U he tie ebe Owa Ọkhẹ ni da ladian ra? Hia ne u rhie ewanniẹn ye avbe inọta na:

Vbọzẹe ne ọ na khẹke ne evbibiẹ emọ ni kpa gha rrie otọ ẹvbo ọvbehe, ni hoo ne iran ru iyobọ ne ivbi iran vbe odẹ ọghe orhiọn, ziro yan urhuẹvbo ne ivbi iran zẹ?

Ivbi iran sẹtin ruẹ vbe ne a zẹ urhu ẹvbo ne iran kpaa gha rrie vbe owebe kevbe ẹdogbo ne iran ye. Ọ ma de emwi nọ rhia deghẹ emọ gua zẹ urhuẹvbo nọ gberra ọkpa. Sokpan, te ọ khẹke ne evbibiẹ emọ rẹn urhuẹvbo ne ivbi iran ghi họn sẹ. Ọni ẹre ọ khian ghi ya iran rẹn deghẹ iko ne a na zẹ urhuẹvbo ne iran kpaa gha rrie ẹre ivbi iran gha yo ra ọghe urhuẹvbo iran. Ivbi iran ghaa rre iko ọghe urhuẹvbo ne iran họn ẹse, ẹre iran khian na gha mwẹ alaghodaro vbe odẹ ọghe orhiọn. Alaghodaro ọghe emọ vbe odẹ ọghe orhiọn ẹre ọ khẹke ne evbibiẹ emọ mu ye okaro.—w17.05, ipapa 9-11.

Vbe Jesu nọ e Pita: “Wẹ hoẹmwẹ mwẹ sẹ avbe emwi na ra?” De “avbe emwi” ne Jesu ghaa guan kaẹn? (Jọn 21:15)

Ọ khọ wẹẹ, avbe ehẹn ne iran he gbele ra iwinna ọgbehẹn ne Pita ghaa ru ẹre Jesu ghaa guan kaẹn. E Jesu ghi wu nẹ, e Pita na werriegbe ya suẹn iwinna ọgbehẹn ne ọ ka gha ru. Ọ khẹke ne Ivbiotu e Kristi zanzan ẹkokoudu iran ghee, ne iran mieke na rẹn deghẹ iwinna ne a na miẹn igho ẹre ọ ru ekpataki sẹ vbe arrọọ ọghe iran.—w17.05, ipapa 22-23.

Vbọzẹe ne Ebraham na tama e Sera nọ kha wẹẹ ọtiọnrẹn nokhuo irẹn khin? (Gẹn. 12:10-13)

Vbene ẹmwata, ọtiẹn Ebraham ẹre Sera gele gha khin. Akpawẹ te Sera tama Fero wẹẹ amwẹ Ebraham ẹre irẹn khin, ughaghe te Fero gha te gbe Ebraham rua. Deghẹ te emwi vberriọ sunu, eyan ne Osanobua yan ma Ebraham ọghe ọmọ nọ gha la uniẹn ọnrẹn rre i ghẹ te mwẹ amusẹ.—wp17.3, ipapa 14-15.

De obẹlẹ ne Elias Hutter mu gbọọ nọ ya ru iyobọ ne emwa ni hoo ni ruẹ urhuẹvbo e Hibru?

Ọ keghi ru iyobọ ne emwa ni ruẹ urhuẹvbo e Hibru ya rẹn alughaẹn nọ rre ẹzi ẹmwẹ e Hibru kevbe ikpẹmwẹ na rhilo ginnaẹn vbe odaro ọre kevbe iyeke ẹre. Ọ keghi gbẹnnẹ ẹzi ẹmwẹ ọghe urhuẹvbo e Hibru gbodoo vbene ọ na gbẹnnẹ ikpẹmwẹ ne a rhilo ginnaẹn giẹrẹ. Erriọ avbe ya gbẹnnẹ evba gbẹnnẹ ye ototọ kuẹi vbe New World Translation of the Holy Scriptures—With References.—wp17.4, ipapa 11-12.

De ilele eso nọ khẹke ne Ovbiotu e Kristi ziro yan deghẹ ọ hoo nọ dẹ osisi ya gbogba ga egbe?

Eso vbọ keghi re: Arrọọ ọghe emwa nagbọn wa hiunsi vbe aro e Jehova. E Jesu ma wẹẹ ne erhuanegbe ẹre ya umozo sinmwi oseghe ne egbe iran. (Luk 22:36, 38) Te ima gha ya umozo ọghe ima khian ẹguẹ. Arrọọ ọghe ima hiunsi sẹ emwi ewe. Ivbiotu e Kristi i ru emwi nọ gha rhua ọmwa ọvbehe owẹ, iran vbe rhie igiemwi esi yotọ ne emwa ọvbehe. (2 Kọr. 4:2)—w17.07, ipapa 31-32.

Vbọzẹe ne okha ọghe Matiu nọ dekaan ẹghẹ ne Jesu ya gha rre ọvbokhan na lughaẹn ne ọghe Luk?

E Josẹf ẹre Matiu mobọ guan kaẹn. Matiu keghi guan kaẹn vbene ọ ya kpa e Josẹf odin hẹ vbe ọ ghi rẹn wẹẹ e Meri hanmwa. Matiu yevbe guan kaẹn vbene odibo ya tama e Josẹf vbe imina ne irẹn vbe Meri lẹ gha rrie Igipt kevbe imina ne odibo na vbe tama rẹn nọ werriegbe gha die otọ Izrẹl. E Meri ẹre Luk rhie aro tua. Ọ keghi guan kaẹn otuẹ ne Meri mu gie Ẹlizabẹt ne ọtiọnrẹn kevbe vbene Meri ya fẹko gha rria re vbe ekhọe vbe Jesu ya tota gha gu eniwanrẹn guan vbe Ọgua Osa.—w17.08, ipapa 32.

De ọlọghọmwa eso ne emwa ni zedu e Baibol la gberra?

Zẹ vbene ẹghẹ ya khian, urhuẹvbo ne a ya gbẹn e Baibol kegha fiwerriẹ. Afiwerriẹ ni rhiegbe ma vbe arriọba emwa nagbọn keghi ya urhuẹvbo ne a mobọ zẹ fiwerriẹ. Emwa ni zedu e Baibol ghe urhuẹvbo ne a mobọ zẹ wa werriẹ aro daa ukpokpo nọ wegbe.—w17.09, ipapa 19-21.

Edọmwadẹ ima mwẹ odibo nọ gbogba ga ima ra?

Ẹo. Vbe Jesu guan kaẹn avbe erhuanegbe ẹre, ọ keghi kha wẹẹ, ọghọ hia ọre odibosa ọghe iran ya mudia ye odaro Erha mwẹ. (Mat. 18:10) Emwi ne Jesu ya ẹmwẹ na kha ọre wẹẹ, avbe odibo mwẹ ẹnina daa erhuanegbe ọghẹe, ẹi re te avbe odibosa gbogba ga edọmwadẹ iran vbe odẹ ọghe ọyunnuan.—wp17.5, ipapa 5.

De ahoẹmwọmwa nọ ghi hiunsi sẹ?

Ahoẹmwọmwa nọ hẹnhẹn egbe yan ilele nọ gbae ọre a·gaʹpe. Ọna ọre ahoẹmwọmwa nọ ghi hiunsi sẹ. Agape keghi rhiegbe ma vbe agiẹngiẹn ne a mwẹ daa emwa ọvbehe kevbe oyaya ne a so mu ọmwa. Sokpan evbọ wa demu ọre ekhọe hia ne a ya ru emwi esi ne emwa ọvbehe.—w17.10, ipapa. 7.