Obadia 1:1-21
1 Usolwelo wa Obadia:*
Mwene Yehova kanambe hakutwala ku Endome ngwenyi:
“Tweva umwe lusango unakatuka kuli Yehova ngwo,Hatuma umwe mukeji hanga alweze akwa-mavungu ngwo:
‘Katukenu, tuliluliekenu hanga twase nenyi jita.’”
2 “Tala! Yami hinakupwisa wamokomoko hakachi ka mavungu,Yena hiwapwa wamokomoko.
3 Yena watwama mu liwe,Yena watwama mwilu, wakwamba ngwe:‘Iya mahasa kungusunwisa angunehe hashi?’Kulizata cha ku mbunge ye hichakwonga.
4 Chipwe mutwama mwilu ngwe pupa,Hanji ni kusa chaswa che hakachi ka tutongonoshi,Yami mungukusunwisa,” chocho anambe Yehova.
5 “Nyi eji meza kuli yena, meza kuli yena ufuku,(Ngwami makunongesa mweswe!)
Shina kechi kwiya yeswayo mazanga?
Hanji nyi akwa-kuhela uva meza kuli yena,Shina kechi kuhichika ndambu ya uva yakuhuhujola?
6 Yawana yikumba yeswe ya Esau,
Niumwe upite wa kusweka uze wasalileho wakuhi!
7 Hanakuhange ndo ku njiza ya chifuchi.
Masepa* je eswe hakwonga.
Atu eswe waze apwile ni sambukila ni yena, hakukumba.
Waze akulia mbolo ni yena hakutela muheto hanga akukwate,Alioze yena, kuchi kachinyingika.
8 Yehova kanambe ngwenyi:“Ha tangwa lize, shina chichi kwonwona akwa-mana a mu Endome,Ni malinjekela a mu chifuchi cha ku milundu cha Esau?
9 Yena Temane, tujita twe makeva woma unji,Mumu makashiha umwe ni umwe wa kuli ayo mu chifuchi cha ku milundu cha Esau.
10 Yena mukeva sonyiMumu lia upupilo uze walingile kuli mwana-kwenu Yakomba,Mukatoka ku miaka yeswe.
11 Ha tangwa lize yena wamanyine wika ni kutala,Ha tangwa lize yilambala atwalile mu ufunge tujita twa Yakomba,Muze yilambala anjilile mu chikolo chenyi ni kutela Yerusaleme chela,Yena wembulwile yitanga yo.
12 Yena te kuwatambile kuwahilila ha tangwa lia lamba lia mwana-kwenu,Yena te kuwatambile kuwahilila ha tangwa lize anongesene A-Yunda,Te kuwatambile kuhanjika ni kulizelula ha tangwa lia lamba lio.
13 Yena te kuwatambile kunjila mu chikolo cha atu jami ha tangwa lize lamba liawanyine,Te kuwatambile kuwahilila ni lamba lia atu jami ha tangwa lia luyinda wo,Te kuwatambile kutambula upite wo ha tangwa lize lamba liawanyine.
14 Yena te kuwatambile kumana ha makano ja matapalo hanga ushihe waze te anachina,Te kuwatambile kukunjika masalila ha tangwa lia lamba.
15 Mumu tangwa lia Yehova linakundama hanga alimike ni mavungu eswe.
Chizechene walingile kuli akwenu, ni yena che makakulinga.
Yize walingile kuli akwenu, muyikafuna ha mutwe we.
16 Chizechene ngwe yena wanwine vinyu ha mulundu wami usandu,Ni mavungu eswe no makanwa utenu wami ngwe vinyu.
Makaunwa ni kuuminya,Makanonga ni kwavulama.
17 Alioze ha Mulundu wa Zaione muhakapwa waze makalilamwina,Mulundu wacho muukapwa usandu:Akwa-zuwo lia Yakomba makatambula cheka yikumba yo.
18 Zuwo lia Yakomba mulikapwa kahia,Zuwo lia Yosefwe mulikapwa mulengi wa kahia,Zuwo lia Esau mulikapwa mwambu,Ayo makalikwachisa kahia ni kuliocha,Niumwe makasala ni mwono ku zuwo lia Esau wakuhi,Mumu mwene Yehova hanachambe.
19 Ayo makatambula Nengeve, chifuchi cha ku milundu cha Esau,Shefela ni chifuchi cha A-Filistea.
Makatambula chifuchi cha Eframe ni chifuchi cha Samaria,Mbenjamine makatambula Ngiliate.
20 Atu a ku mulundu, waze apwile funge,Chekwamba, A-Izalele, makatwama mu chifuchi cha A-Kanana ndo ku Zarafata.
Funge a ku Yerusaleme waze apwile ku Shefarade makatwama mu mambonge ja mu Nengeve.
21 Akwa-kulamwina makakanduka ku Mulundu wa ZaioneHanga apatwile chifuchi cha milundu cha Esau,Mba wanangana muukapwa wa Yehova.”
