1, 2. ¿Kunjamsa Diosajj llakinakan uñjasktan ukhajj chuymachistu, ukat chuymachtʼir kuna arunakas Biblian utji?

 EDUARDO soltero wayna jilatajja, 1 Corintios 7:28 qellqatatwa amuytʼaskäna, ukanjja “casarasipkani ukanakatakejja, tʼaqesiñaw jañchipan utjani” sasaw qhanañchi. Uka jilatajja, casado ukhamarak chuymani jilïr irpiriruw akham sas jisktʼäna: “‘Tʼaqesiñaw jañchipan utjani’ siski uka arunakajja, ¿kuna toqetsa parlaski? ¿Casarasirista ukhajj kunjamsa uka jan walinak askichirista?” sasa. Uka jisktʼar janïr qhanañchkasajja, apóstol Pablon yaqha arunakapatwa amuytʼarakisma sasaw jilïr irpiri jilatajj Eduardor säna. Pablojj akham sänwa: “Taqe kunan chuymachtʼasiri Diosajja, [...] taqe llakinakasan chuymachistu” sasa (2 Cor. 1:3, 4).

² Jehová Dios Awkisajja, munasistuwa, jan walinakansa chuymachistuwa. Kunjamsa Jehová Diosajj Biblia taypi yanaptʼayätam, ewjjtʼayätam uk inas amtassta. Nayra servirinakapajj  kusisit jakasipjjaspa ukwa Diosajj munäna, jiwasajj kusisit jakassna ukwa munaraki (Jeremías 29:11, 12 liytʼañataki).

3. ¿Kuna jisktʼanakarus aka yatichäwin qhanañchañäni?

³ Problemanakasa, jan waltʼañanakas kunatsa utji uk yattan ukhajja, jankʼakiw ukanak askichsna. Ukhamajja, ¿kunatsa familian llakinakajj utjaskakispa? Llakinakan uñjasktan ukhajja, ¿Diosan nayra servirinakapana, jichha tiempon servirinakapan experiencianakapat kawkïrinakas chuymachtʼistaspa? Uka jisktʼanakar qhanañchasajja, kunjamsa uka llakinakar saykatsna ukwa uñjañäni.

4, 5. ¿Kuna llakinakas casadonakatakejj utjaspa?

⁴ Jehová Diosajj nayrïr warmir lurkäna ukhajja, chacha warmi jakapjjañapatakiw Adanampi mayachäna. Ukatsti akham sänwa: “Chachajj awkipsa, taykapsa jaytjjanejja, warmipampi mayachasjjañataki, panpachanisti mä sapa jaqekïpkaspasa ukhamäpjjaniwa” sasa (Gén. 2:24). Jichhürunakanjja, taqeniw pantjasirïtanjja (Rom. 3:23). Awisajj ukatwa casadonakajj llakinakan uñjasipjjaspa. Amuytʼañataki, janïr casaraskasajja warmejj awkiparuw istʼäna. Casarasjje ukhajj chachaw warmin pʼeqepäjje sasaw Bibliajj qhanañchi (1 Cor. 11:3). Qalltanjja, chachatakejj warmipar pʼeqtʼañajj chʼamakïspawa, warmitakis awk taykapar istʼañat sipansa chachapar istʼañajj chʼamarakïspawa. Maysa toqetjja, suegronakapamp jan waltʼayasiñanakaw utjaspa, ukaw jupanakar llakisiyarakispa.

⁵ Mä chacha warmejja, wawanïpjjañap yatisipjje ukhajj kusisitäpkchisa llaktʼasipjjarakiwa. Wawan nasiñapkamajj walikïniti, wawas janit usuntkpachäni sasaw llakisipjjaspa. Wawajj nasjjani uka qhepat jukʼamp gastonakaw utjani, janiw taqe kunas nayrjamäjjaniti. Taykajj jukʼamp tiempow wawapampëjjani, jupanakatakejj janiw nayrjam tiemponëjjapjjaniti. Awkitakis jukʼamp lurañanakaw utjarakini, esposaparusa, wawaparusa kunatï wakiski ukanak churañapaw wakisini.

6-8. Jan wawanïñ puedesajja, ¿kuna jan walinakansa chacha warmejj uñjasipjjaspa?

⁶ Yaqhep chacha warminakajj yaqha llakinakanwa uñjasipjjaraki. Wawanïñsa munapkchejja, janiw wawanïñ puedepkiti. Kusisit jakasiñatakejj janiw casaratäñasa, ni wawanïñas wakiskapuniti. Ukhamäkchisa, warmejj jan wawanïsajj wal llakisispa (Pro. 13:12). Bibliajj qellqaskäna uka tiemponjja, warminakan casarasipjjañapasa wawanïpjjañapas wali wakiskirïnwa. Ukatwa Jacob chachan Raquel warmipajj jan wawanïsasa, kullakapar wawanakanïtap uñjasas llakimp aynachtʼäna (Gén. 30:1, 2). Jichhürunakanjja, wawanïñajj yaqhep markanakan wali wakiskiriwa. Uka markanakan jakapki uka misioneronakarojj niya sapa kutiw akham jisktʼapjje: ‘¿Kunatsa jan wawanïpkta?’ sasa. Kunatsa jan wawanïpki uk sumsa qhanañchapkchejja, yaqhepanakajj akham sapjjewa: “¡Wawanïpjjañamatakiw Diosat mayirapipjjäma!” sasa.

⁷ Inglaterra markan jakasiri mä kullakat parltʼarakiñäni. Wawanïñ wal munäna, ukampis jan wawanïñ puedetap yatisajj wal llakisïna. Esposopampejj mä wawa uywasiñ amtapjjäna, mä wawsa uywasipkchïnjja mä tiempojj llakisiskakïnwa. Kullakajj siwa:  “Uywat wawajj janiw dueño wawaj-jamäkaniti sasaw llakisirïta” sasa.

⁸ Bibliajj warminakat akham siwa: “Wawanïñajj walïspawa, ukaw juparojj jan walinakar jan purtʼasiñapatakejj jarkʼaqani” sasa (1 Tim. 2:15). Uka arunakajja, warminakajj wawanïsaw wiñay jakañ katoqapjjani sasin janiw sañ munkiti. Jan ukasti, wawanakapar uñjaña, utap sum uñjañaw yaqhanakat jan parlasiñataki, yaqhanakan sarnaqatapar jan mitisiñatak yanaptʼani sañ muni (1 Tim. 5:13). Ukhampachasa, matrimonionsa familiansa llakinakajj utjakipuniniwa.

9. ¿Kuna yaqha jan walinakansa casadonakajj uñjasipjjaspa?

⁹ Casarat chacha warminakajja, jupanakat maynejj jiwjje ukhaw wal llakisipjjaraki. Janis ukham llakinakan uñjasipjjañap amuyapkchïnjja, waljaniw aguantawayapjje. Jiwatanakajj jaktanipjjaniwa sasaw Jesusajj säna, uka arunakaruw cristianonakajj taqe chuym confiyapjje, ukaw llakimp jan aynachtʼañatak yanaptʼaraki (Juan 5:28, 29). Biblia taypiw Jehová Diosajj llakinakan uñjastan ukhajj chuymachtʼarakistu. Kunjamsa Jehová Diosajj servirinakapar chuymachtʼäna, yanaptʼarakïna uk jichhajj uñjañäni.

10. ¿Kunsa Anajj jan llakisjjañatak luräna? (Página 4 ukankir foto uñjjattʼäta).

¹⁰ Elcana chachan Ana munat esposaparojj kunas pasäna uk amuytʼarakiñäni. Jupajj wawanakanïñ wal munäna, ukampis janiw wawanïñ puedkänti. Maysa toqetjja, Elcana chachan Penina sat mayni esposapajj walja wawanakanïnwa (1 Samuel 1:4-7 liytʼañataki). Jukʼamp llakisiyañatakejja, Peninajj “sapa marapuniwa” jan wawanïtapat Anar jiskʼachäna. Ukaw Anarojj wal chuym usuyäna. ¿Kunsa Anajj jan llakisjjañatak luräna? Jehová Diosaruw wal orasïna, janiw ukak lurkänti, templor sarasinwa Jehová Diosarojj wali jaya orasïna. Mä wawanïñatakiw Jehová Diosar mayisïna, Jupaw yanaptʼitani sasaw confiyarakïna. Mayisiñ tukuyjjäna ukhajj chuymapan sumakëjjänwa, “janirakiw mayamps llakiskjjänti” (1 Sam. 1:12, 17, 18). Jehová Diosaw mä wawa apayanitani jan ukajj Jupaw chuymachtʼitani sasaw confiyäna.

11. ¿Kunjamsa Diosar orasiñajj chuymachtʼistu?

¹¹ Pantjasirïtanwa, Supayan apnaqat aka pachanwa jakaraktanjja, ukatwa llakinakasa jan walinakas utjaskakini (1 Juan 5:19). Ukampis janiw sapäktanti. Ana warmjamaw ‘taqe llakinakan chuymachiri’ Jehová Diosar orasiñasa. Anajj kunas llakisiyäna ukwa Diosar yatiyäna, kunjam yanaptʼatäñsa munäna uksa sarakïnwa. Llakinakan uñjasktan ukhajja, janiw kunanakatï llakisiykistu ukak sañasäkiti, jan ukasti yanaptʼapwa taqe chuyma mayisiñasa, ukatsti chuymasan kunja llakitätansa ukwa yatiyañasa (Fili. 4:6, 7).

12. ¿Kunas Anarojj kusisitäñatak yanaptʼäna?

¹² Chacha warmit maynin jiwipana, jan ukajj jan wawanïsaw wal llakissna. Ukhamanakan uñjaskasas chuymachtʼatäsnawa. Jesusajj aka oraqenkkäna uka tiempon jakiri Ana profetisat amuytʼañäni. Paqallqo mara casadokäna ukhaw chachapajj jiwjjäna, amuyatajj janiw wawanïpkänti. ¿Kunas Anar yanaptʼpachäna? 84 maranïkchïnsa,  “templorojj sarapunirïnwa, uruy arumaw Diosar servirakïna, ayunonak lurasa Diosar ruwtʼasisa” (Luc. 2:37). Ukanakaw Anarojj chuymachtʼäna, kusisitäñapatakis yanaptʼarakïna.

13. Familiasat maynejj Diosat jitheqtaspa ukhajja, ¿kunjamsa jilat kullakanakajj chuymachtʼapjjestaspa?

¹³ Congregacionankir amigonakasaw chuymachtʼarakistaspa (Pro. 18:24). Paula kullakat parltʼañäni, phesqa maranïkäna ukhaw mamapajj Jehová Diosat jitheqtäna. Ukhamanakan uñjasiñajj Paulatak chʼamakïnwa, wal llakisirakïna. Juparojj Ann sat mä precursora kullakaw chʼamañchtʼäna, munasiñampiw yanaptʼarakïna. Paulajj akham siwa: “Ann kullakajj janis familiajäkchejja, nayar yanaptʼañatak llakisitap uñjasaw kusisiyäta. Ukaw Jehová Diosar serviskakiñatak yanaptʼitäna” sasa. Mamapajj congregacionar kuttʼanjjewa, uk uñjasaw Paulajj wal kusisi. Ann kullakajja, Jehová Diosar serviskakiñapataki Paular yanaptʼasajj wal kusisiraki.

14. ¿Kunjamsa mayninakar chʼamañchtʼañajj yanaptʼistu?

¹⁴ Niya jila partejja, mayninakar yanaptʼañatak chʼamachasktan ukhajj llakinakasat armtʼastanwa. Amuytʼañataki, casado ukhamarak soltera kullakanakat waljanejja,  Diosan Reinopat yaqhanakar yatiyasajj Jehová Diosaruw yanaptʼasipki, Diosan munañap phoqasipkaraki, uk uñjasaw kusisitäpjje. Jiwasajj suma yatiyäwinak yatiyasaw mayninakat llakisitas uñachtʼaysna. Jilat kullakanakar munasiñat yanaptʼtan ukhajja, jukʼampiw jupanakar jakʼachastanjja (Fili. 2:4). Ukhamwa apóstol Pablojj luräna. “Kunjamtï mä taykajj wawanakapar wali munasiñamp uñjki” ukhamwa mayninakarojj uñjäna. Mä awkjamaw jilat kullakanakarojj chuymachtʼäna, chʼamañchtʼarakïna (1 Tesalonicenses 2:7, 11, 12 liytʼañataki).

15. ¿Khitinakas wawanakar Diosat yatichapjjañapa?

¹⁵ ¿Kunjamsa familianakar yanaptʼsna? Diosan markapar jichhak mantanipki uka jilat kullakanakajja, wawanakapar Diosat yatichañasataki, jan ukajj wayn tawaqöjjapjje uka wawanakapar Bibliat yatichañasatakiw yanaptʼa mayipjjestaspa. Ukampis Bibliarjamajja, awk taykanakaw wawanakaparojj yatichapjjañapa, ukhamarak yanaptʼapjjañapa, ukwa Jehová Diosajj muni (Pro. 23:22; Efe. 6:1-4). Awisajj jilat kullakanakas yanaptʼapkchejja, awk taykanakaw wawanakapar yatichapjjañapa, sapa kutiw jupanakamp parltʼasipjjañaparaki.

16. ¿Mä wawar Bibliat yatichasajj kunsa amtañasa?

¹⁶ Mä awkitï wawaparu Bibliat yatichañasatak mayistani ukhajja, janiw kuntï awkipajj lurañapäki ukanak lurañasäkiti. Awisajj Jehová Diosar jan uñtʼiri awk taykani mä wawaruw Bibliat yatichsna. Ukhamäni ukhajja, awk taykapan uñjkata, experienciani mä cristianon uñjkata, jan ukajj yaqhanakan uñjkataw yatichañasa. Ukaw mayninakamp jan walit jan uñjayasiñatakejj yanaptʼistani. Tiempompejj inas awk taykapajj Jehová Diosat yatichapjjchispa.

17. ¿Kunjamsa wawanakajj familiapar yanaptʼapjjaspa?

¹⁷ Jehová Diosar munasiri, istʼiri wayn tawaqonakajj familiaparuw chuymachtʼapjjaspa, chʼamañchtʼapjjarakispa. ¿Kunjamsa? Awk taykaparojj respetompiw uñjapjjañapa, yanaptʼañatakis chʼamachasipjjañapawa. Wawanakatï Diosar taqe chuyma servipjjanejja, familpachaw chʼamañchtʼasipjjani. Uma Juiciojj janïr purinkäna ukhajja, Lamec chachajj Jehová Diosaruw servïna. Jupajj Noé wawapat akham sänwa: “Tatitu Diosaw aka oraqerojj maldice, yapuchañasatakisti wali chʼama tukuñasawa; ukampis aka wawaw samarayistani” sasa. Uka profeciajja, Uma Juicion Jehová Diosajj taqe jan walinak oraqet chhaqtaykäna ukhaw phoqasïna (Gén. 5:29; 8:21). Jichhürunakanjja, Jehová Diosatakjam sarnaqasaw wawanakajj familiapar kusisiyapjjaspa. Jupanakaw familiaparojj jichhasa jutïrinsa, jan walinakan aguantapjjañapatak yanaptʼapjjaspa.

18. Jan walinakan uñjaskañäni ukhajja, ¿kunas aguantaskakiñatak yanaptʼistaspa?

¹⁸ Jichhürunakanjja, Jehová Diosan servirinakapajj Jupat mayisisa, Diosan nayra servirinakapat Biblian qellqatäki ukat lupʼisa, jilat kullakanakampi sum apasisaw chuymachtʼatäpjjaspa (Salmo 145:18, 19 liytʼañataki). Amtapuniñäni, Jehová Diosakiw taqe llakinakasan chuymachistaspa, ukaw jan walinakan aguantañatak yanaptʼistani.