Kei cu Guatemala ram, thlanglei tlangcung i a hlatnak hmun ah a ummi Acul khua ah a chuakmi ka si. Ka chungkhar cu Maya miphun in a rami Ixil miphun kan si. Kan holh lengah Spain holh zong ka thiam. Guatemala ram ah kum 36 chung a raumi ramchung dohnak kha ka ngakchiat lioah ka rak tong. Mah lioah Ixil mi tampi an rak thi.

Kumli ka si lioah kum sarih a simi ka upa nih lente celhnak ah a hmanmi bom cu ruahlopi in a rak puak. Mah ruangah ka mit a caw i ka upa cu a rak thi. Mah hnu in Guatemala Khua i mitcaw sianginn ah ka um i Mitcaw Ca ka rak cawng. Ka sayate nih a dang ngakchia pawl he an ka chawnhbiakter lo i sianginn ka kaiṭimi hawile zong nih an ka hrial. Zei ruangah cutin an ka pehtlaih ti kha ka hngal lo. Cucaah ka li a leng peng i thlahnih chung sianginn khar caan a phanh lai kha ka rak i ngaih tuk. Ngaihchiat awk ngai a simi cu kumhra ka si ah ka nu cu a rak thi. Vawleicung ah a ka dawtu pakhat lawng a simi ka nu nih a ka thihtak caah ka ngaih a chia tuk.

Kum 11 ka si ah ka chuahkehnak khua ah ka kir ṭhan i pa khat, nu dang ka upa te sinah ka um. Eidin cu an ka zohkhenh ko nain lungthin lei in cun an ka bawm kho lo. A caan ah ka ṭap i Pathian sinah hitin ka ti: “Zeicah ka nu hi a thih? Zeicah ka mit a cawt?” Mi nih cu bantuk thil ṭhalo na tonmi cu Pathian duhnak a si tiah an ka ti. Cutin a si ahcun Pathian cu zaangfahnak a ngei lomi le a ding lomi a si tiah ka ruah. Keimah le keimah kaa thah khawh lonak a ruang cu ka mit a cawt caah a si.

Ka mit a cawt hnu in pumsalei he lungthinlei he ka tha a der. Ka ngakchiat lioah atule atu tlaihhremnak ka rak tong. Cu bantuk thil ka ton tikah ahohmanh ka chim hna lo. Ka chimh hna zongah zei ah an rel lai lo tiah ka ruah caah a si. Mi nih an ka chawnhbiak tuk lo caah keimah lawng tein ka rak um. Mah tikah ka li a leng i lungdong zawtnak ka rak ngei. Cun ahohmanh kha ka zum kho ti hna lo.

Kum 13 ka si ah Jehovah Tehte nuva tuahkhat cu sianginn dinh caan ah ka sinah an rak ra. Ka cungah zaaangfahnak a ngeimi sayamah pakhat nih keimah he biaruahnak nawl a pek hna. A thimi cu an tho ṭhan lai i mitcaw cu khua an hmu ṭhan lai timi Pathian biakam kong kha an ka chimh. (Isaiah 35:5; Johan 5:​28, 29) An chimmi kong cu ka duh ko nain midang he kaa komh lo caah zeitindah ka chawnhbiak hna lai ti kha ka hngal lo. Asinain lungdong lo tein ka sinah an ra ṭhan i Baibal kong kha an ka cawnpiak. Keimah ton awkah tlanglam ah meng 6 leng an ke in an kal.

Ka upa nih annih cu zohrem tein thilpuan aa hrukmi an si nain mirum cu an si lo tiah a ka ti. Asinain annih nih laksawng an ka put i an ka zohkhenh. A hmaanmi Khrihfa lawng nih cu bantuk mahca ṭhatnak cu an hlawt khawh lai ti kha ka hngalh.

Baibal kong kha Mitcaw Ca in ka hlathlai. Ka cawnmi kong cu ka hngalhthiam ko nain cheukhat a kong hna cu cohlan awkah a harh. Tahchunhnak ah, midang sinah Pathian nih mi pakhat bantukin a ka dawt i a ka zohkhenh timi kong le ka cungah Pathian nih a ngeihmi lungput kong kha chim khawh a si ti kha zumh awkah kaa har. Jehovah nih sifah harnak um awkah chikkhat nawl a awnhmi a si ti kha cu ka hngalhthiam. Asinain mah lioah Pathian cu dawtnak a ngeimi Pa pakhat in ka rak hmu kho lo. *

Baibal in ka cawnmi a kong cheukhat ruangah ka hmuh ning cu duhsah tein a hun i thleng. Tahchunhnak ah, sifah harnak a tongmi hna cungah Pathian cu zaangfahnak taktak a ngei ti kha ka hun hngalh. A ding loin pehtlaihnak a tongmi a salle kong he aa tlaiin Pathian nih ‘zeitluk in dah ka mi hna nih temh innak an huah ti kha fiangte in ka hmuh cang. An nganfahnak cu ka hngalh dih cikcek’ tiah a ti. (Exodus 3:7) Zaangfahnak a ngeimi Jehovah i a sining ṭha pawl kha ka hun sunsak tikah a sinah i pumpek ka hun duh. 1998 ah Jehovah Tehte pakhat in tipil ka rak ing.

Tipil ka in hnuin kumkhat hrawng a rauh ah Escuintla khua pawng i a ummi mitcaw mi hna caah tuahmi tinṭan kha ka rak kai. Ka umnak in pumhnak ah kal cu ka caah a har ti kha Khrihfa upa pakhat nih a hngalh. Aa naih biknak Khrihfabu cu Baibal a ka cawnpiaktu nuva hna an kal tawnnak tlang i khatlei kam lawngah a um. Cucaah i pumh cu ka caah a fawi lo. Mah tikah Khrihfa upa nih keimah bawmh awkah Escuintla khua i unau chungkhar pakhat kha bawmhnak a rak hal hna. Annih nih an inn ah an ka umter i kaa pumh khawh nakhnga an ka bawmh. Tu ni tiang an chungkharmi pakhat bantukin an ka zohkhenh.

Ka cungah dawtnak a langhtermi unau pawl kong ka chim ahcun a dih kho lai lo. A tawinak in chim ahcun anmah ruangah Jehovah Tehte pakhat in a hmaanmi Khrihfa ah ka um cang ti kha ka zumh.​—Johan 13:34, 35.

Atu ahcun man ka ngei cang i ruahchannak zong ka ngei cang. Cun ka nunnak zong sullam a ngei cang. Jehovah Tehte Hna i Baibal lei fimcawnnak rian zongah hmaan tein kaa tel cang. Cucaah ka mit a cawtmi kha i philh in midang sinah man a ngei tukmi Baibal biatak kong chimtu kha biapi ah ka chiah. Mah lengah Khrihfabu ah Khrihfa upa pakhat in rianṭuan awk le Baibal hrambunhmi phungchimnak hna chim awkah tinvo sung hna ka hmu.

2010 ah El Salvador ah tuahmi Bu Rianṭuantu Tinṭan (Atu ah Pennak Kong Chimtu hna caah Tinṭan tiah auhmi) kha ka rak kai. Mah tinṭan i an kan cawnpiakmi ruangah Khrihfabu rian pawl kha tlamtling tein ka ṭuan khawh. Cun a rian ṭuan khawh awkah a ka bawmtu Jehovah Pathian nih a ka sunsak tuk i a ka dawt tuk ti zong kha ka hngalh cang.

Jesuh nih hitin a ti: “Pek leiah hin hmuh lei nakin lunglawmhnak a um deuh.” (Lamkaltu 20:35) Atu ah kei cu aa lawmmi ka si tiah ka chim khawh cang. Hlanah cun midang ka bawmh khawh hna lai tiah ka rak ruah bal lo nain atu ahcun ka bawmh khawh cang hna. CT60▪