Usolwelo wa Yesu Kristu Alwezele Kuli Yoano 7:1-17
7 Kulutwe lia chino, namwene angelo awana kanamana ku mbango jiwana ja hashi, kanakwata ni tachi fuji jiwana ja hashi, hanga fuji niyimwe kuyichi kalamba hashi, chipwe ha kalunga-lwiji, chipwe ha mutondo niumwe.
2 Namwene mungelo mukwo kanazezuka ku chivumbuko, kali ni chijikilo cha Zambi ya mwono. Iye wakololokele ni liji linene kuli angelo awana waze aahele chiyulo cha kupinjisa hashi ni kalunga-lwiji,
3 ngwenyi: “Kanda nupinjisa hashi, chipwe kalunga-lwiji, chipwe mitondo, ndo muze hitwasa yijikilo ha mahuma ja ndungo ja Zambi yetu.”
4 Mba nevwile unji wa waze asele chijikilo apwile, 144,000, aajikile a ku minyachi yeswe ya ana ja Izalele:
5 A ku munyachi wa Yunda, ajikile 12,000;a ku munyachi wa Rupene, 12,000;a ku munyachi wa Ngate, 12,000;
6 a ku munyachi wa Ashe, 12,000;a ku munyachi wa Napatali, 12,000;a ku munyachi wa Manase, 12,000;
7 a ku munyachi wa Simeone, 12,000;a ku munyachi wa Levi, 12,000;a ku munyachi wa Yisaka, 12,000;
8 a ku munyachi wa Zapulone, 12,000;a ku munyachi wa Yosefwe, 12,000;a ku munyachi wa Mbenjamine, 12,000, aajikile ni chijikilo.
9 Kulutwe lia yino yuma, namwene mbunga yinene yize niumwe mahasa kwalula, a ku mavungu eswe, a ku minyachi yeswe, a ku yifuchi yeswe, a ku malimi eswe, kanamana kulutwe lia ngunja ni kumeso ja Mwana-panga, kanazala mazalo asuku atoma ni mafwo a mingaji ku moko jo.
10 O yakololoka ni liji linene ngwo: “Ulamwino wetu wakukatuka kuli Zambi, yoze unatwama ha ngunja, ni kuli Mwana-panga.”
11 Angelo eswe amanyine ha kujingilika ngunja, ni makulwana ni yitangiwa yiwana ya mwono. Yaafulamana kulutwe lia ngunja, yawayila Zambi,
12 ni kwamba ngwo: “Amene! Uhaliso, ni uhenya, ni mana, ni usakwililo, ni ulemu, ni ndundo, ni ngolo, yikapwe kuli Zambi yetu ndo ku miaka ya mutolo. Amene.”
13 Mba umwe wa kuli makulwana wambile kuli yami ngwenyi: “Wano aya anazala mazalo asuku atoma, kulihi anakatuka?”
14 Hazehene nambile kuli iye ngwami: “Mwene wami, yena unanyingika.” Iye yamba kuli yami ngwenyi: “Wano kali waze anatuhuka mu luyinda munene. O hanakoso mazalo jo asuku ni kwatomesa mu manyinga ja Mwana-panga.
15 Kashika ali kulutwe lia ngunja ya Zambi ni kumulingila mwalwa ni ufuku mu tembele yenyi. Yoze unatwama ha ngunja, makazazulula mbalaka yenyi hali ayo.
16 O kechi kevwa nawa zala, chipwe pwila. Tangwa kulichi kasasaminya hali ayo chipwe kwivwa chivukuminya chinji,
17 mumu Mwana-panga yoze uli mukachi ka ngunja, kumapwa kafunga ko ni kwasongwela ku mafuji a meya a mwono. Zambi makakusumuna masoji eswe ku meso jo.”
