Peter Pakhatnak 5:1-14
5 Kei cu Khrihfa upa ka si ve i Khrih nih sifah harnak a inmi a hmutu le langhter dingmi sunparnak aa hrawmtu ding ka si bantuk in nan lak i Khrihfa upa hna kha nawl ka duh hna:
2 Pek nan simi Pathian tuurun kha khal hna u, Khrihfabu zohkhenhtu in rian ṭuan u. Hnekchom in si loin Pathian hmaiah lungtho tein ṭuan u; a miak hmuh duh ah si loin lungtak tein ṭuan u.
3 Pathian ta a simi hna kha a uk in uk loin tuurun caah zohchunh awk ṭha tu si u.
4 Cuticun tuukhal bawi a langh tikah a ziam kho lomi sunparnak bawiluchin kha nan hmuh lai.
5 Cu bantuk in nannih mino hna zong kum upa a simi hna* tang ah i dor u. Nan dihlak in pakhat le pakhat toidornak he i pehtlai u.* Zeicahtiah Pathian nih aa porhlawmi cu a doh hna, asinain aa toidormi cu vel a ngeih hna.
6 Cucaah a ṭhawngmi Pathian kut tang ah toidor tein um u. Cuticun a caan a phanh tikah aan hlorh te hna lai.
7 Nan zawn aan ruah hna caah nan lungretheihnak vialte cu amah cung ah chia dih ko u.
8 Fimhring tein um u, ralring tein um u. Nan ral Satan cu a hukmi chiandeih bantuk in mi pakhatkhat kha seh awk kawl in a vak cuahmah ko.
9 Asinain a fekmi zumhnak he amah cu do u. Zeicahtiah vawleicung khuazakip ah a ummi nan unau rual hna zong nih nanmah bantuk in sifah harnak an in ve ti kha nan hngalh.
10 Caan tlawmpal chung sifah harnak nan in hnuah velngeihnak in a khatmi Pathian thengte nih tling tein aan cawnpiak hna lai. Khrih he lungthin khat tein a ummi in zungzal sunparnak hmuh awkah aan auh hna. Pathian nih aan fehter hna lai, aan ṭhawnter hna lai i fek tein hram aan bunh hna lai.
11 Pathian ṭhawnnak cu zungzal in hmun ko seh. Amen.
12 Pathian velngeihnak cu a hmaanmi a si taktak ti kha biatak tein tehte khaan awk le nanmah thazaang pek awkah zumhfekmi unaupa Silvanas* bawmhnak thawng in nan sinah cakuat tawite ka rak ṭial. Pathian vel kha fek tein i tlaih u.
13 Nanmah bantuk in thim a si vemi, Babilon ah a ummi nu* le ka fapa Marka nih nan kut an in tlaih hna.
14 Pakhat le pakhat dawtnak in i hnam u law i chawnbia u.
Khrih he lungthin khat tein a ummi nan dihlak cung ah daihnak um ko seh.
