Owo Inyene Emi Edide Andikara Anam Idiọk Ubiere

AKPARAWA emi ekedide owo inyene ye andikara ekedi eti owo, enịm ibet, onyụn̄ ama n̄kpọ Abasi. Enye ama ọkọtọn̄ọ edọn̄ ke iso Jesus onyụn̄ obụp ete: “Eti Andikpep, ndinam nso man nnyene nsinsi uwem?”—Mark 10:17.

Jesus ama ọbọrọ ke ama oyom ọbọn̄ oro enịm ewụhọ Abasi man enyene uwem. Ke ini ọbọn̄ oro ọkọdọhọde Jesus etịn̄ m̀mê ibet ewe, Jesus ama ọdọhọ ete: “Kûwot owo, Kûsịn efịbe, Kûyịp inọ, Kûtie ntiense nsu, Kpono usọ ye uka, nyụn̄ ma mbọhọidụn̄ fo nte idemfo.” Mmọ emi ẹkedi akpan ewụhọ oro ẹkesịnede ke Ibet oro ẹkenọde Moses. Ọbọn̄ oro ama ọdọhọ ete: “Mma nnenịm kpukpru emi; nso isụhọ aba ndinam?”—Matthew 19:16-20.

Jesus ama “ama enye,” onyụn̄ ọdọhọ ete: “N̄kpọ kiet osụhọ fi ndinam: Ka, kanyam se ededi oro afo enyenede nyụn̄ yak nọ mme ubuene, ndien afo eyenyene n̄kpọuto ke heaven, nyụn̄ ditiene mi.”—Mark 10:18-21.

Ọbọn̄ emi ama edikụt ke oyom imọ inam ata akamba ubiere oro imọ mîkekereke-kere. Didie ke enye edinam emi? Nte enye eyenyịme ndikpọn̄ inyene esie nnyụn̄ ntiene Jesus, m̀mê ọyọsọn̄ọ eyịre ke inyene esie? Ndi enye ediyom n̄kpọuto ke isọn̄, m̀mê ediyom n̄kpọuto ke heaven? Anaedi ama ọsọn̄ enye ndifiọk m̀mê ewe ke ikpemek. Enye ama enen̄ede ama n̄kpọ eke spirit, koro enye ama enịm Ibet onyụn̄ oyom ndifiọk n̄kpọ en̄wen oro imọ ikpanamde man inyene mfọn Abasi. Nso ikedi ubiere esie? Enye ama “ọnyọn̄ ke mfụhọ, koro enye enyenede ediwak inyene.”—Mark 10:22.

Akparawa oro ekedide andikara do ikanamke eti ubiere. Edieke enye ekpekedide mbet Jesus onyụn̄ ọsọn̄ọ ada, enye ọkpọkọbọ se enye okoyomde—oro edi, nsinsi uwem. Owo itịn̄ke se iketịbede inọ akparawa oro. Nte ededi, imọfiọk ke n̄kpọ nte isua 40 ẹma ẹkebe, mbonekọn̄ Rome ẹma  ẹsobo Jerusalem ye ata akamba ikpehe Judea. Ata ediwak mme Jew ẹma ẹtaba inyene ye uwem mmọ.

Apostle Peter ye mme mbet eken ẹma ẹmek se ifọnde; mmọ iketiehe nte akparawa oro ekedide andikara. Mmọ ẹma ‘ẹkpọn̄ kpukpru n̄kpọ’ ẹnyụn̄ ẹtiene Jesus. Ubiere oro ọkọfọn ye mmọ didie ntem! Jesus ama ọdọhọ mmọ ke mmọ ẹyebọ se iwakde ikan se ededi oro mmọ ẹkekpọn̄de. Akan oro, mmọ ẹyenyene nsinsi uwem. Mmọ ikatuaha n̄kpọfiọk nte ini akakade ke ubiere oro mmọ ẹkenamde.—Matthew 19:27-29.

Kpukpru nnyịn imenyene ubiere ndinam—ndusụk n̄kpri, ndusụk ikpọ. Nso item ke Jesus ọkọnọ aban̄a mme utọ ubiere oro? Nte afo ayanam item esie? Edieke emekde ndinam oro, eyenen̄ede ọbọ edidiọn̄. Ẹyak ineme idahaemi nte ikemede nditiene Jesus nnyụn̄ mbọ ufọn item oro enye ọkọnọde.