Ma Marko ukiewo 5:1-43
5 I ng’eye, gikadhu loka nam i ng’om mi Jugeraza.
2 Kinde ma Yesu ulor kud i yei ci, e ng’atu moko ma tipo m’ucido n’i iye uai kud i kind kabuli man ubino i bang’e.
3 Kabedo pare ubino i kind kabuli, man nitundo saa maeno nwang’u ng’atu moko mbe ma copo twiye kara ebed yoo, kadok ku nyoro.
4 Jubed jutwiyo cinge wang’ ma pol ku nyoro man tiende ke ku kongo, ento ebed erwadu nyorone man eturo kongone de cen; uketho ng’atu moko mbe m’ubino ku tego mi dwoke mol.
5 Dieceng’ ku diewor, ebed ekok ma tek i kind kabuli man iwi gudi, man ebed ethumo kume ku kidi.
6 Ento kinde m’eneno Yesu ku bor, ering’ini i bang’e man ewok erum i wang’e.
7 E ekok ku dwande ma tek kumae: “Lembang’o i kindwa wakudi, Yesu, Wod Mungu ma Malu ngbiri? Kwong’ ira ku nying’ Mungu nia ibimiyo ngo ira masendi.”
8 Kum nwang’u Yesu uyero ire kumae: “Tipo m’ucido, wok cen kud i ng’atu maeni.”
9 Yesu ulund upenje kumae: “Nyingi ng’a?” Edwoko kumae: “Nyinga udul,* pilembe wa dupa.”
10 Man epaku dhoge wang’ dupa ni Yesu nia kud eor tipo bor kud i ng’om maeca.
11 Nwang’u udul kul ma wendgi lee ubino camu iwi got kakeca.
12 E tipo gikwaye kumae: “Orwa i kul kara wamond i igi.”
13 Egam eyiyo igi. E wang’ acel tipo m’ucido giwok man gicidh gimondo i kul, man udul kul ma wendgi romo elufu ario (2 000), gipiey i nam ku kaka ma lung’* man githung’.
14 Ento ju m’ubino kwayu kulne giringo man gikoro lembene i adhura man i kind pacu, e dhanu ubino pi nineno lembe m’utimere.
15 Pieno, gitundo i bang’ Yesu man gineno ng’atu ma nwang’u udul pajogi umondo i iye ubedo ma bongu ni kume, wiye de ulero, e lworo ma lee umakugi.
16 Bende, ju m’uneno gin maeni gikoro igi pi lembe m’utimere ni ng’atu ma nwang’u pajogi umondo i iye man pi kul.
17 Pieno gicaku kwayu Yesu nia eai cen kud i ng’om migi.
18 Kinde ma Yesu ubeidho i yei, ng’atu ma nwang’u pajogi umondo i iye ukwaye nia gicidh gikude.
19 Re eyiyo ngo ire, ento ewacu ire kumae: “Dok i pacu i bang’ wedi peri, man ikor igi pi lembe ceke ma Yehova utimo iri man pi kisa m’enyutho iri.”
20 Ng’atu maeno ugam ucidho man ecaku rweyo i Dekapoli* pi lembe ceke ma Yesu utimo ire, e i dhanu zoo uwang’ lii.
21 Kinde ma Yesu ukadhu kendo ku yei i dhu wat ma yo lokani, udul dhanu ma dit ucokiri i bang’e nwang’u en’i dhu nam kakeca.
22 Ng’atu acel m’i kind judongo mi sinagog ma nyinge Yairo ubino i bang’e, man saa m’enene, epodho piny i the tiende.
23 Epaku dhoge wang’ dupa ire kumae: “Nyathi nyara uberemo lee dit.* Abekweyi, bin iketh cingi i wiye kara kume ukey man ebed kwo.”
24 Wang’ acel Yesu ucidho karacelo kude, man udul dhanu ma dit ubino lubo toke ma gibecung’iri i kume.
25 Nwang’u dhaku moko ubino nuti ma rimo ucwir kud i kume pi oro apar ario (12).
26 Esendere lee dit* i cing’ ba munganga dupa man enyotho jamcinge ceke, re alokaloka ubino mbe, ento twoyo pare udoko rac magwei.
27 Kinde m’ewinjo pi Yesu, ebino kud i kind udul dhanu yor i ng’eye, man emulo dhu bongu* pare,
28 kum ebino wacu kumae: “Kan amulo dhu bongu* pare kende ci, e abikey.”
29 E ndhundhu rimo m’ubino cwir i kume ugam ucungo, man ewinjere i kume nia twoyo ma rac ma nwang’u ubesende udaru key.
30 Yesu unyang’ wang’ acel nia tego moko uwok kud i kume, pieno elokere i bang’ udul dhanu man epenjo kumae: “Ng’a m’umulo kendi para ma yo woko?”
31 Ento julubne giwacu ire kumae: “Ibeneno de nia udul dhanu gibecung’iri i kumi, re ilund ipenjo nia, ‘ng’a m’umulo kuma?’”
32 Re asu eloko wang’e kun ku kun pi nineno nia ng’a m’utimo gin maeno.
33 Dhaku maeno ubino i bang’e ma lworo ubenege man kume de ubemiel, pilembe eng’eyo gin m’utimere i kume; ewok epodho piny i wang’e man ekoro ire lemandha ceke.
34 Yesu uwacu ire kumae: “Nyara, yiyoyic peri uketho ikey. Cidh ma cwinyi kwiyo, man dong’ twoyo peri ma rac ukey kud i kumi.”
35 Kinde ma fodi ebeweco, dhanu moko ma giai i pacu pa jadit mi sinagog gibino man giwacu kumae: “Nyeri udaru tho! Ibesendo Japonji asu pirang’o?”
36 Ento Yesu uwinjo wec migi man ewacu ni jadit mi sinagog kumae: “Lworo kud unegi, bed ku yiyoyic kende.”
37 Egam eting’o Pethro, Yakobo, man Yohana m’umin Yakobo ecidho kugi, ento eyiyo ngo ng’atu moko mange ulub toke.
38 Saa ma gitundo i pacu pa jadit mi sinagog, ewok enwang’u woy ma dit pilembe dhanu ubewak man ubegoyo nduru ma tek.
39 Kinde m’emondo i ot, ewacu igi kumae: “Pirang’o wubewak man wubewoy kumeni? Nyathin utho ngo, ento enindo aninda.”
40 Kinde ma giwinjo lembe maeno, gicaku ng’iere ku cac. Ento i ng’ei m’ewodhogi ceke woko, eting’o won nyathin giku min ku ju ma gitie karacelo kude, man ecidho kaka ma nyathin ne ubino i iye.
41 Egam emaku cing’ nyathin ne man ewacu ire kumae: “Talitha kumi,” ka juloke thelembe tie: “Nyathi nyaku, awacu iri, ai malu!”
42 E wang’ acel nyakune uai malu man ecaku wotho. (Nwang’u oro pare ubino apar ario [12].) Ndhundhu anyong’a ma yawe mbe ugam unegogi.
43 Ento eng’olo igi ma tek* nia kud giketh ng’atu moko ung’ey lembe maeno, man ewacu nia kwayu jumii ire piny moko ecam.
