NSON wés u likalô u gwé yéñe, u ban-ga ki nseñ. Ndi, i bôt ba di ntééne likalô, bobasôna bé bon ba ndiihe jo. To ibale bôt ba ñunda le ba ngwés ñwin u Bibel, ha hiki ngéda bé nyen bôt ba ga tehe nseñ i nigil Bañga i Djob ni bés.

Hala a bé nlélém jam inyu Gaven, nu a bi bôdôl ke makoda; ndi, a bé neebe bé yigil i Bibel. A nkal le: “Yi yem i Bibel i bé titigi ngandak, me bé gwés bé unda ngiyi yem. Woñi wem u bé le ba yumus me, me konok ki woñi i bôdôl ngim jam le m’a la bé mélés.” Baa u nhoñol lelaa? Baa hala a bé i lep ngéda i tééne Gaven likalô? To jam! Di béñge nseñ biniigana bi Bibel bi nla bana inyu ngim mut. Yéhôva a kal nlômbi wé litén le: “Lipôdôl jem l’a kwo kikii manwee, kikii hilônde hi nkwo ngii njoñgi bayôôma, ni kikii biôôm ngii bikai.” (Ndiimba Mbén 31:19, 30; 32:2.) Mam ma nhôla bés i toñol lelaa manwee ma yé, ma ntibil yak unda lelaa likalô jés li nhôla mintén mi bôt nwominsôna.—1 Timôtéô 2:3, 4.

 NSON U LIKALÔ U YÉ KIKI MANWEE—LELAA?

Manwee ma nhôgbaha. Manwee ma nlo mbeñel mbeñel. Ma nlôl ni mbuu u ntu, hala wee ond le mbebi i nyuge; ngéda lisuni li yé ngandak, u mbuu u, u nyila malép ma ma nene matôi matôi. Bibañga bi Yéhôva bi bé “kwo kiki manwee” ni lini libak le, a bi pôdôs litén jé ni bibañga bi bé pôna manwee inyule bi bé nyonok ni ntômba ñem, ni loñgeñem, bi bé unda ki le a bé ti litén jé lipém. Di nkôna nye ngéda di ndiihe matehge ma mut numpe. Di nti bôt makénd le ba ôt pék inyu yoñ makidik map bomede. Ngéda di nti bôt lipém i nya i, ba nhoo neebe nkwel wés i likalô, ni le likalô jés jomede li ga kônde num matam malam.

Manwee ma nsunus. Likalô jés li nsunus miñem mi bôt bape ngen di nyoñ ngéda i hoñol lelaa di nla hôñôs gwéñe gwap. Gaven, nu di nsima bibôdle a bé bé nyéksaga i neebe yigil i Bibel. Ndi Kris, i mankéé nu a bi bôdôl nkwel ni nye a bi hoñol ngandak manjel a bé le a gwélél inyu boñ le Gaven a ba maséé i kwel mam ma nlôl i Bibel. Kris a bi toñle nye le Bibel i gwé ngim ño nkwel, ni le i tibil yi yo i ga hôla nye i nok i yom i mpôda i makoda loñge loñge. Mbus, Kris a toñle nye le mbañ i Bibel yon i bi kwés nyemede nkaa le Bibel yon i yé toi maliga. Hala a bi boñ le ba wan ngandak mbañ i Bibel i i bi yon. Minkwel mi, mi bi lôôha sunus ñem u Gaven, kayéle a sôk neebe yigil i Bibel.

Manwee ma ntééda niñ. Loñ Israél i bi tégbaha mangéda ma lék, tole mangéda ma sép, kayéle nop a bé a sôga kwo ngandak sôñ. I ba bé lisuni li bé lôl manwee, bibebela bi bé le bi yuyi, bi bé ki le bi wo. I len ini, inoñnaga ni mbônga u Yéhôva, sép i pes i mbuu i yé nayak ikété nkoñ isi. (Amôs 8:11) A bi bôn le batéé likalô ba ba yé minhook ba bé lama ba “wengoñle manwee ma nlôl yak Yéhôva” mu kiki ba ñañal ñwin u Ane, ni baso lôñ yap le “mintômba mimpe” mi mi nit bo. (Mika 5:6; Yôhanes 10:16) Baa di ndiihe ñwin wés u añal ñañ nlam u Ane kiki ngim njel yada Yéhôva a ngwélél inyu tééda niñ i bôt ni njel lisuni li mbuu?

Manwee ma yé bisai bi nlôl yak Yéhôva. (Ndiimba Mbén 33:13) Likalô jés li nla ba bisai inyu bet ba neebe jo. Gaven a bi kôs bisai bi. Ni njel yigil yé i Bibel, a bi kôs mandimbhe ma mambadga mé momasô. A bi pala hol letee ni i sôble. Nano, nye bo ñwaa wé, Jois, ba nyoñ ngaba ikeñi i añal ñañ nlam u Ane.

Mbôgi Yéhôva i nyônôs nkoñ isi ni ñwin u Ane

DIIHE NSON WOÑ U LIKALÔ

I hoñol manwee i nla ki tinde bés i diihe ngaba di nti i nson u likalô. Lelaa? Hiki litôi li manwee li nla bé boñ bañga jam, ndi didun di matôi ma manwee ma nyônôs hisi ni lisuni. Nlélém ni bés, ngaba i hiki wada wés i nson u likalô, i nla nene isii jam i mis més. Ndi, biliya bi njômbi ñem bi bagwélél ba Yéhôva bobasôna mpôdnaga, bi nhôla i bok mbôgi ni “biloñ gwobisôna.(Matéô 24:14) Baa likalô jés li yé toi bisai bi nlôl ni Yéhôva inyu bôt bape? I ga ba hala ngéda ñwin di ñañal u yé toi kiki manwee—u nhôgbaha, u nsunus, u ntééda ki niñ!