26 YATICHÄWI
¿Kunatsa jan walinakasa tʼaqesiñanakas wal utji?
Mä jan wali utjipanjja, “¿kunatsa ukanakajj utji?” sasaw jaqenakajj jisktʼasiñ yatipjje. Bibliaw uka jisktʼarojj wali sum qhanañchi, ¡uk yatiñajj walpun chuymachtʼistu!
1. ¿Kunjamatsa Supayajj jan walinak akapachan uñstayäna?
Supayajj Dios contraw saytʼäna. Niyakejjay jupajj adoratäñ munchïnjja, Adanampi Evampirojj Dios contraw saytʼayarakïna. Jupanakar pantjasiyañatakejj Eva warmiruw kʼarinak parläna (Génesis 3:1-5). Jehová Diosajj mä kunats jupar jarkʼkaspa, ukhamwa Eva warmirojj amuyayäna. Mä arunjja jaqenakatï Diosar jan istʼas sarnaqapjjaspajja, jukʼamp kusisitaw jakasipjjaspa sañwa munaskäna. Jumanakajj janiw jiwapkätati sasin Evar siskäna ukhaw Supayajj nayrïr kut kʼarisïna, ukatwa Supayajj ‘kʼariwa, kʼarin awkiparakiwa’ sasin Bibliajj qhanañchi (Juan 8:44).
2. ¿Kunsa Adanampi Evampejj amtapjjäna?
Jehová Diosajj Adanampir Evampirojj taqe kunwa churäna. Jupanakajj Edén jardinan utjki taqe uka qoqanakat (jan ukajj arbolanakat) manqʼasipkaspänwa, mä qoqatakwa jan manqʼapjjañapäkänti (Génesis 2:15-17). Ukampis jupanakajj uka qoqan achup manqʼantañwa amtapjjäna. Eva warmejj ‘uka qoqan achup apaqasinwa manqʼantäna’. Qhepatjja Adán chachapaw ‘manqʼantarakïna’ (Génesis 3:6). Ukhamatwa panpachanejj Diosar jan istʼapkänti. Niyakejjay Adanampi Evampejj perfecto jaqenakäpjjchïnjja, kunatï cheqäki ukwa lurapjjañapäna. Ukampis amanut Diosar jan istʼañ amtasajja jupanakajj juchachasipjjänwa, janirakiw Diosamp gobiernatäñsa munjjapjjänti. Ukham amtapjjatapatwa jupanakajj wal tʼaqesipjjäna (Génesis 3:16-19).
3. ¿Adanampin Evampin pantjasitapajj kuna jan walinakarus aptʼawayistu?
Juchachasisajja Adanampi Evampejj janiw perfectöjjapjjänti, wawanakapas juchararäjjapjjarakïnwa. Adanat parlkasajja Bibliajj akham siwa: “Mä sapa jaqen juchapatwa juchajj aka mundor mantani, uka juchan utjatapatwa jiwañajj mantaniraki, ukhamatwa jiwañajj taqe jaqenakar katunti” sasa (Romanos 5:12).
¿Ukhamajj kunatsa tʼaqesiñajj utji? Awisajja jiwas pachpaw jan wali amtanakar purtanjja, awisasti mayninakan jan wal amtapjjatapatwa tʼaqestanjja, jan ukajj mä akatjamat jan walinakan uñjasitasatwa tʼaqestanjja (Eclesiastés 9:11 liytʼäta).
JUKʼAMP YATJJATAÑÄNI
Akapachan jan walinak utjatapatsa tʼaqesiñanak utjatapatsa, Diosarojj kunatsa jan juchañchañasäki, jiwasar tʼaqesir uñjasajj qhawqsa Diosajj chuymap usuyasi uka toqenakatwa jichhajj yatjjatañäni.
4. Supayaw jan walinak utjatapat juchanejja
Diosas aka oraq apnaqkaspa ukhamwa walja jaqenakajj amuyapjje. ¿Ukampis ukajj cheqäpachati? VIDEO uñtapjjäta.
Santiago 1:13; 1 Juan 5:19 liytʼasajja aka toqetwa parltʼapjjäta:
-
¿Jan walinak utjañapatakisa tʼaqesiñ utjañapatakisa Diosat juchanïpacha?
5. Supayajj kunayman jan walinakwa utjayawayi
Génesis 3:1-6 liytʼasajja aka toqetwa parltʼapjjäta:
-
¿Kamsasas Supayajj kʼarisïna? (Génesis 3:4, 5 uñjjattʼapjjäta).
-
Mä kunatsa Jehová Diosajj jaqenakar jarkʼkaspa ukhamwa Supayajj amuyayäna, ¿kunjamsa uk luräna?
-
Supayan arsutaparjamajja, ¿kusisit jakasiñatakejj Jehová Diosamp gobiernatäñasajj wakisiti?
Eclesiastés 8:9 liytʼasajja aka toqetwa parltʼapjjäta:
-
Jehová Diosajj janiw jichhakamajj aka oraq gobiernkiti, ¿kuna jan walinakas ukhamïpan utjawayi?
-
Adanampi Evampejj perfectöpjjänwa, paraisonwa jakapjjarakïna. Ukampis Supayaruw istʼapjjäna, Jehová Dios contraw saytʼapjjarakïna.
-
Dios contra saytʼapjjatapatwa juchasa, tʼaqesiñasa, jiwañas aka oraqpachan utjawayi.
-
Jehová Diosaw juchsa, tʼaqesiñsa, jiwañsa chhaqtayani. Jaqenakajj mayampiw perfectöjjapjjani, paraisonwa jakapjjarakini.
6. Jiwasar tʼaqesir uñjasajj Jehová Diosajj wal llakisi
Tʼaqesitasajj wal Diosar llakisiyi. David reyisa apóstol Pedrosa kunsa qellqapjjäna uk amuytʼañäni. Salmo 31:7; 1 Pedro 5:7 liytʼasajja aka toqetwa parltʼapjjäta:
-
Jehová Diosajj kuna llakinakanïtansa uk sum uñjaski, tʼaqestan ukhas llakisirakiwa, ¿uk yatiñajj jumatakejj kunjamakisa?
7. Diosaw tʼaqesiñanak qʼal chhaqtayani
Isaías 65:17; Apocalipsis 21:3, 4 liytʼasajja aka toqetwa parltʼapjjäta:
-
Kunanakatï jaqenakar tʼaqesiyki ukanak qʼal chhaqtayäjja, jan walinaksa askicharakïwa sasaw Jehová Diosajj arsu, ¿uk yatiñajj jumar chuymachtʼtamti? ¿Kunatsa ukham amuyta?
¿Yatiyätati?
Nayrïr kuti kʼarisisajja, Supayajj Jehová Diosaruw kʼarintäna. Diosajj janis cheqaparjam apnaqkaspa janis suma gobernantëkaspa ukham amuyayasajja, Diosan sutipwa qʼañuchäna. Mä jukʼa tiempotjja, kunanakatï jaqenakar tʼaqesiyki ukanak chhaqtayasajj Diosajj jupa pachpaw jachʼañchasini, sutipsa qʼomacharakiniwa. Mä arunjja gobiernopan wali sumätapwa Diosajj uñachtʼayani. Jehová Diosan sutip qʼomachatäñapajj wali wakiskiriwa (Mateo 6:9, 10).
YAQHEPANAKAJJ AKHAM SAPJJEWA: “Diosajj tʼaqesiñatakiw lurawayistu” sasa.
-
¿Jumajj uka toqet kamsasmasa?
¿KUNSA YATEQAWAYTAN?
Aka oraqen jan walinak utjañapatakejj Supayampi Adanampi Evampiw juchanïpjje. Jiwasar tʼaqesir uñjasajja Jehová Diosajj wal llakisi, niyarakiw taqe jan walinak chhaqtayani.
Amtañataki
-
¿Supayajj kuna kʼari arunaksa Evarojj säna?
-
Adanampin Evampin Dios contra saytʼasipjjatapajja, ¿kuna jan walinakarus aptʼawayistu?
-
Jaqenakar tʼaqesir uñjasajj Jehová Diosajj wal llakisi, ¿kunatsa ukham sistanjja?
JUKʼAMP YATJJATAÑAMATAKI
Bibliarjamajj ‘jucha’ arojj kamsañsa muni uk yatjjatam.
Kunjamsa Supayajj Edén jardinan Diosar kʼarintäna uka toqet yatjjatam.
“¿Kunatsa Diosajj tʼaqesiñanak jan jankʼak tukjkpacha?” (Yatiyañataki enero 1, 2014)
Kunjamsa mä wali chʼama jisktʼarojj qhanañchasi, kunjamsa ukajj chuymachtʼarakistu uk yatjjatam.
“¿Por qué sucedió el Holocausto judío? ¿Por qué Dios no lo impidió?” (Artículo de jw.org)
Jan walinakan uñjasis tʼaqesiri mä chachajj kunsa yateqäna uk videon uñtam.
Akanakajj inas gustarakiristam
KUNANAKSA JUKʼAMP JISKTʼASIPJJE
¿Kunjamsa Jehová Diosan Testigonakapajj Bibliat yatichapjje?
Jehová Diosan Testigonakapajj gratisakiw Bibliat yatichapjje, kawknïr Bibliampis yateqañ munta ukajj jumatäjjewa. Jumamp chika yateqapjjañapatakejja, taqpach familiamaruw invittʼasma, amistadanakamarus invittʼarakismawa.
