Kere ban̄a se itienede emi man ese m̀mê nso ke afo esida ebiere m̀mê owo edi n̄kpọ.

Anie ke ọkpọdọhọ ke enye enen̄ede edi n̄kpọ?

• ASUKWO

  Asukwo enyene mbubehe idemesie. Enye enen̄ede enyene ido, esisịn idem anam utom, esinyụn̄ etịn̄ akpanikọ. Enye ye ubon esie ẹnyene se ẹdiade ẹnyụn̄ ẹkop inem uwem.

• OKON

  Okon enyene ukem mbubehe emi Asukwo enyenede, edi enye enyene okụk akan Asukwo. Ndien sia enye oyomde ndidi ata imọ owo, enye esinam utom okoneyo ye uwemeyo onyụn̄ ọdọn̄ọ nsio nsio udọn̄ọ.

• ATIM

  Atim edi eyen ufọkn̄wed. Enye esisịn idem okot n̄wed onyụn̄ ebe n̄wed.

• NKOYO

  Nkoyo esibe n̄wed akan Atim, enyịn̄ esie onyụn̄ esịne ke otu mbon emi ẹdiọn̄ọde n̄wed etieti. Edi enye esiyeyịp udomo inyụn̄ isịnke idem ikot n̄wed.

Edieke ọdọhọde ke Okon ye Nkoyo—m̀mê mmọ mbinan̄—ẹdi n̄kpọ, ọwọrọ ekeme ndidi afo esida se owo enyenede ebiere m̀mê owo edi n̄kpọ, ukereke m̀mê enye akasan̄a didie enyene se enye enyenede oro.

Edi edieke ọdọhọde ke Asukwo ye Atim kpọt ẹdi n̄kpọ, ọwọrọ ekeme ndidi esida nte owo odude uwem ebiere m̀mê enye edi n̄kpọ. Ọfọn ndinam ntre. Kere ise:

• Ewe edifọn ye Atim ikan ke ini iso—enye ndibe udomo m̀mê ndisịn idem n̄kot n̄wed?

• Ewe ọfọn ye nditọ Asukwo akan—mmọ ndinyene se mmọ ẹyoyom m̀mê ndinyene ete emi amade ndisidu ye mmọ?

Se anade eti: Ndida se owo enyenede mbiere m̀mê enye edi n̄kpọ edi ndibian̄a idem. Se ẹkpedade ẹbiere m̀mê owo edi n̄kpọ edi nte enye odude uwem.