KALANSEN 2
Ala ye jɔni ye?
1. Mun na an ka kan ka Ala bato?
Ala sɛbɛ de ye fɛn bɛɛ dabaga ye. Daminɛ tɛ a la wa laban fana tɛ a la. (Zaburu 90:2) Kibaru duman min bɛ sɔrɔ Bibulu kɔnɔ, o bɔra ale de yɔrɔ. (1 Timote 1:11) An ka kan ka Ala kelenpe dɔrɔn de bato, ka d’a kan ale de ye ɲɛnamaya di an ma.—Jirali 4:11 kalan.
2. Ala bɛ cogo di?
Mɔgɔ si ma deli ka Ala ye ka d’a kan hakilimaa don, o kɔrɔ ye ko ɲɛnamaya sugu dɔ don min barika ka bon, ka tɛmɛ danfɛn tɔw ta kan minnu bɛ ɲɛnamaya la dugukolo kan. (Yuhana 1:18; Zaburu 11:4) O n’a ta bɛɛ, an bɛ se ka Ala kɛcogow dɔn, a ka fɛn danenw fɛ. O la, jiriden ani filɛru suguya caman minnu bɛ yen, o bɛ Ala ka kanuya ni a ka hakilitigiya de jira an na. Sankolola fɛnw sigicogo b’a ka sebaaya de jira an na.—Romɛkaw 1:20 kalan.
An bɛ se ka fɛn caman wɛrɛ dɔn Ala kɛ cogoya kan, an kɛtɔ ka Bibulu kalan. Misali la, a b’a jira an na min ka di Ala ye ani min man di a ye, a bɛ mɔgɔw minɛ cogo min na, ani a bɛ kow kɛ cogoya min na ka kɛɲɛ ni kow taa bolo ye.—Zaburu 103:7-10 kalan.
3. Yala tɔgɔ bɛ Ala la wa?
Yesu ko: “An Fa min bɛ sankolo la, i tɔgɔ ka saniya.” (Matiyu 6:9). K’a sɔrɔ mankutu caman bɛ Ala la, tɔgɔ kelenpe de b’a la. Ka kɛɲɛ ni kan bɛɛ ye, o tɔgɔ fɔcogo tɛ kelen ye. A bɛ wele bamanankan na tuma caman ko: “Jehova”. Nka mɔgɔ dɔw fana bɛ a wele ko “Yahweh”.—Zaburu 83:19, BS kalan.
Ala tɔgɔ bɔra Bibulu caman kɔnɔ k’a falen ni mankutuw ye i n’a fɔ Matigi walima Ala. Nka Bibulu sɛbɛnna tuma min na, Ala tɔgɔ tun bɛ a kɔnɔ fɔ siɲɛ 7 000 ɲɔgɔnna. Yesu kɛtɔ ka mɔgɔw kalan, a ye Ala tɔgɔ jira u la.—Yuhana 17:26 kalan.
Wideyo lajɛ min tɔgɔ ye ko Yala tɔgɔ bɛ Ala la wa?
4. Yala Jehova bɛ a janto an na wa?
I n’a fɔ Fa kanuya bɛ min na, Ala bɛ wale kɛ walasa an ka hɛrɛ kuntaala jan sɔrɔ.
Yala tɔɔrɔ cayali bɛ a jira ko Jehova ye Ala ye min tɛ a janto an na wa? Mɔgɔ caman b’a fɔ ko, a bɛ tɔɔrɔ lase an ma walasa ka an kɔrɔbɔ, nka o tɛ tiɲɛ ye.—Yakuba 1:13 kalan.
Ka se ka kow sugandi i yɛrɛ ye, Ala bɛ bonya da o kan. K’a bɔ an yɛrɛ la ka sugandili kɛ ka baara kɛ Ala ye, yala o tɛ ko ɲuman ye wa? (Josue 24:15) Nka mɔgɔ caman bɛ a bɔ u yɛrɛ la ka kojugu kɛ u mɔgɔ ɲɔgɔnw na, o min bɛna ni tɔɔrɔ cayali ye. O tilenbaliya sugu yeli bɛ Jehova ɲɛnasisi.—Jenɛse 6:5, 6 kalan.
Jehova ye Ala ye min b’a janto an na. A b’a fɛ an ka ɲɛnamaya diyabɔ. Sɔɔni a bɛna tɔɔrɔ kow ban ani fɛn minnu bɛ tɔɔrɔ lase an ma. Yanni o cɛ, kun jɔnjɔn bɛ a bolo k’a to tɔɔrɔ ka kɛ waati dantigɛlen kɔnɔ. Kalansen 8nan kɔnɔ, an bɛna o kun dɔn.—2 Piɛrɛ 2:9; 3:7, 13 kalan.
5. Cogo jumɛn na an bɛ se ka gɛrɛ Ala la?
Jehova bɛ wele bila an ma, an ka gɛrɛ ale la an kɛtɔ ka kuma a fɛ delili la. A bɛ a janto an kelen-kelen bɛɛ la. (Zaburuw 65:3; 145:18) A bɛ sɔn ka yafali kɛ. An bɛ cɛsiri min kɛ walasa ka an ko diya a ye, a bɛ o dɔn, hali ni an bɛ to ka filimakow kɛ tuma dɔw la. Ni an ka dafabaliya bɛɛ ye, an bɛ se tiɲɛ yɛrɛ la, ka jɛɲɔgɔnya diyabɔ ni Ala ye.—Zaburu 103:12-14; Yakuba 4:8 kalan.
Ikomi Jehova de ye ɲɛnamaya di an ma, an ka kan k’a kanu ka tɛmɛ fɛn bɛɛ kan. (Marka 12:30) Ni i bɛ i ka kanuya jira Ala la i kɛtɔ ka fɛn caman dɔn a kan, ani i kɛtɔ ka kow kɛ a bɛ min ɲini i fɛ, i bɛna se ka i gɛrɛ a la ka ta’a fɛ.—1 Timote 2:4; 1 Yuhana 5:3 kalan.
