Korin Pakhatnak 3:1-23
3 Unau hna, nan sin i bia ka chim tikah thiang thlarau lamhruainak a zulmi hna sin biachim bantuk in ka chim kho lo. Pumsa duhnak a zulmi, Khrih ah bawhte a simi hna sin biachim bantuk in ka chim.
2 Nannih cu rawl hak nan ei khawh rih lo caah hnuk in kaan cawm hna. Atu tiang hmanh rawl hak nan ei kho rih lo.
3 Zeicahtiah pumsa duhnak kha nan zulh peng rih. Cucaah nan lakah nahchuahnak le i siknak hna a ummi a si. Mah cu pumsa duhnak nan zulhmi le vawlei mi hna bantuk in nan nunmi a si ko lo maw?
4 Pakhat nih “Kei cu Paul zultu ka si,” a dang pakhat nih “Kei cu Apollo zultu ka si” tiah nan timi hi vawlei mi hna bantuk in nan nunmi a si ko lo maw?
5 Cu a si ah Apollo cu ahodah a si? Paul cu ahodah a si? Kannih cu Pathian sal, Bawipa nih a kan pekmi rian a ṭuan i zumtu nan hung si nakhnga a bawmtu menmen pei kan si ko cu.
6 Kei nih a ci ka tuh, Apollo nih ti a toih, asinain a ṭhantertu cu Pathian a si.
7 A tuhtu le ti a toihtu cu biapi an si ṭung lo, a kung a ṭhantertu Pathian pei a biapimi a si cu.
8 A tuhtu le ti a toihtu cu an i tinhmi aa khat ko, asinain pakhat cio nih an ṭuan ning cio in laksawng an hmuh ko lai.
9 Kannih cu Pathian rianṭuanṭi hawi kan si. Nannih cu Pathian cinthlakmi lo nan si, Pathian sakmi inn zong nan si.
10 Pathian nih a ka pekmi a vel thawng in zungthiam ngaimi innsatu bantuk in a hram kha ka dirh, cu cung ah cun a dang pakhat nih a sak. Asinain a satu paoh nih an sak ning kha i ralring ko hna seh.
11 Jesuh Khrih in dirhmi a hram dah ti lo cun ahohmanh nih a dang a hram an dirh kho lo.
12 Mah a hram cung ah ahopaoh nih sui, ngun, lungvar mansung, thing, di le capawl in an sak khawh.
13 Asinain pakhat cio nih an sak ning cu hneksaknak ni ah a lang te lai. An sak ning cu zeidah a lawh ti kha mah ni ah mei nih a langhter lai.
14 Mi pakhat nih a hram dirh cangmi cung ah a sakmi cu mei nih a hrawh khawh lo ahcun cu pa cu laksawng a hmu lai.
15 A sakmi cu mei nih a kangh ahcun a sung ko lai, amah tu cu khamh a si lai; asinain mei chung in a luatmi bantuk in khamh a si lai.
16 Nannih cu Pathian biakinn nan si i nan chung ah Pathian thlarau a um ti kha nan hngal lo maw?
17 Ahohmanh nih Pathian biakinn kha a hrawh ahcun cu pa cu Pathian nih a hrawh ko lai. Zeicahtiah Pathian biakinn cu a thiang i nannih cu mah biakinn kha nan si.
18 Ahohmanh amahle amah i hleng hlah seh: Nan lakah pakhatkhat nih hi vawlei* ah mifim in aa ruah ahcun mifim taktak a si khawh nakhnga mihrut ah i cang seh.
19 Zeicahtiah hi vawlei fimnak cu Pathian hmaiah cun hruh a si, “Pathian nih mifim hna cu an zernak lila ah khan a foihter hna” tiah cathiang ah aa ṭial.
20 Cun “Jehovah* nih mifim mi hna ruahnak cu pakpalawng a si ti kha a hngalh” ti zong in aa ṭial.
21 Cucaah ahohmanh minung tuah khawhmi kong ah i porhlaw hlah u; zeicahtiah zeizong vialte cu nanmah ta a si.
22 Paul siseh, Apollo siseh, Sefas* siseh, vawlei siseh, nunnak siseh, thihnak siseh, atu thil siseh, hmailei thil siseh, zeizong vialte cu nanmah ta a si.
23 Nannih cu Khrih ta nan si i Khrih cu Pathian ta a si.
