Ilele hia ne ima lele vbe nọ dekaẹn irorinmwi hẹnhẹn egbe yan emwi ne Baibol tae, eso vbọ ẹre ima khian zẹ iro yan na:

•   Ọ ma de emwi nọ rhiae deghẹ ima na gha khiẹ rhunmwuda ọmwa ima nọ wu. Avbe erhuanegbe Jesu khiẹ re vbe ẹghẹ ne ọmwa iran ya wu. (Jọn 11:33-​35, 38; Iwinna 8:2; 9:​39) Rhunmwuda ọni, ma i ghee ẹghẹ na ya ru irorinmwi zẹvbe ẹghẹ na ya sọyẹnmwẹ egbe. (Asan-Ibo 3:​1, 4; 7:​1-4) Sokpan ma keghi ghee ẹre zẹvbe ẹghẹ na ya rhie ẹre ma wẹẹ, ma mwẹ ẹnina ọmwa.​—Rom 12:15.

•   Emwa ni wulo nẹ ma ghi rẹn emwi rhọkpa. Ma i mwẹ obọ vbe avbe ilele kevbe erre avbavbotọ nọ ma gua e Baibol ro, nọ ya emwa roro ẹre wẹẹ, emwa ni wulo nẹ ye rẹn emwi nọ sunu, kevbe wẹẹ, iran gha sẹtin ru iyobọ ne ima, ra iran gha sẹtin rhie ikuanegbe ne ima, ọ gha khọnrẹn wẹẹ emwa mwẹ iyayi vbenian vbe eke ne ima ke rre. (Asan-Ibo 9:​5, 6, 10) Usun avbe ilele ni ma gua e Baibol ro ne ima guan kaẹn na ọre okpovbiẹ, irorinmwi ọghe wa do ghee, ugie na do ya ye emwa ni wulo nẹ rre, izọese na ru ne emwa ni wu, na gha gu emwa ni wulo guan, ra na gha nọ emwi vbe obọ iran, kevbe avbe ilele ne ikhuo lele vbe ọdafẹn iran gha wu. Ma i mwẹ obọ vbe egbe avbe ilele kevbe erre avbavbotọ na sunu yi na, rhunmwuda ma hoo ne ima lele adia nọ rre Baibol nọ khare wẹẹ: “Uwa wannọ egbe hin ehe ne iran ye rre, wa ghẹ ghi ya obọ kaan emwi nọ ma huan.”​—2 Kọrint 6:​17.

•   Emwa ni wulo gha rhiọ kpaegbe. E Baibol wẹẹ, emwa ni wulo nẹ gha rhiọ kpaegbe, kevbe wẹẹ, ẹghẹ dee ne emwa i khian na ghi gha wulo. (Iwinna 24:15; Arhie Maan 21:4) Ne ima na ya aro yọ wẹẹ, emwa ni wulo gha rhiọ kpaegbe keghi ru iyobọ ne ima, ne ima ghẹ gha khiẹ gberra egbe vbe ọmwa gha wu, zẹvbe nọ vbe gha ye ne Ivbi Otu e Kristi ni ghaa rrọọ vbe ẹghẹ ọghe avbe ukọ.​—1 Tẹsalonaika 4:​13.

•   E Baibol we ne ima gha ru emwi ye oreghe. (Itan 11:2) Ọ ma khẹke ne ẹghẹ na ya ru irorinmwi gha re ẹghẹ na ya ya igho, ukpo na ye vbe ẹvbo ra emwi ewe na mwẹ “ghagha.” (1 Jọn 2:​16) Ma i ru irorinmwi ọghe wa do ghee, ne emwa mieke na do sọyẹnmwẹ egbe, ma i dẹ ẹkpẹti orinmwi ọghe ighobioye, ne emwa mieke na gha kha wẹẹ, a i ta ne ima ye. Ma i vbe mu egbe ne emwa mieke na ya ima ye ughe.

•   Ma i gbagba iyayi ne ima mwẹ vbe nọ dekaẹn irorinmwi ye ọmwa rhọkpa egbe. Ọ mwẹ ilele nọ rre Baibol ne ima lele vbe nọ dekaẹn ọna, ọni ọre wẹẹ: “Dọmwadẹ ọghẹe vbe uwu ima gha na iyẹn egbe ẹre ma Osanobua.” (Rom 14:12) Vbọrhirhighayehẹ, deghẹ emwa na kie ẹkpotọ yọ ne ima rhan otọ emwi ne ima yayi ma iran, ma ghi “ya ekhọe ọmẹhẹ kevbe ọghọ vbe ute” ru vberriọ.​—1 Pita 3:​15.

De vbene Avbe Osẹe Jehova ya ru irorinmwi hẹ?

 Ehe na na ru ẹre: Deghẹ ẹgbẹe hoo na ya ọta guan vbene a te mu ọmwa iran nọ wu ye otọ, iran sẹtin ru ẹre vbe ehe nọ rhirhi khọn iran, vbe na ghee Ọgua Arriọba, e mortuary, owa ọmwa, ra ọkpẹn eke na tọn idin nii yi.

 Emwamwa ọghe irorinmwi: Ma keghi ya ọta guan ne ima ya rhie ifuẹko ne ẹgbẹe kevbe avbe ọse ọghe ọmwa nọ wu, ma ghi vbe rhan otọ emwi ne Baibol tae vbekpa uwu kevbe arhiọkpaegbe ne ima ya aro yi. (Jọn 11:25; Rom 5:​12; 2 Pita 3:​13) Ma sẹtin guan kaẹn uyinmwẹ esi ne ọmwa nọ wu nii ghaa mwẹ, a sẹtin vbe guan kaẹn emwi eso na gha miẹn ruẹ vbe igiemwi esi ne ọmwa nii rhie ye otọ.​—2 Samuẹl 1:​17-​27.

 A sẹtin so ihuan nọ hẹnhẹn egbe yan ẹmwẹ nọ rre Ebe Nọhuanrẹn. (Kọlọsi 3:​16) Erhunmwu nọ gha fu ọmwa ẹko rre, ẹre a ya mu emwamwa irorinmwi nii sẹ ufomwẹ.​—Filipai 4:​6, 7.

 Igho na hae: Ma i fian emwa igho vbe ugie ne ima rhirhi gha do nọ ghi dekaẹn ugamwẹ nẹ, ya sẹ egbe irorinmwi. Ma i vbe mu ọkpan lẹga vbe iko ne ima do.​—Matiu 10:8.

 Emwa ni gha sẹtin rre: Emwa nẹi re Osẹe Jehova gha sẹtin gha die irorinmwi na ru vbe Ọgua Arriọba ọghomwa. Vbene ima kie ẹkpotọ yọ ne emwa hia gha deba ima do iko, erriọ ima vbe kie ẹkpotọ yọ ne emwa hia gha die Ọgua Arriọba ọghe ima, vbe ima ghaa ru irorinmwi.

Emwa ni rre ugamwẹ ọvbehe ghaa ru irorinmwi, Avbe Osẹe Jehova yo ra?

 Dọmwadẹ Osẹe Jehova, ẹre ọ khian ya ekhọe obọ re zẹ ne egbe ẹre. (1 Timoti 1:​19) Vbọrhirhighayehẹ, ma i mwẹ obọ vbe avbe ugie ni dekaẹn ugamwẹ ne ima yayi wẹẹ, ọ ma gua ẹmwẹ nọ rre Baibol ro.​—2 Kọrint 6:​14-​17.