Aka revista liytʼirinakan jisktʼäwinakapa

¿Purak manqhan jiwxapxi uka wawanakax jaktanipxaniti?

Kunapachatï maynix mä jiwat wawa ususi ukhaxa, wali llakitapuniw uñjasi. Ukat khitinakatï ukhaman jan jikxatasiñ yatipki ukanakaxa, kunja llakkañas ukx janiw sum amuyapkiti. Uka tuqit amuytʼañatakix mä kullakat parltʼañäni, jupax phisqa kutiw jiwat wawa ususitayna. Uka qhipat pä wawanïkchïnsa janiw uka phisqa wawanakapat armaskänti. Uka phisqa wawanakapax qhawqha maranakanïxapxasapänsa uk jiwañapkamaw amtasïna. Ukham jan waltʼäwin jikxatasiñ yatipki uka awk taykanakaxa, ¿uka wawax jaktaniniw sasax suyapxaspati?

Chiqas janiw uk yatktanti, kunattix Biblianxa janïr yurkipan jiwapxi uka wawanakax jaktanipxaniwa sasax janiw qhanañchkiti. Ukampis Diosan Arupanxa wali suma chuymachtʼkir arunakwa jikxattanxa.

Janïr uka tuqit parlkasaxa, aka pä jisktʼar qhanañchañäni: 1) ¿Kunapachas Jehová Diosatakix jakäwix qallti, purak manqhan wawax utjxi ukhati jan ukax yurxi ukhacha? 2) ¿Janïr yurki uka wawarux mä jaqirjamat Diosax uñjpacha? Bibliaw uka pä jisktʼanakarux sumpach qhanañchi.

Jehová Diosax Moisés tuqi Leyinak churkäna ukarjamaxa, mä wawan jakäwipax janiw yurki ukhakix qalltkiti, jan ukasti purakan utjañ qalltxi ukhatpachaw Diosatakix utjxi. Ukat khititix purakankaskïr wawar jiwayaspäna ukaxa, jiwayatäñaparakïnwa. Uka Leyix akham siwa: ‘jakañat jakañwa’ kuttʼayasiñapa sasa (Éxo. 21:22, 23, NM). * Ukhamasti, purakankki uka wawaxa, Diosatakix mä jaqïxiwa. Uka tuqit yatxatañaxa, kunatsa wawa jaqsuña jan ukax apsuyasiñax Diosatakix wali jachʼa juchaxa, ukwa cristianonakarux sumpach amuytʼayi.

Kunjamtï uñjktanxa, kunapachatï wawax purakan utjxi ukhatpachaw jakäwix qalltxi. Ukhamaxa, ¿Jehová Diosatakix kunja askïpachas uka wawaxa? Kunjamtï uka Leyin siskixa, khititï mä wawar purak manqhan jiwayaspäna ukaxa, jiwayatäñaparakïnwa. Ukhamasti, uka wawan jakäwipaxa Jehová Diosatakix wali askipunïnwa. Ukat purak manqhankki uka wawaruxa mä jaqirjamaw uñji, ukhamwa Bibliax qhanañchi. Amuytʼañataki, David reyix akham sasaw Jehová Diosar säna: “Taykaxan purakapan utjayasista [...]. Nayranakamax lurat janchix uñjäna; ukanakasti taqpachaw qillqatamar qillqantasïna. Jakañ urunakaxax suma jakhutänwa” sasa (Sal. 139:13-16; Job 31:14, 15).

Wawanakax kunjamäpxis ukaxa, sumwa Jehová Diosax uñji. Uka tuqit amuytʼañatakixa, Isaacan Rebeca sat warmipat parltʼañäni, jupax ispa wawanakat usurïnwa, ukat uka pä wawapax purak manqhanwa nuwasipxäna. Uk uñjasaw Jehová Diosax uka wawanakatxa mä profecía arsutayna, ukhamasti uka wawanakax kunjamäpxanisa uk yatkaspas ukhamänwa (Gén. 25:22, 23; Rom. 9:10-13).

Jichhax Bautisir Juanat parltʼarakiñäni. Bibliax akham siwa: “Kunapachatix Elisabetax Marian aruntatap istʼkän, ukapachaw purakapan wawax unxti. Elisabetasti qullan ajayumpi phuqtʼatänwa” sasa (Luc. 1:41). Aka chiqanxa Lucas sat qullirix griego arut qillqatarjamaxa, purakankaskir wawatsa ukat yuritäxi uka wawatsa parlkaspa ukhamawa. Chiqas Jesusax uywanakar manqʼa liwañ patan ichnuqatäskäna uka tuqit parlañatakiw uka pachpa aru Lucasax aytaraki (Luc. 2:12, 16; 18:15).

¿Purakankaskir wawasa ukat yurxi uka wawasa janiw kikpakïpkiti sasat Bibliax yatichi? Janiwa. Ukampis janiw Biblia sapakix uka  tuqit ukham parlkiti, jan ukasti ciencia tuqit yatxattʼat jaqinakas ukham sapxarakiwa. Amuytʼañataki, purakankaskir mä wawax kuntï taykapax lurki ukxa amuyiwa sasaw sapxi. Ukatwa taykanakax purak manqhankki uka wawapampix sum yatinuqtapxaraki.

Ukampis kunapachatï ususipxixa, mayj mayjwa ususiñ yatipxi. Uk pä tuqit amuytʼañäni. Inas maynïrix janïr phaxsinak phuqatäkipan ususchispa ukat wawax mä qhawqha urunakat jiwxchispa. Ukat inas yaqhax phaxsi phuqatäxchi ukat janïr yurkipan jiwxchi. ¿Ukhamasti kawkïr wawatix janïr phaxsinak phuqkasin yurki ukat jiwxi ukaw jaktanini sañäspati?

Chiqas wawax purak manqhan utjxi ukhatpachaw jakäwinïxi, ukat Jehová Diosax sapa mayniruw mä jaqirjam uñji ukat wali askirakiwa sasaw Bibliax qhanañchi. Ukhamasti, janïr yuripkipan purak manqhan jiwapki uka wawanakax janiw jaktanipkaniti sañax janiw walïkiti sasaw yaqhip jilat kullakanakax sapxaspa. Uka wawanakax janiw jaktanipkaniti sasinxa, purakan wawa jiwayañasa ukat apsuyasiñasa walikiw sisknas ukhamäspawa sasaw sapxaspa, ukampis kunjamatï uñjawaytanxa Bibliax janiw ukham yatichkiti.

Aka kasta revistanxa, niya ukham jisktʼanakatwa nayrax qhanañchasirakïna. Janïr yuripkipan jiwapki uka wawanakax jutïrin jakañatak mä suytʼäwinïpkaspas ukhamwa amuytʼayäna. Mä jisktʼax akham sänwa: “Kunapachatï wawax purak manqhan utjañ qalltxi ukat jiwxi ukhaxa, ¿Diosax Paraison uka wawxa mä warmin purakaparuti uchpachäni?” sasa. Ukampisa, Uraqpachan Jilïr Irpirinakaxa, uka tuqit yatxatasin lupʼisa ukat Diosar mayisisaxa, akham sapxiwa: ‘Jiwatanakax jaktanipxaniw siski uka tuqit kuna suytʼäwinïktantï ukxa, janiw uka jisktʼanakax mayjtʼaykaspati’ sasa. Jesusax akham sänwa: “Jaqinakatakix janiw ukax luraskaspati, ukampis Diosatakix lurasikiwa, jupatakisti janiw kunas chʼamäkiti” sasa (Mar. 10:27). Ukhamäskapuniwa, Jehová Diosaw munat Yuqapan jakäwipxa Marian purakapar uchatayna, janiw jaqinakax uk lurapkaspati.

Ukhamaxa, ¿janïr yuripkipan jiwapki uka wawanakax jaktanipxaniw sañti munpacha? Chiqansa, Bibliax uka tuqit janiw qhanañchkiti, ukhamax janiw akhamäpachaw jan ukax ukhamäpachaw sañax wakiskaspati. Uka tuqinakat jan sum yatkasin parlañax kunayman jisktʼanakaruw apistaspa, ukhamax janipuniw jilamp jilampi parlañax wakiskaspati. Kunattix Jehová Dios sapakiw kuntï lurkani ukxa yati, Jupasti khuyapayasiri, munasiri ukham Diosawa (Sal. 86:15). Jupax taqi chuymawa aka jan waltʼäwinak askichañ muni, ukat jiwatanakarus jaktayanirakiniwa, ukax wali kusiskañäniwa (Job 14:14, 15). Chiqpachansa, kunatï chiqäki ukpunwa lurani. Jehová Diosax “Supayan luratanakap tʼunjiriwa” Yuqapar khitanini, ukhamatwa kunatï akapachan tʼaqhisiykistu ukanak chhaqtayani (1 Juan 3:8).

[Qhanañchäwi]

[13 janan fotopa]

Kunatï akapachan tʼaqhisiykistu ukanakwa Jehová Diosax chhaqtayani