¿Aka qhepa phajjsinakan Yatiyañataki sat revista mistkäna uk liytʼtati? Ukhamächi ukhajja, aka jisktʼanakar qhanañchtʼma:

Diosan markapajj kun lurañatakis ewjjtʼanipki ukhajja, ¿kunjam chuymampis congregación tumptʼirinakasa, jilïr irpirinakas katoqasipjjañapa?

Uka ewjjtʼarjamajj jankʼakiw lurapjjañapa. Akham jisktʼasipjjañapawa: “Diosat jan jitheqtas servipjjañapatakejja, ¿jilat kullakanakar yanaptʼaskti? Diosan markap sarayirinakajj ewjjtʼanak churki ukarojja, ¿taqe chuymat istʼtjja?” sasa (w16.11, página 11).

¿Kuna tiemponsa cristianonakajj Jachʼa Babiloniampi katuntatäpjjäna?

Qhepïr apostolajj jiwjjäna ukhat mä tiemporuw ukajj pasäna. Uka tiemponjja, Iglesia sarayirinakaw uñstäna. Iglesia sarayirinakajj gobiernonakamp mayachtʼasisaw kʼari religionajj uñtʼatäñapatak chʼamañchapjjäna. Trigor uñtasitäpkäna ukanakarus chhaqtayañ yantʼapjjäna. Ukampis 1914 mara nayraw ajllit cristianonakajj kʼari religionat jitheqtapjjäna (w16.11, páginas 23-25).

¿Kunatsa Lefèvre dʼÉtaples chachan luratapajj wali askïnjja?

Khä 1520 maranakanjja, taqeni liytʼapjjañapatakejj Lefèvre sat chachaw Biblia francés arur jaqokipäna. Bibliat qhanañchkäna ukajja, Martín Lutero, William Tyndale, Juan Calvino chachanakaruw yanaptʼarakïna (wp16.6, páginas 10-12).

‘Jañchin munañanakapat lupʼiñasa’, ‘espíritu santot lupʼiñasa’, ¿kunansa jan kikpäki? (Rom. 8:6)

Khititï jañchin munañanakapat lupʼki ukajja, kuntï lurañ munki ukwa luri, uka toqetwa jilpach parlaraki. ‘Espíritu santot lupʼki’ ukajja, kunanakatï Diosar serviñan yanaptʼkaspa ukanakwa luri, ukhamarak lupʼi. Amuyunakapansa Diosan espíritu santopampiw yanaptʼayasiraki. Jañchin munañanakapat lupʼiñajj jiwañar apiriwa, ukampis espíritu santorjam jakañat llakisiñajja wiñay jakañaru, ukhamarak sumankañaruw api (w16.12, páginas 15-17).

¿Kunanakas jan sinti llakisiñatak yanaptʼistaspa?

Wakiski uk nayraqat luraña, sum amuytʼasiña, samartʼañatak tiempo apstʼasiña, Diosan luratanakapat lupʼiña, kusisitäñatak chʼamachasiña, sapa kuti ejercicio luraña, sum iktʼaña ukanakaw yanaptʼistaspa (w16.12, páginas 22, 23).

¿Kunjamsa Enoc chachajj jiwañ jan uñtʼañapatak apatäjjäna? (Heb. 11:5)

Enoc chachajj janiw tʼaqesiyat jiwkänti, Jehová Diosaw jan tʼaqesiñapatak jarkʼaqäna (wp17.1, páginas 12, 13).

¿Kunatsa humilde chuymanïñajj wakisi?

Humilde chuymanïstanjja, kunsa lurañäni kunsa jan lurkaraksna ukwa amuytʼasiñäni. Kunjamsa yaqhanakar jan waltʼayaspa uk amuytʼañasawa, yaqhanakajj kamsapjjanisa sasin janiw sinti llakisiñasäkiti (w17.01, página 18).

Nayrïr patak maranakansa jichhasa, ¿kunatsa Diosaw oraqpachan jilïri irpirinakar yanaptʼi sasin sistanjja?

Biblia amuytʼapjjañapatakejj Diosaw espíritu santopampi yanaptʼäna, oraqpachan yatiyasiñapatakejj angelanakaw yanaptʼäna, Diosan Aruparuw confiyapjjäna. Jichhürunakan ukhamarakiwa (w17.02, páginas 26-28).

¿Kunatsa Jesusan loqtasitapat yuspärañasa?

Aka jisktʼanakatwa amuytʼañasa: ¿khitis churawaytam? ¿Kunatsa churawaytam? ¿Qhawqsa chʼamachasiwayi? ¿Cheqapunit yanaptʼawaytam? (wp17.2, páginas 4, 5).

¿Mä cristianojj kuntï amtawayki uk mayjtʼayaspati?

Arsutas phoqañajj wali wakiskirïkchisa, awisajj wasitat amuytʼañaw wakisi. Nínive markankir jaqenakajj arrepentisipjjäna ukhajja, Diosajj janiw arsutaparjamajj uka markar tukj-jjänti. Jan nayrjamäjjchi, jan ukajj machaq yatichäwinak katoqstan ukhajja, kuntï amtktan uk mayjtʼayañaw wakisispa (w17.03, páginas 16, 17).

¿Kunatsa mayninakjjat parlasiñajj jan walïki?

Mayninakjjat parlasiñajj ninjamaw aqtaspa. Jan walsa lurapkistaspa ukham amuyatasajj cheqäpasa janisa, jan wal parlatasajj janiw kuns askichkaniti (w17.04, página 21).