Ima ikot Bible, imekeme ndida nsio nsio n̄kpọ nnam ndụn̄ọde man se ikotde etetịm an̄wan̄a nnyịn. Kpa ye oro, idịghe nte inen̄erede iyom ndidiọn̄ọ se idude ke Bible edi n̄kukụre ntak emi isikpepde n̄kpọ. Iyom ndikpep n̄kpọ mban̄a nti edu Jehovah man itetịm ima enye. Man inam emi, imekeme ndibụp idem nnyịn, ‘Nso ke itie Bible emi ekpep mi aban̄a Jehovah?’

Imekeme ndiyom mme n̄kpọ emi ẹnen̄erede ẹwụt nte Jehovah amade mme owo, enyenede ọniọn̄, esibierede n̄kpọ enye enen, onyụn̄ enyenede odudu. Nti edu Jehovah ikụreke do. Edi edikụt m̀mọ̀n̄ itie emi ẹtịn̄de n̄kpọ efen ẹban̄a mme edu esie?

Ama ese Watch Tower Publications Index, oyokụt se ibede mme edu Jehovah 50 en̄wen. Ka ibuotikọ emi “Jehovah,” ekem se ekpri ibuotikọ emi “Qualities by Name.” Yom mme edu Jehovah emi ẹdụkde ye mbụk Bible emi osụk okotde. (Ekpedi N̄wed Ndụn̄ọde Mme Ntiense Jehovah kpọt ke enyene, ka ibuotikọ emi “Jehovah Abasi,” ekem se ekpri ibuotikọ emi “Mme Edu Jehovah.”)