Johan Pahnihnak 1:1-13
1 Kum upa* a simi keimah nih thim a simi nu le a fale sinah cakuat ka rak ṭial. Keimah lawng si loin biatak a hngalmi vialte zong nih kan in dawt hna.
2 Biatak cu kan lungthin chung ah a hmun i zungzal in a hmun lai.
3 Pa Pathian le Pathian Fapa Jesuh Khrih nih velngeihnak, zaangfahnak le daihnak an kan pek lai. Cun biatak kha an kan cawnpiak lai i dawtnak an langhter lai.
4 Pa sinin kan hmuhmi nawlbia ning in na fale cheukhat nih biatak lam an zulhmi kha ka hmuh caah kaa lawm tuk.
5 Thim a simi nu, pakhat le pakhat i daw u tiah nawl kaan duh. (Atu ka ṭialmi hi nawlbia thar kong si loin a hramthawk tein kan rak hmuh cangmi nawlbia kha a si.)
6 Dawtnak timi cu a nawlbia zulh kha a si. Mah nawlbia cu a hramthawk tein nan rak theih cangmi, dawtnak langhter peng u timi kha a si.
7 Hi vawlei ah hlengtu tampi an chuak cang. Annih nih Jesuh Khrih cu minung pakhat in a ra ti kha an cohlang lo. Annih cu hlengtu le Khrih ralchanhtu* an si.
8 Cucaah nan sinah fakpi in rian kan ṭuanmi cu a lak a si sual nakhnga lo le laksawng tling tein nan hmuh nakhnga nanmahle nanmah i ralring u.
9 Khrih cawnpiaknak zul loin a kong dang a cawnpiaktu cu Pathian mithmai ṭha an hmu lai lo. Khrih cawnpiaknak a zul pengmi cu Pa le Fapa mithmai ṭha an hmu lai.
10 Khrih cawnpiaknak ning in mi a cawnpiak lomi pakhatkhat nan sin a rat ahcun nan inn ah rak cohlang hlah u law rak chawnbia hlah u.
11 A chawnbiami cu a ṭhalomi a tuahsernak aa hrawmmi a si.
12 Nan sinah caṭial ding tampi ka ngei ko nain catlap le cahang in cun ṭial ka duh lo. Nan sin ka rat tikah hmaitonh in bia kan i ruah te lai tiah kaa ruahchan. Cuticun nan i lawmhnak cu a tling kho lai.
13 Thim a simi, na unu fale nih na kut an in tlaih.
