ENYENE ndusụk mbon emi ẹdụn̄de ke efak ke Canada ke ntak emi mmọ mînyeneke ufọk. Ntiense Jehovah kiet emi ekerede Don esinam se enye ekekeme man ọkwọrọ ikọ ọnọ mmọ. Don ọdọhọ ntem aban̄a owo mmọ kiet: “Ke otu mbon oro ẹdụn̄de ke efak, akanam n̄kwe owo emi edehede idem nte Peter. Enye ama esisọn̄ ido ikesinyụn̄ imaha ndikpere owo idem. Enye ikesinyịmeke kpukpru un̄wam oro mme owo ẹkedomode ndin̄wam enye.” Kpa ye oro, Don ama enyene ime anam se enye ekekeme man an̄wam Peter. Enye ama anam oro ebe isua 14.

Usen kiet Peter ama obụp Don ete: “Ntak emi afo eyịrede ndin̄wam mi? Kpukpru owo ẹsion̄o idem ẹkpọn̄ mi. Ntak emi mûsion̄oke idem ukpọn̄ mi?” Don ama ada mbufiọk eneme itie N̄wed Abasi ita oro okodụkde Peter esịt. Akpa, enye ama obụp Peter m̀mê enye ọfiọk enyịn̄ Abasi, onyụn̄ okụbọde Psalm 83:18 ọnọ enye ete okot. Ekem Don ama ọdọhọ Peter okot Rome 10:13, 14 man okụt ntak emi imọ mîsion̄oke idem ikpọn̄ enye. Itien̄wed oro ọdọhọ ke “ẹyenyan̄a kpukpru owo eke ẹsemede ẹkot enyịn̄ Jehovah.” Ke akpatre, Don ama okot Matthew 9:36 onyụn̄ ọdọhọ Peter afiak okot itien̄wed oro ke idemesie. Itien̄wed oro ọdọhọ ete: “Ke ini [Jesus] okụtde otuowo mbọm mmọ anam enye, koro ẹfiomode ẹnyụn̄ ẹsuande mmọ nte erọn̄ eke mînyeneke andikpeme.” Mmọn̄eyet ama asiaha Peter ke enyịn, enye onyụn̄ obụp Don ete: “Ndi mmetiene nsịne ke otu erọn̄ emi?”

Peter ama ọtọn̄ọ ndikpụhọde. Enye ama ọtọn̄ọ ndisana idem, afat ntan̄ebek esie ediye ediye, onyụn̄ esịne ndiye ọfọn̄ oro Don ọkọnọde enye. Peter ama aka iso ndikama idem eye.

Peter ama enyene n̄wed emi enye ekesiwetde se itịbede kpukpru usen. Ke ntọn̄ọ ntọn̄ọ n̄wed oro, enye ama ewet aban̄a uwem ufen oro enye ekesidude. Edi se enye ekewetde ke enye ama ọkọdiọn̄ọ Don ama  okpụhọde. Ke uwụtn̄kpọ, enye ekewet ete: “Mfịn ke mfiọk enyịn̄ Abasi. Idahaemi, nsibọn̄ akam nnọ Jehovah. Enem mi ndifiọk enyịn̄ Abasi. Don ọdọhọ ke Jehovah ekeme ndidi ata ufan mi onyụn̄ akpan̄ utọn̄ okop se ededi oro ntịn̄de nnọ enye, inamke n̄kpọ m̀mê ini ewe ke ntịn̄.”

Peter ekewet akpatre n̄kpọ ke n̄wed esie ọnọ nditọeka esie. Enye ekewet ete:

“N̄kopke inem idem mfịn. Etie nte usọn̄ anam oro! Ọkpọkọm n̄kpakpa mfịn, mmọfiọk ke nyafiak n̄kụt ufan mi [Don] ke Paradise. Ekeme ndidi nyebet efere ini mbufo ẹdikotde n̄kpọ emi. Edi edieke mbufo ẹkụtde owo emi mîkpanaha odu ke itie n̄kpa mi, ẹkûbịn enye, edi ẹneme nneme ye enye. Mbọk ẹkot ekpri blublu n̄wed emi. * N̄wed emi ọdọhọ ke nyafiak n̄kụt ufan mi ke Paradise. Mmenịm emi ke akpanikọ. Ami edima eyeneka mbufo, Peter.”

Ke ẹma ẹkebụk Peter, Ummi eyeneka esie an̄wan ọkọdọhọ ete: “Peter ama edise mi ke n̄kpọ nte isua iba emi ẹkebede. Ebịghi etieti n̄kokụt enye enemde esịt ntem. Enye ama akam atuak inua imam.” Ummi ama ọdọhọ Don ete: “Nyokot n̄wed oro, sia n̄wed oro anamde eyeneka mi okpụhọde ntem edi ata eti n̄wed.” Ummi ama onyụn̄ enyịme Ntiense Jehovah edikpep imọ n̄wed Nso ke Bible Enen̄ede Ekpep?

Ọfọn nnyịn n̄ko ikûse nte owo etiede, edi iwụt ke imama inyụn̄ inyene ime ye kpukpru orụk owo. (1 Tim. 2:3, 4) Edieke inamde emi, imekeme ndin̄wam mbon oro ẹtiede nte Peter edi emi enyenede eti esịt. Imenịm ke ‘Jehovah emi esede esịt’ ayanam akpanikọ Bible odụk esịt mbon oro ẹmade enye.​—1 Sam. 16:7; John 6:44.