Mme Mbụme Ẹtode Mme Andikot

Ke akam uwụtn̄kpọ esie, ndi ikọ Jesus okowụt ke ẹma ẹnam uduak Abasi ke heaven kpa ye oro owo mîkosion̄oke ndiọi angel kan̄a iduọn̄ọ?

Nte ẹwetde ke Matthew 6:10, Jesus ọkọdọhọ ete: “Yak inam uduak Fo; nte ẹnamde ke heaven, yak inam ke isọn̄ kpasụk ntre.” Ẹkeme ndida akam emi ke usụn̄ iba. Akpa, ndiben̄e nte yak ẹnam uduak Abasi ke isọn̄ ukem nte ẹma ẹkenanam ke heaven m̀mê, ọyọhọ iba, ndiben̄e nte yak ẹnam uduak Abasi ọyọhọ ọyọhọ ke heaven ye ke isọn̄. * Se Jesus ekebemde iso etịn̄ ete, “Yak Ubọn̄ Fo edi,” owụt ke ọyọhọ ekikere iba oro enen̄ede odu ke n̄kemuyo ye N̄wed Abasi. Enye onyụn̄ owụt nte n̄kpọ eketiede ke heaven ke ini Jesus okodude ke isọn̄ ye anyan ini ke oro ebede. Didie ke oro edi ntre?

N̄wed Ediyarade owụt n̄wọrọnda n̄kpọ iba oro ẹketịbede ke ini ẹkewụkde Obio Ubọn̄ Abasi ke heaven. Akpa n̄kpọ emi eketịbede ekenyene n̄kpọ ndinam ye heaven, udiana enyene n̄kpọ ndinam ye isọn̄. Ediyarade 12:7-9, 12 ọdọhọ ete: “Ekem [ekọn̄] etịbe ke heaven; Michael ye mme angel esie ẹn̄wana ekọn̄ ye dragon; dragon ye mme angel esie ẹnyụn̄ ẹn̄wana ekọn̄ edi mmọ ikanke. Ufan̄ inyụn̄ idụhe aba inọ mmọ ke heaven. Ndien ẹsio akwa dragon ẹduọk ke isọn̄, kpa akani urụkikọt oro ẹkotde enye ẹte, andidori ikọt Abasi ikọ ye Satan, andibian̄a ofụri ererimbot; ẹsio enye ẹduọk ke isọn̄, ẹnyụn̄ ẹsion̄o mme angel esie ẹduọn̄ọ ye enye. Ntre ẹdara, O mme heaven, ye mbufo emi ẹdụn̄ọde ke esịt. Mbọm isọn̄ ye inyan̄, koro andidori ikọt Abasi ikọ ama osụhọde etiene mbufo; enye asan̄a ye akwa ifụtesịt, sia enye ọdiọn̄ọde ete ini imọ edi ibio.”

Edision̄o Satan ye mme demon esie ke heaven nduọn̄ọ ke isọn̄ ke 1914 ama ekebe ama anam heaven ọbọhọ kpukpru mme ọsọn̄ibuot angel, ndien emi ama enen̄ede ada idatesịt ọsọk mme anam-akpanikọ angel Jehovah, oro ẹdide n̄wakn̄kan ke otu mme edibotn̄kpọ esie eke spirit. (Job 1:6-12; 2:1-7; Ediyarade 12:10) Ntem, se Jesus ekeben̄ede ke akam uwụtn̄kpọ esie ama osu ke heaven. Kpukpru mbon oro ẹkedude ke heaven ini oro ẹkedi mbon oro ẹnamde akpanikọ ẹnọ Jehovah ẹnyụn̄ ẹnen̄erede ẹsụk ibuot ẹnọ itie edikara esie.

Odot ẹtịm ẹfiọk ẹte ke idem mbemiso oro, ke ini ndiọi angel emi ẹkesisụk ẹkemede ndibe ndụk heaven, ẹma ẹsosion̄o mmọ ẹfep ke ubon Abasi ẹnyụn̄ ẹdori mmọ ukpan. Ke uwụtn̄kpọ, Jude 6 owụt nte ke akpa isua ikie, ke ẹma ‘ẹkekọbi mmọ ke nsinsi ebuka ẹnịm ke ekịm eke spirit, ẹte ẹtie ẹbet ikpe Akwa Usen oro.’ Kpasụk ntre, 2 Peter 2:4 ọdọhọ ete: ‘Abasi ikayakke mme angel emi ẹkeduede ẹbọhọ, edi otop mmọ ọduọk ke [“Tartarus,” NW; ata usụhọde idaha], onyụn̄ esịn mmọ ke n̄kịmn̄kịm ukpe eke spirit, ete, ẹnịm mmọ ẹtie do ẹbet ikpe.’ *

Ke edide ata isio ye idaha ukpan oro mmọ ẹkedude  ke heaven, ndiọi angel emi ẹnen̄ede ẹnyene odudu ke isọn̄. Ke akpanikọ, Ikọ Abasi okot Satan “ọbọn̄ ererimbot emi,” onyụn̄ okot mme demon “mme andikara ekịm ererimbot” emi. (John 12:31; Ephesus 6:11, 12; 1 John 5:19) Ke ntak odudu esie, Devil ama ekeme ndinọ Jesus “kpukpru mme obio ererimbot ye ubọn̄ mmọ” man enye atuak ibuot ọnọ imọ. (Matthew 4:8, 9) Amaedi isọn̄, ana in̄wan̄-in̄wan̄ nte ke Obio Ubọn̄ Abasi ndidi ayada ikpọ ukpụhọde edi.

Mi ke isọn̄, ‘edidi’ Obio Ubọn̄ Abasi ediwọrọ ata obufa editịm n̄kpọ. Obio Ubọn̄ emi ayanuak kpukpru ukara owo onyụn̄ edi n̄kukụre ukara oro akarade ofụri isọn̄. Ke ukem ini oro, mme abak-Abasi oro ẹdude ke idak Obio Ubọn̄ emi ẹdinam “obufa isọn̄.” (2 Peter 3:13; Daniel 2:44) Obio Ubọn̄ emi n̄ko ayanam okopitem ubonowo ọbọhọ idiọkn̄kpọ ndien nte ini akade, enye ayanam ofụri isọn̄ akabade edi paradise, ke ntre, ọsọhide kpukpru ukara Satan efep.—Rome 8:20, 21; Ediyarade 19:17-21.

Ke utịt Tọsịn Isua emi Obio Ubọn̄ Messiah edikụrede se Abasi okoyomde enye anam, “Eyen ke Idem Esie [oyosụk idem] ọnọ Enye emi akadade kpukpru n̄kpọ adak Enye ke ikpat; man ke usụn̄ ekededi Abasi ekpedi kpukpru n̄kpọ.” (1 Corinth 15:28) Ekem akpatre udomo oyodu, ndien ke oro ebede, ẹyesobo Satan ye mme demon esie ọkọrọ ye ọsọn̄ibuot owo ekededi oro mmọ ẹbian̄ade ẹfep ke se ẹkotde “udiana n̄kpa.” (Ediyarade 20:7-15) Ndien, kpukpru mme enyene-ifiọk edibotn̄kpọ ke heaven ye ke isọn̄ ẹyesụk ibuot idara idara ẹnọ ima ima itie edikara Jehovah. Ke kpukpru usụn̄, ini oro ke akam uwụtn̄kpọ Jesus edisu ọyọhọ ọyọhọ.—1 John 4:8.

[Mme Ikọ idakisọn̄]