“Zei Ah An Rak Rel Lo”

RALRIN peknak zeirellonak nih rawhralnak a tlunter khawh.

1974 ah Australia ram Darwin khua ah manh caan nuamhnak puai ca timhtuahnak an tuah lioah thlichia (cyclone) a hrang lai tiah ralrin pek an rak si. Darwin khua ah kum 30 dengmang chung thlichia ruangah rawhralnak a rak um lo. Atu tah zeitindah a si lai? Thlichia a fah tuk ruang i mi an chahnak hmun inn cung khuh le vangpang hna an i hawh i an baoh hlan tiang kha cu khuami tamdeuh nih cun ṭihnung in an rak ruat lo. A thaizing ahcun khua cu a rawk dih cikcek.

1985 November thla ah Colombia ah meitlang pakhat a rak puak. Hawhra le ti-​khal pawl an ti i nawncek hang in a luang ciammam i Armero khua mi 20,000 kha a rak phum hna. A hlankan in ralrin pek chungnak a um lo caah maw a si? Tlang cu a thla in aa hnin. Sihmanhsehlaw, meitlang pawngah a um thluangthluanmi Armero khuami tamdeuh nih khakha biapi ah an rak chia lo. Cozah bawi pawl nih a rauhhlan ah meitlang a puak cang lai timi ralrin peknak an hmu ko na buin zapi kha ralrin an rak pe hna lo. Radio zapi theihternak in mi lungfehnak a pemi thawngpang kha an rak thanh. Church ​loudspeaker hmangin zapi kha dai tein um awkah an rak forh hna. Zanlei sangah fak ngaiin voihnih a rak puak. Na ngeihmi thilri kha kal tak in na rak zam hnga maw? Mi tlawm te lawng a tlai hlanah zam an rak i zuam.

Vawlei le a chung thil kong lei mifim ​(Geologist) pawl nih li aa hninh lainak hmun kha a tamnawn hmaan in an chimchung tawn. Sihmanhsehlaw li aa hninh lainak a caan taktak kha cu a caancaan tete lawngah an chimchung khawh. 1999 kum ah lihninh ruangah vawlei pumpi mi 20,000 hrawng an rak thi. A thimi mi tampi nih zeitik hmanhah cu bantuk thil kan tong lai tiah an rak ruat lo.

Pathian Sinin Ralrinpeknak Kha Zeitindah Na Leh?

Hmanung bik caan a si a langhtermi thil kha Baibal nih kum tampi chung a hlankan in fiangte in a rak langhter. Mah langhternak he aa tlaiin, “Noah chan” thil ​sining kha ruah awkah a kan forh. “Tilian a tlun hlan khan cun” mi hna nih hmunkip i a ummi zang-ennak kha zei ah an rak rel lo i  an ṭuan lengmangmi nifa an nunnak rian he i manh lo ngai in an rak um. Pathian nih a sal Noah hmangin ralrinnak a rak pek ko hna nain “tilian a hung tlun taktak i a fenh dih hna hlantiang kha cu zeihmanh an hngal [“zei ah an rak rel,” NW] lo.” (Matthai 24:​37-​39) Nang tah ralrin peknak kha na rak zul hnga maw? Atu tah na zul maw?

Abraham tupa Lot chan lio i Rili Thi pawng, Sodom khua ah na um a si ah tah zeitindah? A pawngkam hmun cu paradis he aa lo. Cu khua cu khua rum a si. Mi cu an hna a ngam. Lot chanah mi hna cu “an ei an ding an i zorh, thlaici an cing, inn an sa” hna. A umnak hmun mi hna cu ziaza lei zongah an rak rawkral ngaingai. Lot nih thil ṭhalo tuah hlah u tiah ralrin peknak bia a rak chim lioah cu ralrin peknak  cu  na lung chungah na rak khum hnga maw? Sodom khua hrawh awkah Pathian nih bia a khiah cang tiah an chimh tikah na ngai hnga maw? Asiloah a fanule a ṭhitu hna hnga dingmi bantukin capo bia ​pakhat in dah na ruah hnga? Lot nupi ​bantukin zam hnu i i mer ṭhan awk a kong na ngei hnga maw? Ralrin peknak kha biapi ah an rak chia lo, asinain Sodom khua in Lot a chuah ni ah khan “mei le kat cu vancung in a rung sur i a thah dih hna.”​​—⁠Luka 17:​28, 29.

Kan chan i mi a tam deuh nih cun zei ah an rel lo.  Sihmanhsehlaw a  ​cunglei ​zohchunh awk thil hna kha kan caah HNGAH PENG awk i ralrin a kan petu le thazang a kan petu in Pathian Bia ah khumh a si cang!

[Box/Table on Page 22]

Vawlei Pumpi Buanchukcho A Tlung Bal Taktak Maw?

Soiseltu tampi nih cun a tlung lo an ti. Sihmanhsehlaw Baibal nih cun a rak tlung tiah a ti.

Jesuh Khrih theng nih mah kong kha a rak chim, amah cu buanchukcho lioah a rak nung i van in mah khakha a rak zoh.

[Box/Table on Page 23]

Sodom le Gomorrah Hrawh A Rak Si Taktak Maw?

Hlanlio thil hlathlainak nih hrawh a si tiah a  langhter.

Vawlei lei tuanbia zong nih mah kong kha a  chim.

Jesuh Khrih nih mah kong kha a fianter i, Baibal cauk uk 14 chungah mah kong cu langhter a si.