Daizeze Bedʼeaba jarabʉta

 Daizeze Bedʼeabara bʉra kʼarebaseabʉ. Bibliara Daizezede baera adewara Daizezebara kʼareba diabʉ ẽbẽrarã sopuabʉrarã (2 Corintios 7:6). Daizeze Bedʼeara medicoraba libro estudiabʉ kĩrãka bʉ e mina mejãchade kʼareba zebʉrʉ ẽbẽrarãta ãyikʉza beida e marẽã. Bibliabara bʉsida kʼarebaseabʉ bedʼea biata abʉ baera.

•  ¿Kʼãrẽ ũragʼa biata diabʉ Daizeze Bedʼeabara?

•  ¿Daizeze Bedʼeadera eda jarabʉka ẽbẽrarã ãyikʉza bei kĩrãbada ʉ̃rʉ?

•  ¿Kʼãrẽ testoba kʼarebaseabʉ bʉyikʉza bei ẽ baita?

•  ¿Kʼãrẽta odaibara dayi neũdukʼawuaba jarara wua ba ma bʉta?

•  ¿Mʉyikʉza bera beisibʉrʉ kʼãrẽta oibara maʉ̃ ʉ̃rʉra?

 ¿Kʼãrẽ ũragʼa biata diabʉ Daizeze Bedʼeabara?

• ● Bʉ sãwũã sentibʉ ʉ̃rʉ bedʼeara.

   Daizeze Bedʼeaba jarabʉta: «Neũdukʼawuarabara ewari jõmaʉ̃nẽ kãgabʉ akʉza bedʼea zroma zebʉrʉde mebẽãʼara kĩrãkʼabʉ» (Proverbios 17:17).

   ¿Kʼãrẽta jarakĩrãbʉ maʉ̃bara?: Dayi bedʼea zroma erbʉdera kʼarebata nesidabʉ wãrĩnu.

   Mamina bʉa jara ẽ bʉrʉ bʉ sãwũã sentibʉta audre zuburiayi mawũãra mamina bʉa jarara bʉ sãwũã sentibʉta bʉ neũdukʼawuaraʼa mawũãra maʉ̃bara kʼarebayi aʉkara krĩcha zroma o ẽ baita. Akʉza kʼawuayi sãwũã bia krĩchaita bʉ bedʼea zroma ara oita.

   Mesera kʼareba jʉrʉra: Kʼareba widira bʉ mebẽrãʼa mawũã ẽ bʉrʉ bʉ neũdukʼawuaraʼa. a Mamina bʉa jara be ẽ bʉrʉ bʉ sãwũã sentibʉta bʉseabʉ maʉ̃ ʉ̃rʉ.

• ● Medico maʉ̃ ʉ̃rʉ bia kʼawuabʉ kʼarebata jʉrʉra.

   Daizeze Bedʼeaba jarabʉta: «Yi neneẽãpanʉrabara medikoeda wãira nesida ẽ, mamina yi kayapanʉrãra medikoeda wãibara» (Mateo 9:12).

   ¿Kʼãrẽta jarakĩrãbʉ maʉ̃bara?: Dayirã kayabʉdera jʉrʉibara medico kʼarebata.

   Bari jaraita, dayirã kayabʉdera medico ma wãpanʉ maʉ̃ jaraita akʉza mainʉ wãira pera ẽ. Maʉ̃ kĩrãkʼa bʉ dayikʉza beita krĩchabʉdera pera ẽ baibara kʼareba jʉrʉita dayikʉza beita krĩchabʉbara jarakĩrãkʉ dayirã kayabʉta burude akʉza bia sentibʉ ẽãta. Maʉ̃ kʼarea jʉrʉibara kʼareba medicora maʉ̃ ʉ̃rʉ̃ bia kʼawuabʉ mae, maʉ̃rabara kʼarebadai baera.

   Naʉ̃ta ora: Meserabai jʉrʉra medico maʉ̃ ʉ̃rʉ bia kʼawuabʉta.

• ● Kĩrãbera Daizezebara bʉra kãgata.

   Daizeze Bedʼeaba jarabʉta: «Ibana zake cincota moneda wikaʉbari nẽdopanʉ ¿Mara mabida? mawuasidu Daizezebara biʼia akʉbʉ ibanarãra. [...] Peraraidua, marara ibanaira audre balebʉ» (Lucas 12:6, 7).

   ¿Kʼãrẽta jarakĩrãbʉ maʉ̃bara?: Daizezeita bʉra ẽbẽra biata.

   Edaude bʉa krĩchabʉbaibara bʉra mia abauba kãga ẽãta akʉza abapaibʉta mamina Daizezebara kʼawuabʉ bʉ sãwũãbʉra kãrẽne berabarinʉmʉta akʉza sãwũã sentibʉra. Bʉ wua ba e baita krĩchabʉmina kĩrãbera Daizezebara bʉra kagata. Salmo 51:17de naʉ̃ta jarabʉ: «So ãrĩbʉta akʉza sopʉabʉta, Daizeze, bʉara bari akʉ ẽ bayi». Naʉ̃ba ũdubibʉ Daizezebara bʉra wãrĩnu kãgata akʉza iyara kãga bʉ bʉra bei ẽ bamarẽã.

   Naʉ̃ta ora: Bibliade jʉrʉra Daizezeba bʉ sãwũã kãgabʉta, bari jaraita capítulo 24 Acerquémonos a Jehová librode

• ● Daizezeʼa yiwidʼira.

   Daizeze Bedʼeaba jarabʉta: «Mara bedʼea zromara jõma jaraidua, iyara marata krĩchabʉ baera» (1 Pedro 5:7).

   ¿Kʼãrẽta jarakĩrãbʉ maʉ̃bara?: Daizezebara kãgabʉ bʉa iya jõma jaramarẽã bʉ sãwũã sentibʉta akʉza bʉ bedʼea zromata jaramarẽã kãgabʉ.

    Daizezebara aduʼa sentibiyi bʉra akʉza zarea diayi bei ẽ ba marẽã (Filipenses 4:6, 7, 13). Mawũã kʼarebabʉ Daizezebara ẽbẽra biarãrã akʉza iyi kãgapanʉrarã (Salmo 55:22).

   Naʉ̃ta ora: Yiwidʼira Daizezeʼa mõbe jarara iyi trũta, Jeowa, akʉza jarada bʉ sãwũã sentibʉta iyiaʼa (Salmo 83:18). Widira kʼareba diamarẽã mawũã krĩcha ẽ baita beita.

• ● Krĩchara Daizeze Bedʼeaba bedʼea bia wei ʉ̃rʉ jarabʉta.

   Daizeze Bedʼeaba jarabʉta: «Dayirãba jʉ̃ãpanʉra, [...] maʉ̃ra nekʼãrẽ zʉgʉaba jãba aña wã ẽ baita kʼarebabʉ kĩrãkʼabʉ dayirã bebʉta» (Hebreos 6:19, nota españolde).

   ¿Kʼãrẽta jarakĩrãbʉ maʉ̃ba?: Daizeze Bedʼeaba bedʼea bia abʉba kʼarebayi bʉra aduʼa baita yi edebi ẽ baita bʉ bedʼea zroma mawũã jãba zʉgʉaba aña wãbi ẽ kĩrãkʼa bayi.

    Naʉ̃ bedʼea biara sewida ẽ, wãrĩnuara Daizezeba jarabʉ baera akʉza Daizezebara jarabʉ jõma jõbita zʉbʉriara Daizezeba jarabʉ baera kʼawuapanʉ maʉ̃ra wãrĩnuara (Apocalipsis 21:4).

    Naʉ̃ta ora: Daizezeba nebia wei ʉ̃rʉ jarabʉ audre kʼawuaira akʉra naʉ̃ kartata “La esperanza real de un mañana mejor”.

• ● Bʉ sobiabibʉta ora.

   Daizeze Bedʼeaba jarabʉta: «Dayi so sobiabʉdera remedio bia» (Proverbios 17:22).

   ¿Kʼãrẽta jarakĩrãbʉ maʉ̃bara?: Daya sobiabibʉta obʉdera maʉ̃bara kʼarebabʉ aduʼa baita akʉza yi edebi ẽ baita dayi burude kayabua.

   Naʉ̃ta ora: Ũrĩra musica bʉ bia sentibibʉta mawũã ẽ bʉrʉ lera bʉ sobiabibʉta akʉza jʉrʉda kʼãrẽ oita mawũã ẽ bʉrʉ kʼarebara wuabemarata bʉa kʼarebaseabʉde (Hechos 20:35).

• ● Naʉ̃ta ora bia baita.

   Daizeze Bedʼeaba jarabʉta: «Ejersicio oira yibia dayi kakuaita» (1 Timoteo 4:8).

   ¿Kʼãrẽta jarakĩrãbʉ maʉ̃bara?: Ejercicio oita, bia kãĩta, bia nekoita mawũã bʉ bia baita.

    Naʉ̃ta ora: Ejercicio ora aukara wemba ẽã 15 minutobayeda.

• ● Kĩrãbera dayi sãwũã sentibʉra audre eade cambiabʉta.

   Daizeze Bedʼeaba jarabʉta: «Mamina maraba kʼawua ẽ mara bebʉ nrʉema sãwũã bʼaita» (Santiago 4:14).

   ¿Kʼãrẽta jarakĩrãbʉ maʉ̃bara?: Bedʼea zroma dayi sopuabibʉra akʉza bedʼea zroma daya ara o be ẽ bei kĩrãkʼa krĩcha bʉra, maʉ̃ra jõseabʉ.

   Bʉa atia bedʼea zroma erbʉra zaremina, maʉ̃ra ewari jõmaʉ̃ne ẽ bayi maʉ̃ kʼarea ma paerãrã (2 Corintios 4:8). Edaude zarea wãrĩnu bedʼea zroma erbaira mamina maʉ̃ra berabariseabʉ mamina dayikʉza dayita beira maʉ̃ra ara o be ẽ dayara, beisibʉrʉ beisi jipa.

   Naʉ̃ta ora: Lera Daizeze Bedʼeade ẽbẽrarã ayikʉza bei kĩrã bada ʉ̃rʉ, adewara bʉa kʼawuayi ãyira kʼãrẽba kʼarebasi maʉ̃ra yi ede bi ẽ baita. Maʉ̃ra ʉ̃rʉ bia kʼawuadaya.

 ¿Daizeze Bedʼeadera eda jarabʉka ẽbẽrarã ãyikʉza bei kĩrãbada ʉ̃rʉ?

 Mawũã. Daizeze Bedʼeabara jarabʉ basita ẽbẽrarã ãyikʉza bei kĩrãbadata, mamina maʉ̃rabara jarasida Daizezeʼa maʉ̃ta. Maʉ̃ kʼarea kĩru ẽ basi Daizezera ãyibawarara awuarabʉrʉ kʼareba diasi. Maʉ̃raʼa kʼarebada kĩrãkʼa bʉsida kʼarebaseabʉ Daizezebara.

Elías

•  ● ¿Kʼai basi Elíasʼra? Elíasʼra profeta basi zowaĩnĩgʉa basi iyira, mamina mawũãsidʉ ewari aba sopuasi. Santiago 5:17de jarabʉ naʉ̃ta «Elíasʼra dayi kĩrãkʼa krĩchabasi».

•  ● ¿Kʼãrẽa beikĩrãbasi Eliasʼra? Ewari aba Elíasbara sentisi iyira aba pai bʉta akʉza perasi akʉza krĩchasi iyira miakaresida zeri ẽãta, maʉ̃ kʼarea jarasi Jeowaʼa: «Jeowa, beara mʉ̃ra» (1 Reyes 19:4).

•  ● ¿Kʼãrẽba kʼarebasi Eliasʼra? Elíasbara jõma jarasi Daizezeʼa iyi sãwũã sentibʉra. Mãwẽra ¿Jeowabara sãwũã kʼarebasi iyira? Jeowabara ũdʉbisi Elías iyira wãrĩnu kãgabʉta akʉza Daizezebara iyi zareadeba nebia zromata ũdʉbisi, adewara jarasi Elíasʼa wãrĩnu ẽbẽra biata maʉ̃ awuara neũdukʼawuabiata diasi Elías mawũã maʉ̃ba bia akʉmarẽã.

•  ▸ Akʉra Elías ʉ̃rʉ: 1 Reyes 19:2-18.

Job

•  ● ¿Kʼai basi Jobʼra? Iyira Daizeze ode kʼẽrẽpa basi akʉza plata mejãcha erbasi, familia mejãchade erbasi.

•  ● ¿Kʼãrẽa beikĩrãsi iyi Jobʼbara? Atiaude Jobʼra mejãchade zʉbʉriasi. Iya kʼãrẽ erbadara jõma aduasi, yi wũãwũãrasida zʉbʉria beisida akʉza kaya kayiruaba jidasi iyira mejãchade pua basi. Maʉ̃ awuara imitia bedʼeasida, iyi ʉ̃rʉ sewidata jarasi adewara jarasida iya jʉrʉsita iyi mawũã zʉbʉrianʉmaira. Maʉ̃ kʼarea Jobʼra mejãchade sopuasi akʉza ma paesi, maʉ̃ba jarasi naʉ̃ bedʼeata: «Mʉ̃ bebʉra mʉ̃a igara akʉza wua bakĩrã ẽ» (Job 7:16).

•  ● ¿Kʼãrẽba kʼarebasi iyi Jobʼra? Jobʼra Jeowaʼa yiwidʼisi adewara kʼarebata jʉrʉsi (Job 10:1-3). Maʉ̃ tẽãjunea Jobʼra iyi neũdʉkʼawuabiaba kʼarebasi, Eliuba. Mawũã aukara krĩcha ẽ marẽã iyi bedʼea zromata. Mamina audre yibiara Jobʼbara iya ũragʼa diadapeadara ũrĩkĩrãne ũrĩsi akʉza Daizezeʼa yi kʼarebabisi.

•  ▸ Akʉra Job ʉ̃rʉ: Job 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Moisés

•  ● ¿Kʼai basi Moisésʼra? Moisésbara zokʼabasi Daizeze pueblo israelta akʉza profeta bia basi iyira.

•  ● ¿Kʼãrẽa beikĩrãbasi Moisésʼra? Moisésʼra mejãcha trabajasi jipa adewara i kayirua bedʼea panasi iyi ʉ̃rʉ, maʉ̃ kʼarea mapaesi. Maʉ̃ba Daizezeʼa jarasi: «Beatara mʉra» (Números 11:11, 15).

•  ● ¿Kʼãrẽba kʼarebasi Moisesʼra? Moisésbara jõma Daizezeʼa jarasi iyi sãwũã sentibʉra. Daizezebara kʼarebata diasi mejãcha mapae ẽ marẽã iyi trabajode.

•  ▸ Akʉra Moisés ʉ̃rʉ: Números 11:4-6, 10-17.