Rom 14:1-23
14 A zumhnak a dermi kha cohlang hna, asinain nan hmuh ning aa khat lomi* hna kha va soi hna hlah.
2 A zumhnak a ṭhawngmi nih zeipaoh a ei, asinain a zumhnak a dermi nih cun anhringso lawng a ei.
3 Zeipaoh a eimi nih a ei lomi kha zawmhtaih hlah seh, a ei lomi zong nih a eimi kha soi ve hlah seh. Zeicahtiah Pathian nih a cohlan cangmi a si.
4 Midang sal va soi awkah nangmah cu ahodah na si? A bawi cu nangmah na si lo, Pathian a si. A tuahsernak a hmaan, hmaan lo ti kha Pathian lawng biakhiahnak nawl a ngei. Jehovah* nih a bawmh caah a hmaiah a dir kho ko.
5 Mi pakhat nih ni cheukhat cu ni dang nakin a sunglawi deuh tiah a ruah, a dang pakhat nih cun ni vialte cu an i khat ko tiah a ruah. Zeitin an ruah hmanh ah kan hmaan ti kha an zumh awk a si.
6 Ni sunglawi a ulmi nih Jehovah* kha upat in a ulhmi a si. Zeipaoh a eimi zong nih Jehovah* kha upat in a eimi a si, zeicahtiah Pathian sinah lawmhnak bia a chim. Cun a ei lomi zong nih Jehovah* kha upat in a ei lomi a si nain Pathian sinah lawmhnak bia a chim ve ko.
7 Ahohmanh kanmah ca lawng ah kan nung lo. Ahohmanh kanmah ca lawng ah kan thi lo.
8 Kan nun ahcun Jehovah* caah kan nung, kan thih ahcun Jehovah* caah kan thi. Cucaah kan nun ah siseh, kan thih ah siseh Jehovah* ta kan si.
9 Zeicahtiah Khrih a thih i a thawh ṭhanmi cu a thimi le a nungmi hna i an Bawi si awkah a si.
10 Na unau kha zeicah na soi? Na unau kha zeicah na zawmhtaih? Kan dihlak in Pathian biaceihnak ṭhutdan hmaiah a dir ding lawng te kan si.
11 “Jehovah* nih ‘Ka nun bang in ka chim, mi vialte cu ka hmaiah an khuk an i bil lai i Pathian ka si kha an phuan lai’ a ti” tiah cathiang ah aa ṭial.
12 Cucaah kan dihlak in Pathian hmaiah kan kong kan i chim cio te lai.
13 Cucaah pakhat le pakhat i soi ti hna hlah u sih. Unau pakhat caah tlukrilhtertu asiloah dawnkhantu thil tuah lo ding in biakhiak hna u sih.
14 Amah tein a thurhnawmmi zei thil hmanh a um lo ti kha Bawipa Jesuh thawng in ka hngalh i ka zumh. Mi pakhat nih thil pakhatkhat kha a thurhnawm tiah a ruah lawng ah mah cu a caah a thurhnawmmi a si.
15 Na eimi rawl nih na unau kha lungsiarem loin a umter ahcun mah cu dawtnak lam na zulhmi a si ti lo. A caah Khrih a thihmi a si caah na eimi ruang ah amah cu rawhter hlah.
16 Cucaah a ṭha tiah na ruah nain midang nih an in thangchiat dingmi thil a si ahcun tuah hlah.
17 Pathian Pennak cu ei le din he aa pehtlai lo, thiang thlarau nih a chuahtermi dinnak, daihnak le lawmhnak he tu aa pehtlai.
18 Cuticun Khrih sal a simi paoh cu Pathian nih a cohlan hna i minung sinin mithmai ṭha zong an hmu.
19 Cucaah daihnak a chuahtermi thil le pakhat le pakhat thazaang petu a simi thil kha tuah awkah fakpi in i zuam hna u sih.
20 Rawl ruang menmen ah Pathian kutzung kha hrawk ti hlah u. Rawl vialte cu an thiang dih ti cu a hmaan ko. Asinain kan eimi nih midang a tlukrilhter ding a si ahcun mah rawl ei cu a palh.
21 Na unau tlukrilhtertu a si ahcun sa ei lo, zu din lo le zei thil hmanh tuah lo ah a ṭha bik.
22 Na ngeihmi zumhnak cu Pathian le nangmah he lawng aa pehtlaimi siter ko. A hmaan tiah a ruahmi thil a tuah ruang ah amahle amah phuhrunnak a ngei lomi cu lunglawmmi a si.
23 Asinain lunghrinnak he a ei ahcun a palh, mah cu a hmaan timi zumhnak ngei loin a ei caah a si. Zumhnak loin tuahmi thil vialte cu sual a si.
Footnotes
^ Asiloah “lungawṭawm in a ummi” ti zong a si kho.
^ Thlaihhlei A5 ah zoh.
^ Thlaihhlei A5 ah zoh.
^ Thlaihhlei A5 ah zoh.
^ Thlaihhlei A5 ah zoh.
^ Thlaihhlei A5 ah zoh.
^ Thlaihhlei A5 ah zoh.
^ Thlaihhlei A5 ah zoh.
^ Thlaihhlei A5 ah zoh.
