Melu awôm éyoñe Yésus a keya yôp, mbamba nsisim beyé’é be nga bi môse Pentecôte a mbe ndem é mbe é liti fo’o na, a nto yôp. Ve ndem éfe é mbe é yiane beta yené. Ôsusua na ba lume ñyé’é Étienne mekok a wôé nye amu nkañete a nga bo, a nga kobô a jô’ô na: “Tameka yenan, me lô yôp e kanda’an, a Mone môt a tele mbo nnôme Zambe.”​—Mam Minlôman 7:56.

Nté a mbe yôp a Ésa wé, a mbe a yange’e ngume jam éziñ Kalate Zambe a nga kobô. David a nga tili a zene ya mbamba nsisim na: “Yéhôva a jô Tate [Yésus] wome na, Tabe’e mbo nnôme wom, akekui m’abo besiñe bôé étele mebo jôé.” (Besam 110:1, 2) Mvuse ya valé, Yésus a nga ye ‘jô’ô zañe besiñe bé.’ Ve nté a mbe yôp, jé nje te a nga ye bo ôsusua na a jiane besiñe bé?

Akônda Bekristen da te teléban e Pentecôte ya mbu 33 É.J. Yésus a te taté na a jôé Bekristen be ne miñwo’one nsisim a to yôp. (Becolossien 1:13) A te wulu ésaé nkañete a kômesane fe be asu mimbe’e mia yange be. Mimbe’e mivé? Ba ba ye wulu ba’aba’a akekui awu, ba ye wômô a ke jôé a Krist Éjôé Zambe.

Mbamba éve’ela ya môt a nga bo njôô a ne Saul, nye ate bia dañe yem éyôlé na Paul, éyôlé Beromain. A mbe mone Bejuif a to ayo’o mfa’a ya Atiñe Zambe, ve betebe ôsu ya ñyebe be nga dimine ye’ele nye aval é ne na, a nga kui na a kañese na be wôé Étienne. Mvuse ya valé, mbôl a mbe a “ngenan ayo’o nlem, a kômbô wôé beyé’é be Tate,” Paul a nga ke Damas. Beta Prêtre Caïphe a nga ve nye ngule ya ke bi beyé’é be Yésus a zu be Jérusalem. (Mam Minlôman 7:58; 9:1) Ve da, nté Saul a mbe zen, ngul éfufup é nga bibi nye, nde a nga ku si.

Ane tyiñ é nga loone nye é jô’ô na: “A Saul, a Saul, wo akpwe’ele me amu jé?” Saul ve sili na: “Ô ne za, A Tat?” Nye na: “Me ne Yésus wo akpwe’ele.”​—Mam Minlôman 9:4, 5.

Yésus a te jô Saul na a nyiine Damas, a na a yange mam a ye kate nye na a bo. Ve ba  yiane ke litane nye amu, éfufup ja te kui a bibi nye ja te bo na a ku ndim. E biyeyem été, Yésus a nga yené e be ñyé’é wé wua a to jôé na Ananias, a mbe a to Damas. Yésus a nga kate Ananias na a ke vôm a ne koone Saul. Ananias a mbe a ko woñe ya bo de, ve Yésus a nga bôé nye nlem si a jô nye na: “A ne mbo ésaé me nga top, a ye kate jôé dam bôt be ne te yeme Zambe, a bejô bôt, a bôte ya Israël.” Ane Saul a nga taté na a beta yen; a e Damas valé, “a nga ji’a kañete bôt menda me Zambe été na, Yésus a ne Mone Zambe.”​—Mam Minlôman 9:15, 20.

A mvolane Yésus, Paul a bekañete bevok ba te ke ésaé nkañete ôsu, ji Yésus a nga taté. Zambe a nga botane be a be nga wum abui bibuma. Bebé mimbu 25, mvuse ya na Yésus a nga yené be Paul e zene ja ke Damas, Paul a nga tili na, mbamba foé a mbe a ‘katebaneya vôme mintéane mi biôm bise mi ne yôpe si.’​—Becolossien 1:23.

Mvuse abui mimbu, Yésus a nga liti nlômane wé a dañe nye’e, Jean, miñyenane bia koone mie kalate Nlitan. A zene ya miñyenane mite, a mbe v’ane Jean a nga nyiñ akekui éyoñe Yésus a nyoñ éto Njôô. (Jean 21:22) “Me [Jean] nga to nsisim été môse ya Tate.” (Nlitan 1:10) Môs ôte ô nga ye kui éyoñ évé?

Éyoñe bia kôme fase minkulane mejô ya Kalate Zambe, bia koene na, “môse Tate” ô nga taté zia melu jangan. Mbu 1914, Beta bita bi ôsu bi nga taté. Bita, akon, bemfumbale ya zaé, mimfô’ôsane mi si, a bibubua bife bi nga kui mvuse ya valé, bi ne “ndeme” Yésus a nga ve minlômane mié a lat a éyoñ a ye taté na ‘a jôé,’ a “asu’ulane ya si nyô.” (Matthieu 24:3, 7, 8, 14) Den, be nji kañete mbamba foé ya Éjôé Zambe fo’o ve si ya Rome, ve si ése.

A zene ya mbamba nsisim, Jean a nga ve atinane ya mam mete a jô’ô na: “Éyoñe ji nyian ôte ô soya, a ngul, a [Éjôé] ya Zambe wongan, a njôane ya Krist wé.” (Nlitan 12:10) Ôwé, Éjôé Zambe Yésus a nga jaé kañete, é tebeya fo’o!

A ne fo’o mbamba foé asu beyé’é be Yésus bese ba wulu ba’aba’a a nye. Mejô me Jean ma me ne ngule ya nambe be: “Ajô te, A yôp ese, va’ak, a mia bôt mi to de été. Angônda jam mfa’a ya si a mfa’a ya mañ: amu diable a maneya sise si a zu be mia, a bili beta ayaa, a yeme na, a bili ve ôyôm nté.”​—Nlitan 12:12.

Nde, Yésus a nji beta yange mbo nnôm Ésa wé. A tatéya na a jôé, a ana’ana a mbeme zu jiane besiñe bé bese. (Behébreu 10:12, 13) Nde ñhe, beta be mam mevé ba yange bia ôsu?