Johan 9:1-41
9 Jesuh nih a kal pah in a chuahka in a mit a cawmi pa pakhat kha a hmuh.
2 Mah tikah a zultu hna nih “Rabbi, mitcaw cia in a chuahmi hi amah sualnak ruang ah maw asiloah a nu le a pa sualnak ruang ah dah?” tiah an hal.
3 Jesuh nih “Amah sualnak ruang ah a si lo, a nu le a pa sualnak ruang zong ah a si lo. Hitin a simi cu mi nih Pathian rianṭuannak an hmuh nakhnga caah a si.
4 A ka thlahtu a rian kha chun ah kan ṭuan awk a si; ahohmanh rian an ṭuan khawh lo caan, zan a phan te lai.
5 Hi vawlei i ka um chung paoh cu vawlei ceunak ka si” tiah a leh hna.
6 Mah hnuah vawlei ah a cil a chak i tlak a ser, mah tlak kha mipa i a mit ah a thuh.
7 Cun “Va kal law Siloam tidil ah va ṭawl” tiah a ti. (Siloam timi cu “A Luang Thluahmah” tinak a si.) Cucaah a kal i aa va ṭawl tikah mit khua hmu in a rak kir.
8 Mah pa cu mi thil a halmi a si kha innpa le amah a hmu tawnmi hna nih an hngalh caah “Hi pa hi a ṭhu i mi thil a hal tawnmi kha a si lo maw?” tiah an ti.
9 A cheu nih “A si ko” an ti. A cheu nih cun “A si lo, amah he aa lomi a si” tiah an ti. Cucaah mah pa nih “Keimah ka si ko” tiah a ti hna.
10 Annih nih “Zeitindah na mit khua na hmuh khawh?” tiah an hal.
11 Mah tikah “Jesuh timi pa nih tlak a nawn i ka mit ah a ka thuh, cun ‘Va kal law Siloam tidil ah va ṭawl’ tiah a ka ti. Cucaah ka kal i kaa va ṭawl tikah khua ka hun hmu ko” tiah a leh hna.
12 “Mah pa cu khoika ah dah a um?” tiah an hal. Mah tikah “Ka hngal lo” tiah a ti hna.
13 A mit a rak cawmi pa kha Farasi mi hna sinah an kalpi.
14 Jesuh nih tlak a ser i a mit khua a hmuhter ni cu Sabbath ni a si.
15 Farasi mi nih zeitindah a mit khua a hmuh ṭhan ning a si ti an hal tikah anih nih “Ka mit ah tlak a ka thuh i kaa va ṭawl tikah khua ka hun hmuh ko” tiah a leh hna.
16 Farasi mi cheukhat nih “Hi pa cu Pathian sinin a rami a si kho lo, zeicahtiah Sabbath nawlbia a buar” tiah an ti. A cheu nih cun “Misual a si ahcun hi bantuk khuaruahhar thil hi zeitindah a tuah khawh lai?” tiah an ti. Cucaah an lakah i ṭhencheunak a chuak.
17 A mit a rak cawmi pa kha “Na mit khua aan hmuhter caah amah hi zeitindah na ruah?” tiah an hal tikah “Profet a si” tiah a leh hna.
18 Asinain Judah mi hna nih mah pa hi a mit a rak caw bal i atu ah khua a hmuh ṭhan ti kha an zum duh lo, cucaah a nu le a pa kha an auh hna.
19 “Mah pa hi mitcaw cia in a chuakmi nan fapa cu a si maw? Zeitindah atu hi a mit khua a hmuh khawh?” tiah an hal hna.
20 A nu le a pa nih “Amah hi kan fapa a si ko, mitcaw cia in a chuakmi a si.
21 Asinain atu hi zeitindah khua a hmuh khawh ṭhan ti cu kan hngal lo; aho nih dah a mit khua a hmuhter ti zong kan hngal lo. Amah hi hal ko u. Upa pei a si ve cang ko cu, amah tein i chim ko seh” tiah an ti.
22 A nu le a pa nih cutin an chimmi cu Judah mi kha an ṭih hna caah a si. Jesuh kha Khrih a si tiah a cohlangmi paoh cu pumhnak inn in ṭhawl an si lai tiah Judah mi nih hnatlaknak an rak tuah cang caah a si.
23 Cucaah a nu le a pa nih “Upa pei a si cang ko cu. Amah kha hal ko u” tiah an leh hna.
24 Cucaah a mit a rak cawmi pa kha a voihnihnak an auh ṭhan i “Pathian hmaiah a hmaan ning tein chim. Mah pa hi misual a si ti kha kan hngalh” tiah an ti.
25 Anih nih “Misual a si le si lo cu ka hngal lo. Ka hngalhmi cu hlanah ka mit a rak caw, asinain atu cu khua ka hmu kho” tiah a leh hna.
26 Annih nih “Zeitindah aan tuah? Na mit khua a hmuh ṭhan nakhnga zeitindah a tuah?” tiah an hal.
27 “Kaan chimh cang ko hna cu ta, nan ngaih duh ṭung lo. Zeicah theih ṭhan cu nan duh? A zultu si maw nan duh ve?” tiah a leh hna.
28 Mah tikah an nihsawh i “Nangmah pei mah pa zultu cu na si ko cu, kannih cu Moses zultu kan si.
29 Pathian nih Moses sinah bia a chim ti cu kan hngalh, asinain mah pa hi cu khoika in dah a rat ti hmanh kan hngal lo” tiah an ti.
30 Anih nih “Ka mit khua hmuh awkah a ka tuahpiak ko nain khoika in dah a rat ti nan hngalh lomi cu khuaruahhar taktak a si.
31 Pathian nih misual mi hna bia cu a ngaihpiak hna lo, asinain Pathian a ṭih i a duhnak a tuahmi hna bia tu cu a ngaihpiak hna ti kha kan hngalh ko.
32 Pakhatkhat nih a chuahka in a mit a cawmi kha khua a hmuhter ti cu theih a si bal lo.
33 Mah pa hi Pathian sinin a rami a si lo ahcun zeihmanh a tuah kho lai lo” tiah a ti.
34 “Na chuahka in sualnak in a khatmi nangmah nih maw na hei kan cawnpiak?” tiah an ti i leng ah an ṭhawl!*
35 Jesuh nih an ṭhawl ti kha a theih, cun mah pa kha a hmuh tikah “Mi Fapa kha na zum maw?” tiah a hal.
36 Mah pa nih “Bawipa, mi Fapa cu ahodah a si? Amah cu ka zumh khawh nakhnga ka chim tuah” tiah a leh.
37 Jesuh nih “Amah cu na hmuh bal ko, a tak ti ahcun atu nangmah he bia aa ruahmi hi a si” tiah a ti.
38 Mah tikah “Bawipa, ka zumh” tiah a ti i Jesuh hmaiah a kun.
39 Jesuh nih “Hi vawlei ah ka ratmi cu Pathian nih hi vawlei hi bia a ceih khawh nakhnga caah a si. Mitcaw nih khua an hmuh nakhnga le khua a hmumi hna an mit a cawt nakhnga caah a si” tiah a ti.
40 Cuka ah a ummi Farasi mi hna nih “Kanmah zong mitcaw in maw na kan ruah?” tiah an ti.
41 Jesuh nih “Nannih cu mitcaw rak si u law sualnak nan ngei hnga lo. Asinain ‘Khua kan hmuh’ nan ti caah nan sualnak cu ngaihthiam a si lai lo” tiah a ti hna.
Footnotes
^ Pumhnak inn in an ṭhawlmi a si kho.
