ONU a mbép nkéñ hiki ngéda le hiki mut a yila “mbôn nkoñ isi wonsôna.” Njômbi yé i yé le biloñ gwobisôna bi sal ikété adna, bi diihe kunde hiki mut a gwé, ni ki le bi sôñ hisi. Inyuki bi nlama boñ hala? Maher Nasser nu a nsal i ONU a nkal ikété the UN Chronicle le, ikété nkoñ isi wonsôna, “sép ni mbéñ bi nhéñha, manola ma nlôôha, mbagla i nai, gwét bi nai, ngandak bôt i nke mayo, bape ba nhaba bakindim inyu tjé bôt, makon, ni mintén mi mam mimpe hala . . . mi nai.”

Bape ki ba bi ti mahoñol le i mbéda le ane yada yon i énél nkoñ isi wonsôna. Ikété bôt ba, di nla sima mut m’bô i loñ Italia le Dante (1265-1321) ni mut njôôñ yi le Albert Einstein (1879-1955). Dante a bé hoñol le nsañ u nla bé ba ikété nkoñ isi u u yé mbaglaga ikété mam ma m’bô. A bi sima ki i jam Yésu a bi kal, le: “Hi ane i mbagla i kolba yomede i ñôbi.”​—Lukas 11:17.

Ndék ngéda i mbus gwét bi ntôla bi nyônôs biba, ngéda ba bi gwélél bakindim bakeñi iba, Albert Einstein a bi tilna likoda likeñi li ONU kaat. A bi kal bo le: “ONU a nlama hoo yoñ bitelbene inyu boñ le nsañ ni nwee bi ba ikété biloñ, a tek ki hikuu hi bañga ane i i nlama énél nkoñ isi.”

Ndi baa i bôt ba m’bô ba nyéñ téé i nya ntén ane u, bomede ba nla keñgle makalapati, yeñgi i tibil boñ mam, tole mbanda? Baa yak bo ba ga unda bé le ba gwé minlélém mi maboñog mabe kiki i bet ba bi bôk bo bisu? Mambadga ma, ma nhôñlaha bés bipôdôl bi Sañgô Acton, mut miñañ i loñ Ngisi, nu a bi kal le: “Énél i ntinde mut i ba nkoda, ndi énél i ngi nwaa, yo i mpéé yaga kôdi mut.”

Ndi, inyu boñ le bôt ba binam bobasôna ba ba ikété nsañ ni nwee, di nlama ba ikété adna. Ndi lelaa njômbi i, i nla yon? Baa hala a nla toi bôña? Bibel i ntimbhe le ñ. Hala a nla bôña, a ga bôña ki. Ndi lelaa? He bé ni njel baane ba nkoñ isi ba ba yé minkoda. Ndi hala a ga bôña ni njel ngim ane, i Djob a bi téé. Ni ki le, i ane i, i ga unda kunde i Djob a gwé i énél bôt ba binam. Baa imbe i ane? Bibel i nsébél yo le​—“Ane Nyambe.”​—Lukas 4:43.

Ngéda a bi niiga banigil bé i soohe, Yésu a bééna Ane Djob i mahoñol. A bi kal le: “Ane yoñ i lo. Sômbôl yoñ i bôña ’isi.” (Matéô 6:9, 10) Ni maliga, Ane Nyambe i ga yônôs toi sômbôl i Djob hana isi, he sômbôl i minkoda mi bôt ba binam ba ba ntôñ ndigi bomede bé.

Ane Nyambe i nséblana ki le “Ane ngii.” (Matéô 5:3) Inyuki? Tolakii i ga énél hisi hiosôna, i ga bane bé hana isi ndi i ga bane i ngii. Hoñol ki kii hala a nkobla. I ane i, i ga bana bé ngôñ ni nkus wés tole ni moni nwés inyu boñ mam mé. Kinje hogbe inyu bobasôna ba ba mba i si énél i!

Ane Djob i gwé Kiñe, ndik kiki bini biane bipe. I Kiñe i, i yé​—Yésu Kristô​—nu kunde i nlôl nye ni Nyambe. Bibel i nkal inyu Yésu le:

• “Jai li mbok l’a kahap ngii yé tu . . . Pot yé mbok y’a hol, hol ni hol, mbôda ni nsañ, bi nla bé mal mu ngii yééne yé Ane.”​— Yésaya 9:6, 7.

•   “Ni ngui i pot mbok i bi tina nye yak ni lipém, ni ngim ane, le ndi biloñ gwobisôna, ni matén, ni dilémb ba gwélél nye. Pot yé mbok . . . i ga nom mba ni mba.”​—Daniel 7:14.

• “Ane nkoñ ’isi i mal yila Ane Nwet wés [Nyambe] ni i Kristô wé.”​—Masoola 11:15, MN.

Inyu yônôs masoohe Yésu a bi ti kiki ndémbél, Ane Djob i ga boñ le sômbôl i Djob i bôña hana isi. I si énél i, bôt ba binam bobasôna ba ga nigil i bôñgôl hisi inyu boñ le hi témb hi yila loñge homa liyééne het niñ i ga bôl.

Ndi Ane Djob i ga bôk ndugi i niiga bet ba ga niñ i si énél yé. Bôt bobasôna ba ga nigil minlélém mi matiñ. Mbagla to ngimanôgla bi ga ba ha bé. Kaat Yésaya 11:9 i nkal le: “[Yom to yada y’a] boñ bé mut nye ki nye béba . . . inyule hisi hiosôna hi’a yon ni yi i Yéhôva nlélém kiki malép ma nhô ndip tuye.”

I bôt ba ga niñ i si Ane Djob hana isi, ba ga ba toi kiki ONU a bé sômbôl le bôt ba ba: Bôt ba nsañ ni nwee. Kaat Tjémbi 37:11 i nkal le: “B’a nok ki lingoñoo inyu ngandak nsañ.” Kiki ngéda i mba i ntagbe, bibuk kiki bo “manola,” “i ôbôs mbebi ni hisi,” “liyep,” “gwét” bi ga mal ikété bipôdôl gwés. Ndi kekii hala a ga bôña? Ñ, kekii Ane Djob i ga yoñ mam i moo? Lelaa i ga boñ inyu héñha mam? Ni umbe nseñ di ga kôs i si énél i Ane Djob? Di wan le jam li.