Habakuke 2:1-20

  • ‘Mungumana ha chihela chami cha kulayila’ (1)

  • Kumbululo lia Yehova kuli profeta (2-​20)

    • ‘Nunga ni kushimbwila umanunuko wa usolwelo’ (3)

    • Akwa-ululi kumakapwa ni mwono mumu lia kushishika cho (4)

    • Lamba litano lize muyikawana A-Kaletea (6-20)

      • Hashi muhakazala too ni chinyingi cha uhenya wa Yehova (14)

2  Mungumana ha chihela chami cha kulayila,Mungumana helu lia chipanga. Mungutala kanawa hanga ngumone yize iye mahanjika kupalikila muli yamiNi yize mungukumbulula muze mangukumika.  2  Mba Yehova yangukumbulula ngwenyi: “Soneka kanawa usolwelo ha mapaya,Hanga yoze makautanga akautange kanawa.  3  Mumu usolwelo muukamanunuka ha shimbu lize hanatese,Songo liawo linakundama kawashi-washi, kuuchi kahona kumanunuka.* Chipwe ngwe muushimbula,* nihindu nunga ni kushimbwila!* Mumu pundu lume muukamanunuka. Kuuchi kalaluka!  4  Tala mutu yoze wakulizata,Katwamine ni ululi. Alioze mukwa-ululi kumakapwa ni mwono mumu lia kushishika chenyi.  5  Kwamba umwenemwene, amu vinyu yakwonga,Mutu yoze wakulizata kechi kamanununa yize atesele. Iye kakuzanga kulia ngwe Fuka,*Keshi kukuta ngwe kufwa. Kananungu ni kukungulula mavungu esweKananungu ni kulikungulwila atu eswe.  6  Atu eswe makamutela chishima, kumusendemeka ni kumuvuluka mu yijimbikilo. Ayo yamba ngwo: ‘Lamba kuli waze akukunga yuma yambala,Ndo tangwa lika?Ni kuweza nawa chinji makongo jo!  7  Akwa-kukwaha makongo makakatuka, Ayo makahinduka ni kukukolesa woma unji,Kashika mukapwa upite uze makapupa.  8  Amu yena wapupile mavungu anji,Atu eswe waze asala no makakupupa,Mumu yena wamwangine manyinga ja atuYiulinga yuma yipi hashi,Mu mambonge ni kuli atu jamo.  9  Lamba kuli yoze wakuwanyina yuma akwa-zuwo lienyi mu jila yipi,Hanga ase chaswa chenyi kwilu,Achine kumona lamba! 10  Wakolesa sonyi akwa-zuwo lie. Wavulumuna kuli yena mwene ha kunongesa atu anji. 11  Liwe mulikakololoka muchima lia chikalakala,Mukambo ha fulumba muukakumbulula. 12  Lamba kuli yoze wakutunga mbonge ha kumwanga manyinga,Yoze makolesa mbonge ni uhenge! 13  Ngwami Yehova wa tujita mwe watesele hanga atu akalakale chinji alise kahia,Mavungu akalakale chamokomoko? 14  Mumu hashi muhakazala too ni chinyingi cha uhenya wa YehovaNgwe chize meya akuzalisa kalunga-lwiji. 15  Lamba kuli yoze mahana yakunwa kuli masepa jenyi,Yakuchinga ni ufwatulo ni uli, aazengese,Hanga amone uselesele wo! 16  Mukakuta ni sonyi, shimbu ukute ni uhenya. Ni yena nwako hanga usolole ulima we. Shimbu lie mulikaheta lia kunwa ku musenge ku kwoko lia utata lia Yehova,Uhenya we muukazala too ni sonyi. 17  Mumu yuma yize walingile kuli Lebano, muyikakufuka,Ni unongeso uze wapinjishile tushitu, muukeza hali yena,Mumu yena wamwangine manyinga ja atuYiulinga yuma yipi hashi,Mu mambonge ni kuli atu jamo. 18  Ulemu uka tuponya a kwola akwete,Se kaasongele kuli umwe chilangaji? Ulemu uka kaponya wa utale akwete ni longeshi wa mahuza,Chipwe ngwe chilangaji mafuliela muli ayo,Ha kulinga tuzambi amokomoko waze keshi kuhanjika? 19  Lamba kuli yoze mamba ku chipinji cha mutondo ngwenyi: “Laula!” Hanji ku liwe lize kulishi kuhanjika ngwenyi: “Katuka utulongese!” Tala! Ayo kakwakwita oru ni prata,Alioze, katwamine ni mwiku wa mwono. 20  Alioze Yehova kali mu tembele yenyi yisandu. Yenu akwa-hashi heswe holenu kumeso jenyi.’”

Footnotes

^ Hanji “Umanunuko wawo.”
^ Hanji “Chipwe ngwe musoloka ngwe unashimbula.”
^ Hanji “Yishimbwile ni mbunge yeswe.”
^ Chekwamba “Sheole,” muma mwa afu eswe. Tala Glossario.

Ulite wa akwa-kusoneka mukanda uno