’ Oyom ada Jehovah nte edima Ete fo. Enye ọkọdọhọ Jeremiah ọdọhọ ete: “Ndien mbufo ẹyeyom mi, ẹnyụn̄ ẹkụt mi, koro mbufo ẹdibịnede mi ke ofụri esịt mbufo.” (Jer. 29:13, 14) Nso ke emi oyom oto fi? Jakub ọdọhọ ete: “Akana ntre ndikere n̄kpọ nte n̄kesikerede. N̄kọtọn̄ọ ke uyen ndụk mbono esop nnyụn̄ n̄wọrọ an̄wautom, edi n̄kesidaha emi nte akpan n̄kpọ. Mma ntọn̄ọ ndinen̄ede nsịn idem ke akpanikọ ke mma n̄kedi ndifiọk orụk owo emi Jehovah edide, nnyụn̄ nsan̄a n̄kpere enye.”

Eti nsan̄a ekeme ndinam enen̄ede okop inem ukwọrọikọ. N̄ke oro ẹkedade odudu spirit Abasi ẹwet ọdọhọ ẹte: “Owo eke asan̄ade ye mme enyene-ibuot eyenyene ibuot.” (N̄ke 13:20) Ntre, nam ufan ye mbon oro ẹnyenede mme utịtmbuba eke spirit ẹnyụn̄ ẹmade ndinam utom Jehovah. Jola ọdọhọ ete: “Ndidụk nsan̄a ye mme uyen oro ẹsịnde idem ẹnam n̄kpọ Abasi ama enen̄ede an̄wam mi. Mma ntọn̄ọ ndika ukwọrọikọ ndien ndien ye akwa idatesịt.”

Se Ete ye Eka Ẹkpenamde

Jola afiak ọdọhọ ete: “Mmọkọm ete ye eka mi ke ndikekpep mi n̄kpọ mban̄a Jehovah.” Ih, mme ete ye eka ẹkeme ndinam nditọ ẹnam eti ubiere. Apostle Paul ekewet ete: “Mbufo, mme ete, . . . ẹka iso ẹkama [nditọ mbufo] ke ntụnọ ye ke usụn̄ ukere n̄kpọ Jehovah.” (Eph. 6:4) Item Abasi emi enen̄ede owụt ke mme ete ye eka ẹkpenyene ndikpep nditọ mmọ se Jehovah amade, idịghe se mmọ ẹmade. Ọkpọfọn didie ntem edieke mbufo ẹkpen̄wamde nditọ mbufo ẹbiere ndinam se Jehovah oyomde, utu ke ndidọhọ mmọ ẹnam se mbufo ẹmade!

Ẹmekeme ndidọdiọn̄ nsiak ikọ Jehovah nnọ nditọ mbufo ẹnyụn̄ ‘ẹkama enye ke inua mbufo ke ini ẹtiede ke ufọk, ye ke ini ẹsan̄ade ke usụn̄, ke ini ẹnade ke isọn̄, ye ke ini ẹdahade ke enyọn̄.’ (Deut. 6:6, 7) Ewa ye Ryszard, ete ye eka oro ẹnyenede nditọiren ita ẹdọhọ ẹte: “Nnyịn ima isiwak nditịn̄ mban̄a nsio nsio ikpehe utom uyọhọ ini.” Nso ikedi utịp? Mmọ ẹdọhọ ete: “Nditọ nnyịn ẹma ẹsịn enyịn̄ ke Ufọkn̄wed Utom Ukara Abasi ke ini mmọ  ẹkedide ata n̄kpri, ẹdi mme asuanetop, ndien ekem ẹbiere ke idemmọ ndina baptism. Nte ini akade, mmọ ẹma ẹdụk utom uyọhọ ini.”

Eti uwụtn̄kpọ ete ye eka esinen̄ede an̄wam nditọ. Ryszard ọdọhọ ete, “Nnyịn ima ibiere ke nnyịn ididụhe uwem esịt iba, oro edi, ndidi nti owo ke Ufọkmbono Obio Ubọn̄, edi ima isịm ufọk, nnyịn iforo n̄kpọ en̄wen.” Ke ntre, bụp idemfo ete: ‘Nditọ mi ẹda mi nte nso utọ owo? Ndi mmọ ẹkeme ndidọhọ ke mmenen̄ede mma Jehovah? Ndi akam ye ukpepn̄kpọ idemmi owụt mmọ ke mmenen̄ede mma Jehovah? Ndi nte nsikade ukwọrọikọ, ini oro nsidade nnọ idem inemesịt, m̀mê nsidade nnam mme n̄kpọ obụkidem eken ye se nsitịn̄de mban̄a nditọete ke esop anam mmọ ẹfiọk ke mmenen̄ede mma Jehovah?’ (Luke 6:40) Nditọ fo ke ẹse nte odude uwem kpukpru usen man ẹkụt m̀mê emesinam se etịn̄de.

Ẹnen̄ede ọfọn ẹkama nditọ ke ntụnọ. Ikọ Abasi ọdọhọ nnyịn ‘itịm iteme eyenọwọn̄ nte ekemde ye usụn̄ esie.’ (N̄ke 22:6) Ewa ye Ryszard ẹfiak ẹdọhọ ẹte, “Nnyịn ima isisio ini inịm ikpep Bible ye nditọ nnyịn kiet kiet.” Ete ye eka ẹnyene ndibiere m̀mê akpana ibon nditọ mmimọ nsio nsio ikpep n̄kpọ. Se ededi oro ẹbierede ndinam, akpana ẹfiọk ke mmọ idịghe ukem ukem. Emi oyom ẹnyene mbufiọk, ẹsinyụn̄ ẹnam ukpụhọde mi ye ko. Ke uwụtn̄kpọ, utu ke ndisidọhọ nditọ mbufo ke ikwọ emi m̀mê oko ifọnke, ntak mûwụtke mmọ nte ẹkpenamde nti ubiere ye mme edumbet Bible emi ẹkemede ndin̄wam mmọ?

Nditọ mbufo ẹkeme nditịm mfiọk se mbufo ẹyomde mmọ ẹnam, onyụn̄ ekeme nditie nte ke mmọ ke ẹnam se mbufo ẹyomde. Edi ọfọn ẹdiọn̄ọ se idude mmọ ke esịt. Ẹti ẹte ke “uduak ke esịt owo edi udem; edi owo mbufiọk oyokot enye osio.” (N̄ke 20:5) Ẹnam n̄kpọ ye mbufiọk, ẹse m̀mê enyene n̄kpọ ndomokiet oro afịnade nditọ mbufo ẹnyụn̄ ẹnam n̄kpọ ẹban̄a oro usọp usọp. Ẹkûdori mmọ ikọ, ẹwụt ke ẹmekere ẹban̄a mmọ ẹnyụn̄ ẹbụp nti mbụme. Edi ẹkûwot mmọ ye mbụme. Mmọ ẹma ẹkokụt ke ẹmenen̄ede ẹkere ẹban̄a mmimọ, emi ayanam ẹkeme ndin̄wam mmọ.

 Se Esop Ẹkpenamde

Edieke edide asan̄autom Jehovah, ndi emekeme ndin̄wam mme uyen ke esop ẹda akpanikọ oro mme ete ye eka ẹkpepde mmọ ke akpan n̄kpọ? Okposụkedi emi edide mbiomo mme ete ye eka ndibọk nditọ mmọ, mbon eken ke esop, akpan akpan mbiowo, ẹkeme ndin̄wam n̄ko. Enen̄ede oyom ẹn̄wam mbon oro ete m̀mê eka kpọt edide Ntiense.

Nso ke mbiowo ẹkpenam man ẹn̄wam mme uyen ẹma Jehovah, ẹnyụn̄ ẹfiọk ke ẹma mmimọ, ke ẹnyụn̄ ẹda mmimọ ke n̄kpọ? Mariusz emi edide ebiowo ke esop kiet ke Poland ọdọhọ ete: “Akpana mbiowo ẹsineme nneme ye mme uyen kpukpru ini. Idịghe ke ini oro mmọ ẹnyenede mfịna kpọt, edi n̄ko ke mme ini en̄wen, utọ nte ke an̄wautom, ke mbono esop asuanade, m̀mê ke ini ẹnyụn̄ ẹtiede ẹbọ ofụm.” Ntak mûbụpke mmọ nte mmọ ẹdade esop Abasi? Utọ in̄wan̄-in̄wan̄ nneme emi ayanam mme uyen ẹkop inem esop ẹnyụn̄ ẹtiene ẹnam se ẹnamde ke esop.

Edieke edide ebiowo, ndi emenen̄ede ọdiọn̄ọ mme uyen oro ẹdude ke esop mbufo? Okposụkedi emi Albert emi iketịn̄de iban̄a edide ebiowo idahaemi, enye ama enyene nsio nsio mfịna ke ini uyen. Enye ọdọhọ ete, “Ke ini n̄kedide uyen, mma nsiyom mbiowo ẹtiene ẹdi ẹdise mi.” Mbiowo ẹkeme n̄ko ndiwụt ke imenen̄ede ikere iban̄a mme uyen ke ndisibọn̄ akam mben̄e Abasi anam mmọ ẹsọn̄ idem ke esop.—2 Tim. 1:3.

Ọfọn mme uyen ẹsitiene ẹnam se ẹnamde ke esop. Mîdịghe ntre, mmọ ẹkeme nditiene nnam se ẹnamde ke ererimbot. Ndi mbufo emi ẹdide n̄kani owo ẹmesisan̄a ye mmọ ke an̄wautom ẹnyụn̄ ẹnam ufan ye mmọ? Ẹtie ye mmọ ẹduọk odudu, ẹnyụn̄ ẹwụt ke idi ufan oro ẹkemede ndiberi edem. Jola ọdọhọ ete: “Eyenete an̄wan emi edide asiakusụn̄ ama enen̄ede ama mi. Akpa ini emi n̄kakade ukwọrọikọ ke imaesịt mi ekedi usen emi n̄kasan̄ade ye enye n̄ka ukwọrọikọ.”

Afo Enyene Ndibiere

Mme uyen, ẹbụp idem mbufo ẹte: ‘Nso idi mme utịtmbuba mi? Edieke edide nnaha kan̄a baptism, ndi mmanam oro edi utịtmbuba mi?’ Ima oro amade Jehovah akpanam ana baptism, idịghe sia kpukpru owo ke ufọk mbufo ẹna.

Ih, yak Jehovah edi ata Ufan fo, akpanikọ onyụn̄ edi n̄kpọuto fo. Jehovah akada prọfet Isaiah etịn̄ ete: “Kûnyek idem, koro ami ndide Abasi fo.” Jehovah oyodu ye afo adan̄a nte akade iso edi ufan esie. Enye ọyọsọn̄ọ fi idem, idinyụn̄ ‘itreke ndimụm fi n̄kama ke edinen ubọk nnasia esie.’—Isa. 41:10.

[Ikọ Idakisọn̄]

[Ndise ke page 4]

Domo ndifiọk se idude eyen fo ke esịt

[Ndise ke page 6]

Ima emi owo amade Jehovah esinam enye ebiere ndina baptism