Daniele 2:1-49
-
Mwanangana Nabukanezore yalota chilota chakola woma (1-4)
-
Niumwe mukwa-mana kahashile kulumbununa chilota chacho (5-13)
-
Daniele yafupa ukwaso wa Zambi (14-18)
-
Zambi yamuhalisa ha kulumbununa chijimbikilo (19-23)
-
Daniele yalumbunwina mwanangana chilota (24-35)
-
Ulumbunwiso wa chilota (36-45)
-
Liwe lia wanangana mulikafwenyonya kaponya (44, 45)
-
-
Mwanangana yalemesa Daniele (46-49)
2 Ha mwaka wamuchaali wa kuyula chenyi, Nabukanezore yalota yilota yeka ni yeka, yaputuka kupinda chinji te keshi kumona tulo.
2 Chocho, mwanangana yasanyika yimbanda, akwa-kutaha, nganga ni A-Kaletea* hanga alweze mwanangana yilota yenyi. Kashika, ayo yanjila, yaya kuli mwanangana.
3 Mwanangana yamba kuli ayo ngwenyi: “Nalotanga, haliapwila ngunapinji mumu ngunazange kunyingika yize nalotanga.”
4 A-Kaletea yakumbulula mwanangana mu limi lia A-Arame ngwo: “Kula utome, mwanangana! Tulwezenu chilota chenu, mba yetu mutunulumbunwinacho.”
5 Mwanangana yakumbulula A-Kaletea ngwenyi: “Wano e maliji jami a kasula. Nyi kunwangulwezele yize nalotanga ni kungulumbunwina chilota chacho, manuteta-teta yipinji-yipinji, mazuwo jenu maatenga kumba ja mbunga.
6 Alioze, nyi nwangulweza chilota ni ulumbunwiso wacho, mungunwaha yawana, mungunufweta ni kunulemesa chinji. Kashika ngulwezenu chilota ni ulumbunwiso wacho.”
7 Ayo yamba nawa ngwo: “Mwanangana nutulweze chilota, yetu mutunulumbunwinacho.”
8 Mwanangana yamba ngwenyi: “Ngunanyingika ngwami nunafupu mashimbu, mumu nunanyingika ngwenu yize namba, nakasa lume.
9 Nyi kunwangulwezele chilota, yenu eswe mungunumwesa lamba limuwika. Alioze, hinwalitesa hanga nungwonge ni kushimbwila hanga yuma yalumuke. Kashika, ngulwezenu chilota hanga ngupwe ni shindakenyo ngwami munuhasa lume kuchilumbununa.”
10 A-Kaletea yakumbulula mwanangana ngwo: “Kukushi mutu niumwe hano hashi mahasa kulinga yize yenu mwanangana nunechi. Mumu niumwe mwanangana munene, chipwe mukwa-kuyula mweswawo hanechi kama chuma cha mutapu au kuli yimbanda, akwa-kutaha hanji kuli A-Kaletea wakuhi.
11 Chuma chize yenu mwanangana nunechi chikalu chinji. Kukushi niumwe yoze mahasa kuchambulula, shina wika tuzambi waze katwamine mukachi ka atu.”
12 Muze mwanangana achivile, yeva uli unji, yatuma kushiha akwa-mana eswe mu Babilonia.
13 Muze asele shimbi yacho, ni akwa-mana te hi maashiha, Daniele ni masepa jenyi no yaafupa hanga aashihe.
14 Chocho, Daniele yahanjika ni Arioke mwata wa tufunga twa mwanangana yoze te unayi ni kushiha akwa-mana a mu Babilonia. Iye yahanjika nenyi ni mana ni kukanyama.
15 Iye yahula Arioke kapitau wa mwanangana ngwenyi: “Mumu liaka mwanangana asa shimbi yikalu chichize?” Arioke yalumbunwina Daniele chikuma chacho.
16 Chocho, Daniele yaya ni kuhanjika ni mwanangana, yamwita hanga amwehe mashimbu amulumbunwine chilota chenyi.
17 Mba Daniele yaya ku zuwo, yalweza masepa jenyi Hanania, Mishaele ni Azaria yize yalingiwile.
18 Iye yeta hanga ayo alembe kuli Zambi ya mwilu aavile kama keke hakutwala ku chijimbikilo chacho hanga Daniele ni masepa jenyi achine kwashiha hamuwika ni akwa-mana akwo a mu Babilonia.
19 Daniele yamusolwela chijimbikilo chacho kupalikila mu umwe usolwelo ha ufuku. Kashika, Daniele yahalisa Zambi ya mwilu.
20 Daniele yamba ngwenyi:
“Jina lia Zambi lifumane ku miaka yeswe*Mumu iye wika ukwete mana ni ndundo.
21 Iye kakwalumuna mashimbu ni tungonde,Kakuchiza mianangana ni kusa mianangana,Kakuhana mana kuli akwa-mana ni chinyingi kuli waze akwete malinjekela.
22 Iye kakusolola yuma yikalu ni yize yaswamana,Kananyingika yuma yize yatwama mu milima,Kuze atwama iye, kwatwama pangu.
23 Ngunakusakwilila ni kukuhalisa yena Zambi wa tulamba twetu,Mumu wangwaha mana ni ndundo.
Wangusolwela yize twakwichile.Watusolwela chikuma chize chinapinjisa mwanangana.”
24 Daniele yaya kuli Arioke yoze mwanangana atongwele hanga ashihe akwa-mana a mu Babilonia, yamba kuli iye ngwenyi: “Kanda unongesa mukwa-mana niumwe mu Babilonia. Ngutwale kuli mwanangana, yami mungumulumbunwina chilota chenyi.”
25 Arioke yatwala Daniele fuji ni matambu kuli mwanangana, yamba kuli iye ngwenyi: “Mukachi ka funge a mu Yunda nawanamo umwe lunga yoze mahasa kulumbununa chilota cha yenu mwanangana.”
26 Mwanangana yahula Daniele yoze alukile jina lia Belteshazare ngwenyi: “Shina yena muhasa lume kungulweza chilota chami ni ulumbunwiso wacho?”
27 Daniele yakumbulula mwanangana ngwenyi: “Niumwe mukwa-mana, tahi, nganga hanji mukwa-kuhengwola tutongonoshi yoze mahasa kulweza mwanangana chijimbikilo chize anazange kunyingika wakuhi.
28 Alioze mu malilu mwatwama umwe Zambi yoze wakusolola yijimbikilo, kanulweza yenu mwanangana yuma yize muyikalingiwa ku matangwa a kusula. Chilota nwalotanga ni usolwelo uze nwamonanga muze te nuli ha muhela wenu, yili yino:
29 “Muze yenu mwanangana te nuli ha muhela wenu, manyonga jenu yatalikisa ku yuma yize muyikalingiwa kulutwe. Chocho, yoze wakusolola yijimbikilo yanusolwela yize muyikalingiwa.
30 Chijimbikilo chino kangusolwelacho, hi ko mumu ngwo nguli mukwa-mana kuhiana atu akwo. Alioze kwamba umwenemwene kangusolwelacho hanga ngunulumbunwine yenu mwanangana nunyingike manyonga a mu mbunge yenu.
31 “Muze te nunatale, yinumona umwe kaponya munene. Kaponya wacho munene yoze te unahenye chinji, te kali kulutwe lie, kaponya wacho te kanakolesa woma.
32 Mutwe wenyi wapwile wa oru yipema, pambo ni moko yapwile ya prata, jimo ni mashina jenyi a molu kapwile a unengu,
33 molu jenyi kapwile a utale, yiliato yenyi yapwile kanda utale kanda uma.
34 Shimbu te munuchitala, limwe liwe yalipalula ku mulundu, hi ni moko ko, yililamba ku yiliato ya kaponya yize yapwile ya unengu ni utale, yilifwenya yiliato yacho.
35 Henaho utale, uma, unengu, prata ni oru, yayifenyonya kamuwika lume, yiyipwa ngwe yizungu yize yakuhehuka ni fuji ha chizungwilo ha mashimbu a lwiza. Fuji yiyiyihehula, chocho kahashile kuyiwana nikumwe. Alioze, liwe lize lialambile kaponya yilipwa mulundu unene ni kulitanda hashi heswe.
36 “Chino che chilota, haliapwila mutulweza mwanangana ulumbunwiso wacho.
37 Yenu mwanangana, mwanangana wa mianangana, yoze Zambi wa mu malilu ahele wanangana, ndundo, tachi ni uhenya,
38 yena ahele wata helu lia atu eswe waze atwama hashi, ni hali tushitu a mu yambu ni hali tujila a mwilu, yena mwene wami, mwe mutwe wa oru.
39 “Alioze kulutwe, mukukasoloka wanangana ukwo uze kuuchi kapwa ni ndundo ngwe ja yena. Mba mukukasoloka wanangana ukwo wamuchitatu wa unengu, uze muukayula hashi heswe.
40 “Wanangana wamuchiwana muukapwa ukolo ngwe utale. Ngwe chize utale wa kupalwola ni kufwenyonya yuma yikwo yeswe, wanangana uno muukafwenyonya ni kunongesa wano eswe.
41 “Ngwe chize nwamwene, yiliato ni minwe yapwile kanda uma wa tengi kanda utale; wanangana muukaliteta. Alioze muukakola ndambu ngwe utale, mumu ngwe chize nwamwene, utale te uli wakuchinga ni uma ulelu.
42 Ngwe chize minwe ya ku molu yapwile kanda ya utale kanda ya uma, wanangana newo muukapwa kanda ukolo kanda ulelu.
43 Ngwe chize nwamwene utale wakuchinga ni uma ulelu, ayo makalichinga ni atu, alioze kechi kalinunga hamuwika ngwe chize utale kuuchi kulichinga ni uma.
44 “Ha matangwa ja mianangana wano, Zambi wa mwilu makakolesa umwe wanangana uze kechi keza kanongesa. Wanangana uno kechi kauhana kuli atu eka. Muukafwenya ni kunongesa mawanangana wano eswe, wene muukanunga ku miaka yeswe,
45 ngwe chizechene nwamwene liwe lize apatwile ku mulundu, hi ni moko ko, lize liafwenyene utale, unengu, uma, prata ni oru. Zambi munene kasolwela mwanangana yuma yize muyikalingiwa kulutwe lia matangwa. Chilota chili chamwenemwene, ulumbunwiso wacho watela ujikijilo.”
46 Chocho mwanangana Nabukanezore yafulamana hashi kumeso ja Daniele, yamulemesa. Yatuma hanga amwehe yawana ni insensu.
47 Mwanangana yamba kuli Daniele ngwenyi: “Kwamba umwenemwene, Zambi yenu kali Zambi wa tuzambi, Mwene wa mianangana, Mukwa-Kusolola yijimbikilo, mumu yena wahasa kulumbununa chijimbikilo chino.”
48 Chocho mwanangana yanangamisa Daniele, yamwaha yawana yinji ya ndando, yamupwisa nguvulu wa mu mbonge yeswe ya Babilonia ni kumutongola hanga apwe kasongo ka akwa-mana eswe a mu Babilonia.
49 Daniele yeta kuli mwanangana, chocho mwanangana yatongola Shadrake, Meshake ni Abedenego hanga asongwele yuma mu mbonge ya Babilonia, alioze Daniele te kakukalakala ku zuwo lia mwanangana.
