Matthai 14:1-36
14 Cu caan ah peng uktu Herod nih Jesuh kong a theih tikah,
2 a bawi pawl kha “Mah pa cu Tipil Petu Johan a si lai. Thihnak in a thawh ṭhan caah hi bantuk ṭhawnnak hna hi a langhter khawhmi a si” tiah a ti hna.
3 Herod* nih a u Filip nupi Herodias ruang ah Johan kha a tlaih i thong ah a rak thlak.
4 Johan nih “Herodias cu na ṭhit awk a si lo” tiah a rak ti caah a si.
5 Herod nih Johan kha thah a duh, asinain Johan cu profet a si tiah a ruatmi mibu kha a ṭih hna caah a that ngam lo.
6 Herod nih a chuah ni ah puai a tuah i Herodias fanu nih a laampiak hna. Mah nih Herod cu a lung a ton ngaingai.
7 Cucaah na ka halmi paoh kaan pek lai tiah chiatserh in bia a kamh.
8 A nu nih a forh bantuk in “Hika ah hin Tipil Petu Johan a lu kha kheng in ka pe” tiah a hal.
9 Herod cu a ngaih a chia, asinain a sawmmi hna hmaiah bia aa kam cangmi a si caah a halmi kha pek ding in nawl a pek hna.
10 Cucaah thong chung ah mi a thlah hna i Johan lu kha a va tanter hna.
11 Johan lu kha kheng in an rak put i nute kha an pek, cun nute nih a nu sinah a kalpi.
12 Mah hnuah Johan zultu pawl nih a ruak kha an lak i an vui, cun Jesuh sinah an ra i thawng an rak thanh.
13 Mah kong kha a theih tikah Jesuh cu amah lawng in um a duh caah hmunking ah lawng in a kal. Mah kha mi nih an theih tikah anmahle an khua cio in an ra i an ke in an zulh.
14 Jesuh cu rilikam a phak tikah mibu kha a hmuh hna i a zaang an fak tuk, cucaah a zawmi kha a damter hna.
15 Zanlei sang a phak tikah a zultu hna nih “Hika hi hmunking a si, khua zong a tlai cang. Mibu hi ṭinter hna law pawngkam khua ah rawl va cawk hna seh” tiah an ti.
16 Asinain Jesuh nih “An kal a hau lai lo, nanmah nih dang ko hna u” tiah a ti hna.
17 A zultu pawl nih “Changreu hlum nga le nga pahnih lawng pei kan ngeih cu” tiah an ti.
18 Jesuh nih “Mah cu rak pu u” tiah a ti hna.
19 Mibu kha ram cung ah a ṭhutter hna, cun changreu hlum nga le nga pahnih kha a lak. Van a cau i thla a cam,* changreu kha a cheu i a zultu pawl kha a pek hna, a zultu pawl nih cun mibu kha an phawt hna.
20 An dihlak in khim tein an ei dih hnuah a taangmi kha an khawmh tikah sei 12 a si.
21 A eitu cu pa lawng 5,000 hrawng an si, nu le ngakchia zong an um rih.
22 Mah dih cangka in Jesuh nih a zultu pawl kha rili khattalei ral ah lawng in a kalter chung hna, mibu zong a tlunter hna.
23 Mibu a tlunter hna hnuah Jesuh cu thlacam ding in tlang cung ah amah lawng in a kai. Cuka ah zan tiang amah lawng in a um.
24 Mah lioah lawng cu rilikam in hlat nawn* a phan cang. Thli fakpi in a hran caah tilet nih lawng cu a hlawh len ko.
25 Khua a dei lai te* ah Jesuh cu ti cung in a kal i an sinah a ra.
26 Ti cung in a kalmi kha an hmuh tikah zultu hna cu an ṭih tuk i “Zoh hmanh u, zeipi dik a ra!” tiah thinphang ngai in an au.
27 Jesuh nih a hei chawnh colh hna i “Nan thinphang hlah u! Keimah ka si; ṭih hlah u” tiah a ti hna.
28 Peter nih “Bawipa, nangmah na si taktak ahcun na sinah ti cung in ka ratter ve” tiah a ti.
29 Jesuh nih “Ra ngat” tiah a ti tikah Peter cu lawng cung in a ṭum i ti cung ah a kal.
30 Asinain thlichia a hranmi kha a hmuh tikah ṭihnak a hun ngei, cucaah a pil thluahmah i “Bawipa, ka khamh tuah!” tiah a au.
31 Jesuh nih a hei banh colh i a tlaih, cun “Na zumhnak a va hme hringhran dah, zeicahdah lungawṭawm in na um?” tiah a ti.
32 An pahnih in lawng chung an luh tikah thlichia cu a dai.
33 Lawng chung ah a ummi zultu hna cu a hmaiah an kun i “Nangmah hi Pathian Fapa na si hrimhrim ko” tiah an ti.
34 Mah hnuah rili khattalei ah an kal i Genesaret ram ah an phan.
35 Cuka mi hna nih Jesuh kha an rak i cinken caah Jesuh a phanhnak kong kha an pawngkam hmun kip ah thawng an thanh hna. Mah tikah mi nih a zawmi pawl kha an ratpi hna.
36 Jesuh kha na puanki tal kan tawnghter ko tiah an nawl i a tawngmi paoh cu an dam.
Footnotes
^ Herod Antipas. Biafang Fianternak ah zoh.
^ A hrampi, “thluachuah a hal.”
^ A hrampi, “stadia tampi.” Stadia pakhat cu pe 606.95 (185 m) he aa tluk.
^ Zinglei suimilam 3 in 6 kar.
