RIWIɄKWEYNA 8
Chʉwi zanámʉri Niwipawseʼ éykʉchʉ zʉnʉn aʼzʉnameʼ ki nanʉnno
1. Du zanuʼ neykari azi nari kwakumana nanʉnno
Sakuku anisi azoye neki, du zanuʼ neykari kʉchunha awkwéy nanuʼ ni kazʉn awʉngwasi, Niwipáwseʼri ikʉ́nhaseʼ reʼgukʉngwasi kʉchusa awaki nuga ni
Kaʼseʼ Ikʉnusi rigasey awʉn núkʉkin du zanuʼ neykari kwákuma una ni. Ari ánugwe duna nariri kʉzanukuʼ neyka nʉnneki, «ta neykari ta naʼnó aʼzanuʼ nari ʉnchusa una ni» (Juan 8:44). Niwipáw nʉʼkin kʉgamʉkariza nanʉn nugeʼ, a ayeygwi nʉkʉgamʉkana awiza nʉndi aʼzʉnna ni. Awiri Ewa Niwipáw aʼnoʼkuʼ nari, a zʉʼn aʼnoʼkwʉngwasi ʉnkʉreʼbesʉngwaʼsa una ni. Adanri azey aʼmía niʼnaygwi noʼkuʼgwi nʉnna ni. Ey anowye pari, chʉwi zanamʉ awiri wichi zweykwa zʉʼn o aʼzanika una ni. Génesis 3:1-6, 19 aʼgwa ú.
Ikʉnúsiri o reʼkusi Ewa Niwipáw aʼnoʼkuʼ nánʉkwa key áykʉnʉ rinreʼgow una ni. Jeuwá nʉʼkin reʼgukʉkwéy kʉnariri Ingumʉ́n aʼzʉna neyka ni; ey ʉweʼki, Ikʉnusiseʼri eméy awizáy naʼnó neki aʼzanuʼ nʉnna ni. Sʉmʉ íkʉri Ikʉnusi zʉʼn aʼnoʼsiri Niwipáw niwikʉreʼgukizáy naʼnó neki aʼzanuʼ neyka nameʼ, «Kaʼgʉmʉseʼri [Ikʉnusi] sakuku nanʉn nuga kawa ni». Luka 4:6; Juan 14:30 aʼgwa ú.
2. Niwipawri ínʉri awanó kawi ki gownʉnno
Jeuwaseʼ gowna neykari awanó neki kauʼ neyka ni. Ikʉ eʼ zanʉn awiri ánugwe ɉinari azi nenʉ́n awʉnki Niwipáw ʉnkaʼnoʼkwa awkwéy kʉnʉnna ni (Deuteronomio 32:4, 5). Ari duna awiri du nanuʼ neyka ʉnkito awkwéy nari niwigowna ni. Du neyka ʉnkitosi zweindi, a aguzari ʉnkaʼnóʼkwʉya chwizʉnhásʉkwa nʉngwa ni. Santiago 1:13-15; 1 Juan 5:3 aʼgwa ú.
3. Niwipawri chʉwi zanámʉri éykʉchʉ zʉnʉn ki aʼzanʉnno
Jeuwari reʼguka awizáy naʼnó izanuʼ neykari ingʉ́ nánʉkin zʉʼn éykʉchʉ nʉnzanó aʼzʉnki nuga ni. Íkʉri manʉnkaʼ kingwi ʉnkʉreʼgukawa yʉkwari aʼmʉkanuʼ neyka ni aʼzʉn awʉngwasi neyka ni (Eclesiastés 7:29; 8:9). Chinwa mir kʉgi ʉnzʉneʼ neki, sakuku ɉinari du zanuʼ nari, chʉwi zanamʉ awiri rinhagwasi azoya neykari kʉchunha awkwéy kʉnanuʼ ni kinki aʼchukwéy zari nakʉn nuga ni. Jeremías 10:23; Romanos 9:17 aʼgwa ú.
Ey ʉweʼki, Niwipáw niwikʉreʼgukʉngwaʼsa awkwa nanʉngeʼri, niwikaʼmʉkana awʉngwa ni (Isaías 48:17, 18). Jeuwari bin zanuʼgwi ikʉ reʼgukawa winyʉn nugari kʉchunha awʉngwa ni. Kaʼseʼri Niwipawseʼ Reʼgukʉngwasi Chusana twiré kʉya zʉʼn kwʉngwa ni (Isaías 11:9). Daniel 2:44 aʼgwa ú.
Widew Chʉwi zanámʉri Niwipawseʼ éykʉchʉ zʉnʉn aʼzʉnameʼ ki nanʉnno chwa ú
4. Niwipawri eyki waʼsi zwein nugeʼri azi nikamʉ niwikawʉnno
Íkʉri du aʼzanʉngeʼ zʉʼn Niwipáw kaʼmʉkánʉya ni, Ikʉnúsiri yana ni. Niwipawri mʉná aʼmechi zwein nugeʼri, azey azey kwey zweykwáʼbari Ikʉnúsiri digasey una kawiri aɉwa sakuku twiré keiʼ nari, Niwipawseʼ Reʼgukʉngwasi Chusana nʉʼkin twiré kʉyamʉ kawa ni. Job 1:8-12; Proverbios 27:11 aʼgwa ú.
5. Azi nisi Niwipáw sí nika awkwéy niwikʉnanʉnno
Azey azey kwey zweykwáʼbari Niwipáw niwikʉreʼguka unari niweʼzʉna kwa auʼ nanʉndi meʼzánʉkwa neyka chwizʉnhásʉkwa ni
Minsaʼgwi, azi kawi Niwipáw kaʼmʉkanamʉ kawʉnno migʉnchonamʉ kawa ni. Ey unayu nʉngwari, Bibriaseʼ azi kinki kawi kaʼmʉkánʉkwa yay zoyamʉ kawa ni (Juan 4:23). Awiri Ikʉnúsiseʼ reʼgukamʉ kʉnanʉn nuga twiré keiʼ nanʉkwásiri, Jesú niʼnaygwi nisi, sakuku twiré keiʼ nariri, iʼngeygwi zi aʼzuʼ nari zoyamʉ kawa ni. Juan 17:14 aʼgwa ú.
Ikʉnúsiri ɉumamʉ kʉnʉna nameʼ, íkʉri du nikwe aʼzari gunti du nanuʼ neyka unisi awiri tinku nikʉngwaʼsa ʉwa ni. Ayeygwi nikuʼ nakʉchari amiɉúnʉkʉnʉ kwa amisinámʉri osʉn migwasi nanʉndi buníʼgʉmʉ meʼkusa kiawagwi awiza ni (1 Pedro 4:3, 4). Eméy unigeʼri, Niwipáw aguzari zoya tasiri a zʉgaʼkʉnamʉ ʉnkaʼnoʼsi zweykwa. Íkʉri du aʼzanʉngwa aʼzari Niwipáw kaʼmʉkánʉya ni Ikʉnusi yana neykari digasey una kinki kawʉngwa ni. 1 Corintios 6:9, 10; 15:33 aʼgwa ú.
Niwipawri niwinhaguzʉna nameʼ, du zanuʼ neyka awiri chʉwi zanamʉ kwʉn nugari kʉchunha awʉngwa ni. Niwipáw sí ta naʼnó aʼzari winzoyari Kaʼseʼ aʼkwa winkwʉngwa ni. Juan 3:16 aʼgwa ú.
