Lamkaltu 25:1-27
25 Festas cu peng uktu in cuka peng ah a rak phan. Nithum hnuah Sisaria khua in Jerusalem khua ah a kal.
2 Tlangbawi upa hna le Judah mi hruaitu hna nih Paul sual an phawtnak kong cu an rak chimh. Cun Festas sinah,
3 Paul kha Jerusalem ah rak kuat ding in an nawl. A tak ti ahcun Paul kha lampi ah rak bawh in thah awkah khua an khang.
4 Asinain Festas nih Paul cu Sisaria thong ah chiah a si rih lainak kong le amah theng zong cuka ah tlun colh aa timhnak kong kha a chimh hna.
5 Cun “Nan lak i hruaitu hna nih rak ka zul hna seh law cu pa nih sualnak a tuahmi pakhatkhat a um ahcun taza cuai ko hna seh” tiah a ti.
6 An sinah niriat, nihra hrawng a caam hnuah Sisaria khua ah a kir ṭhan. A thaizing ah biaceihnak ṭhutdan ah a ṭhu i Paul kha rak chuahpi ding in nawl a pek hna.
7 An rak chuahpi tikah Jerusalem in a rami Judah mi hna nih an but i sualnak ngan tampi a tuah tiah sual an puh. Asinain sual an puhmi a hmaan ti cu an langhter kho lo.
8 Paul nih “Judah Phung siseh, biakinn siseh, Sizar* siseh ralchanh in zei sualnak hmanh ka tuah bal lo” tiah runvennak bia a chim.
9 Festas nih Judah mi hna lungton a duh caah Paul kha “Jerusalem khua ah kal in hi sual an in puhmi kong he aa tlaiin ka hmaiah biaceih na duh maw?” tiah a hal.
10 Paul nih “Atu Sizar biaceihnak ṭhutdan hmaiah ka dir ko i hika ah bia an ka ceih awk a si. Judah mi hna ralchanh in zei sualnak hmanh ka tuah lo ti kha nangmah zong nih ṭha tein na hngalh ko.
11 Thih awk tlak sualnak ka tuah taktak ahcun thihnak in luat awkah kaa zuam hnga lo. Asinain sual an ka puhmi cu a hmaan ṭung lo ahcun an lungton awk ca men ah an kut chung ah ahohmanh nih nan ka chaan kho lai lo. Sizar sinah a zu ka khaan!” tiah a ti.
12 Festas nih ruahnak cheutu hna he an i ceih hnuah “Sizar sinah a zu na khaan caah Sizar sinah na kal lai” tiah a ti.
13 Ni tlawmpal hnuah siangpahrang Agrippa le Bernis cu Festas chawnhbiak awkah Sisaria khua ah an rak phan.
14 Cuka ah ni tam nawn an caam i Festas nih Paul kong kha siangpahrang cu hitin a chimh:
“Felix nih thong a rak thlakmi mipa pakhat a um.
15 Jerusalem i ka kal lioah tlangbawi upa hna le Judah mi hruaitu hna nih mah pa kong kha an ka chimh i dantatpiak awkah an ka nawl.
16 Asinain taza cuaimi pakhat kha a cuaitu hna hmaiah runvennak bia chimnak caanṭha pek hmasa loin pakhatkhat lungton awkah aho sin hmanh ah chanh khawh a si lo timi Rom phung a um tiah ka leh hna.
17 Cucaah hika an phanh tikah a caan thawn loin a thaizing bak ah biaceihnak ṭhutdan ah ka ṭhu i mah pa kha rak chuahpi ding in nawl ka pek hna.
18 Taza a cuaitu hna cu an dir i sualphawtnak bia an chim tikah a tuah lai tiah ka rak ruahmi thil ṭhalo pakhat hmanh an chim lo.
19 An biaknak kong* le Jesuh timi pa kong an rak i almi tu a si lehlam. Mah Jesuh cu a thi cang nain Paul nih cun a nung ko tiah biatak tein a chim.
20 Mah an i almi kong ah hin zeitin tuah ding ti ka hngalh lo caah Paul kha Jerusalem ah kal in mah kong hi khika ah ceihpiak na duh maw tiah ka hal.
21 Asinain Sizar* nih bia a khiah hlan chung paoh cu thonginn ah rak ka chia ko tiah a ka nawl caah Sizar sin ka kuat hlan chung thonginn ah um ding in nawl ka pek.”
22 Agrippa nih “Mah pa cu keimah theng nih a bia theih ka duh” tiah a ti tikah Festas nih “Thaizing ah na theih lai” tiah a leh.
23 A thaizing ah Agrippa le Bernis cu rumra ngei ngai in ralbawi hna le hmaizah awk tlak khua upa hna he biaceihnak inn ah an hung lut. Cun Festas nih Paul kha ratpi ding in ralkap pawl kha nawl a pek hna.
24 Festas nih “Siangpahrang Agrippa le hika i a rami vialte hna, mah pa hi zoh hmanh u. Jerusalem khua le hika ah a ummi Judah mi vialte nih hi pa he aa tlaiin an ka nawl i nun awkah aa tlak lo tiah an au lengmang.
25 Asinain thih awk tlak sualnak zeihmanh a tuah lo ti kha ka hmuh. Amah theng zong nih Sizar sinah a zu a khaan caah a sinah kuat ding in bia ka khiah.
26 Asinain a kong he aa tlaiin ka Bawipa Sizar* sinah zei set ṭial awk ka ngei lo. A bia kan ngaihpiak hnu lawng ah ṭial awk ka ngeih lai caah nan dihlak hmai le a hleiin Siangpahrang Agrippa, nangmah hmaiah hi pa hi ka rak chuahpi.
27 Zeicahtiah sual an puhnak zeihmanh ṭial khawh ṭung loin thongtla pakhat hei kuat cu aa tlak lo tiah ka ruah” tiah a ti.
