IRUẸMWI 55

Gha Ru Iyobọ Vbe Iko Ne U Ye

KPẸRE

Avbe Osẹe Jehova keghi mwẹ iko ughughan ne iran na ya ọyẹnmwẹ ga Osanobua vbe otagbọn hia. Avbe iko na keghi re arriaisẹn nibun. Iran wa gbọyẹmwẹ ye imamwaemwi kevbe adia ne iran miẹn, erriọ ẹre iran vbe ya ya ekhọe hia ru iyobọ vbe iko ne iran ye vbe odẹ ughughan. Ọ sẹ uwẹ ọyẹnmwẹ, ne u na re ọkpa vbe avbe iko na ra?

1. De odẹ eso ne u gha ya sẹtin loo ẹghẹ kevbe ẹrhiọn ya ru iyobọ vbe iko?

Ma hia gha sẹtin ru iyobọ vbe iko ne ima ye. Vbe igiemwi, etẹn eso rre iko ruẹ ni khian ọmaẹn nẹ ra, ra ni khuọnmwi ra? U gha sẹtin ru iyobọ ne iran ya gha yo iko ra? Ra u gha sẹtin ru iyobọ ọvbehe ne iran, vbe na ghee ẹki na yo, ra iwinna eso na ru vbe owa ra? (Tie Jems 1:27.) U gha sẹtin vbe rhie egbe ladian vbe a ghaa ru akpehuan vbe Ọgua Arriọba kevbe a ghaa dọlọe yi. Ọmwa rhọkpa i kpikpi ima ya ru emwi na ya unu kaẹn na. Ahoẹmwọmwa ne ima mwẹ ne Osanobua kevbe etẹn ne ima gba ga, ẹre ọ gua ima kpa ya rhie egbe ladian.—Psalm 110:3.

Odẹ ọvbehe ye rrọọ ne etẹn ni dinmwiamẹ nẹ gha ya sẹtin ru iyobọ vbe iko. Etẹn nikpia ni gbegba vbe odẹ ọghe orhiọn gha sẹtin ga zẹvbe eguọmwadia iwinna, ọ gha sẹ ẹghẹ, iran sẹtin vbe gbegba nọ gha ga zẹvbe ediọn. Etẹn nikpia kevbe etẹn nikhuo gha sẹtin ga zẹvbe arọndẹ, ne iran ya ru iyobọ ye iwinna ikporhu. Etẹn sẹtin ru iyobọ vbe a ghaa bọ owa ugamwẹ ọghomwa, iran sẹtin vbe si gha rrie ehe ne a na gualọ iyobọ etẹn vbe iko.

2. De vbene ima gha ya sẹtin loo emwi ewe ọghe ima ya ru iyobọ vbe iko?

Ma gha sẹtin ya emwi ewe ne ima mwẹ rhie uyi ne Jehova. (Itan 3:9) Ọ keghi sẹ ima ọyẹnmwẹ, ne ima na loo igho ima kevbe emwi ọvbehe ne ima mwẹ, ya ru iyobọ vbe iko ne ima ye, kevbe ne ima na vbe yae ru iyobọ ye iwinna ikporhu nọ khian vbe otagbọn hia. (Tie 2 Kọrinti 9:7.) A vbe loo izọhẹ ne ima ru, ya ru iyobọ ne etẹn ne oguomiẹrẹ sunu daa. Etẹn nibun keghi “fian igho rhie ye otọ” vbe ẹghẹ hia, ne iran miẹn ya ru izọhẹ. (Tie 1 Kọrinti 16:2.) Ma sẹtin rhie izọhẹ ọghe ima ye ẹkpẹti okozẹ vbe ehe ugamwẹ, ma sẹtin vbe loo intanẹt vbe donate.jw.org. E Jehova keghi kie ẹkpotọ yọ, ne ima ya gha rhie ẹre ma wẹẹ ima hoẹmwẹ irẹn, vbe odẹ ne ima ya loo emwi ewe ọghe ima.

GUALỌ OTỌ RE SAYỌ

Gia ziro yan odẹ eso ne u gha ya sẹtin gha ru iyobọ vbe iko.

3. Ma sẹtin loo emwi ewe ọghe ima

E Jehova hoẹmwẹ ọmwa nọ ya ekhọe hia ru ẹse, erriọ ẹre Jesu vbe ye. Vbe igiemwi, Jesu ma rhie aro gberra okhuo ọkpa nọ dẹgbẹe kevbe igho kherhe nọ mwẹ, nọ ya ru izọhẹ gie Jehova. Tie Luk 21:1-4, iyeke ọni, uwa ghi ziro yan avbe inọta na:

Ọ khẹke ne igho ne ima ya ru izọhẹ kakabọ gha kpọlọ, ọ ke ya ẹko rhiẹnrhiẹn e Jehova ra?
De aro ne Jehova vbe Jesu ya ghee izọhẹ ne ima ya ekhọe hia ru?

Ne u ya rẹn vbene a ya loo izọhẹ ọghe ima hẹ, kpee VIDIO na. Iyeke ọni, uwa ghi ziro yan inọta nọ lelẹe.

E VIDIO: ‘Evba Mwẹ Na Ya Ru Izọhẹ Gie Jehova’ (4:47)

De vbene a ya loo izọhẹ ne ima ru, ya ru iyobọ ne iko vbe otagbọn hia?

4. Ma sẹtin rhie egbe ladian ya ru iyobọ

Te eguọmwadia e Jehova ni ghaa rrọọ vbe ẹghẹ nẹdẹ, wa gha ya ekhọe hia winna, ne iran mieke na sẹtin gha dọlọ owa ugamwẹ ọghe iran yi. Sokpan ọna gberra igho kẹkan na wa rhie ladian. Tie 2 Krọnikol 34:9-11, iyeke ọni, uwa ghi ziro yan inọta na:

De vbene dọmwadẹ Ivbi Izrẹl ya gha gbaroghe owa ugamwẹ ọghe Jehova hẹ?

Ne u ya rẹn vbene Avbe Osẹe Jehova ya lele igiemwi na hẹ vbe ẹdẹnẹrẹ, kpee VIDIO na. Iyeke ọni, uwa ghi ziro yan inọta ni lelẹe.

E VIDIO: Vbene Ima Ya Dọlọ Owa Ugamwẹ Ọghe Ima Yi (3:31)

Vbọzẹ nọ na ru ekpataki na gha kpe Ọgua Arriọba huan kevbe na gha gbaroghe ẹre?
De odẹ eso ne uwẹ gha sẹtin ya ru iyobọ?

5. Etẹn nikpia sẹtin rhie egbe ladian ne iran ya ru sayọ

Evbagbẹn Nọhuanrẹn rhie igiọdu ne etẹn nikpia, ne iran hia vbe odẹ ke odẹ, ne iran rhie egbe ladian ya gha ru iyobọ vbe iko. Ne u mieke na rẹn vbene iran gha ya sẹtin ru ọna hẹ, kpee VIDIO na. Iyeke ọni, uwa ghi ziro yan inọta nọ lelẹe.

E VIDIO: Etẹn Nikpia—Wa Rhie Egbe Ladian Vbe Iwinna Nọ Maan (5:19)

Vbe vidio na, de vbene Ryan ya rhie egbe ladian hẹ, nọ mieke na kakabọ gha mwẹ iyobọ nọ ye vbe iko?

E Baibol gi ima rẹn emwi nọ gha ya etẹn nikpia gbegba zẹvbe eguọmwadia iwinna kevbe ediọn. Tie 1 Timoti 3:1-13, NW, iyeke ọni, uwa ghi ziro yan avbe inọta na:

De emwi na gualọ vbe obọ etẹn nikpia, ni hoo ne iran sẹ ihe nọ gha ga zẹvbe eguọmwadia iwinna kevbe ediọn?
De emwi na gualọ vbe obọ ọvbokhan iran kevbe ivbi iran?—Ghee uviẹn 4 kevbe 11.
De vbene etẹn hia vbe iko ya miẹn ere vbọ hẹ, vbe etẹn nikpia ghaa hia ne iran sẹ ihe vbe odẹ vbenian?