Kele vôm ô ne lañe de

Kele sous-menu

Kele tep

Bengaa be Yéhôva

Bulu

Kalate Zambe—Foé jé é ne aya?

 ÉFAS 22

Minlômane mi a kañete teke ko woñ

Minlômane mi a kañete teke ko woñ

Akônda bekristene de a nañ avôl akusa bo ékpwe’ele

MELU awôm mvuse ya éyoñe Yésus a nga bete yôp été, beye’e bé 120 be nga sulane Jérusalem môse ya Abôk ya Pentecôte Bejuif, mbu 33 É.J. Atemeteme na éduñ é nga wô’ôtan ane évuñelu a jalé nda ése. Ane beyé’é be nga taté na b’akobô abui minkobô mife. Jé nje é nga bo na jamete é boban? Zambe a nga ve beyé’é mbamba nsisime wé.

Nseñ ô mbe njalan a nsamba bôte be nga so minlam abui asu abôk. Eyoñe be nga yene beyé’é be Yésus be kobô’ô minkobô miaba teke kop, ane be nga kame jamete! Nde Pierre a nga liti amu jé b’akobô abui minkobô. A nga liti na nkulane mejô ya Joël, nkuli mejô a nga kate na Zambe aye “sôé” nsisim wé a zene ya asimba. (Joël 2:28, 29) Beta ngule mveane ya mbamba nsisim ate a nga liti tyi’ibi na beta ntyendan a nga boban: Zambe a nga lume bone be Israël mvus. Nde a nga taté na a belane mfefé akônda bekristen. Bôte bese be nga yi na b’awulu avale Zambe a kañese be nga yiane tôñe bibô’a mebo bi Krist.

Nde ékpwe’ele é nga nenenen, a besiñe bap be nga futi be mimbôk. Ve alu, éngele Yéhova a nga zu kuli beyé’é nseñ na be ke ôsu a kañete. Tyé kpwa, be nga ke kañete temple été a taté na b’ aye’ele ajô ya mbamba foé Yésus. Betebe ôsu ya menda me Zambe be nga wô’ô jamete angôndô ya abé, nde be nga jô be na be jô’é nkañetane. Beyé’é be Yésus bese be nga yalane a nleme wua na: “Bi ayiane dañe wô’ô Zambe.”​—Mam minlôman 5:28, 29.

Ékpwe’ele é nga tu’a beta nen. Bejuif be nga bôté Etienne ajô na a biaséya Zambe. Nde be nga lume nye mekok akekui awu. Mone ndôman​—Saul ya Tars—​ea nga kañese na Etienne a yiane awu. Nde a nga ke Damas na a mane ke bi môt ase ane mbuni Krist. Éyoñe Saul a nga ke zene ya Damas, atemeteme na beta éfufup a nga faé vôm a nga be atele éso’o yôp. Ane tyiñ é nga so yôp é jô’ô na: “A Saul a Saul wo a kpwe’ele me a jé?” Éyoñe Saul a kuya ndim amu beta éfufup ate, ane a nga sili na: “Ô ne za a Tat?” Nde tyiñ é nga yalane é jô’ô na: “me ne Yésus wo a kpwe’ele.”​—Mam minlôman 9:3-5.

Mvuse melu mela, ane Yésus a nga lôme Ananias a ke saé Saul ndim. Mvuse ya été nde Saul a nga duban, été été nde fe a nga taté na a kañete ajô Yésus. Saul a nga su’ulane yôbane mvuse na nlômane Paul. A nga be ayôñe mfa’a ya kate mbamba foé akônda bekristene ya ntete mimbu ôsusua.

Beyé’é be Yésus be nga taté na be a kate mbamba foé ya Éjôé Zambe fo’o ve be Bejuif a Besamaritain. Ane éngele Zambe a nga ke yene Corneille, mone bezimbi a mbe Romain. A nga to a ko’o Zambe woñ. Éngele a nga jô nye na nlômane Pierre wo ye zu jome nye. Ane Pierre a beyé’é befe be nga zu kañete Corneille a nda bôte jé. Eyoñe Pierre a nga mane kobô, ane mbamba nsisim a nga suane be be, amu be nga buni, ja’ane be nji be bejuif. Ane Pierre a nga dube be a jôé Yésus. Ataté éyoñe te, zene ya ényiñe ya melu mese é nga yombô be bôte ya meyoñe mese. Bekristene ya akônda be nga to fili ya kañete bôte mbamba foé vôm ase.

—Nkañete ôte wo so kalate Mam minlôman 1:1-11:21.