Wa bɔɔ mɔde wawɛɛ kaa wa ma je suɔmi kɛ mi mi jɔmi kpo kɛ tsɔɔ nɔ fɛɛ nɔ, nɛ waa kɛ mɛ nɛ hi si ngɛ bumi mi. Ke nɔ ko ji Yehowa Odasefono, se e gbɔjɔ ngɛ fiɛɛmi yami kɛ asafo mi kpe bami mi aloo e kpa ní nɛ ɔmɛ peemi kulaa a, wa kua we lɛ, mohu ɔ, wa jeɔ suɔmi kpo kɛ tsɔɔ lɛ, nɛ wa bɔɔ mɔde kaa wa maa ye bua lɛ konɛ e ná Mawu jami he bua jɔmi ekohu.​—Luka 15:4-7.

 Be komɛ ɔ, nɔ ko ní peepeehi lɛ ma ha nɛ a je lɛ ngɛ asafo ɔ mi ɔ nɛ. (1 Korintobi 5:13) Se akɛnɛ wa suɔ wa nyɛmimɛ ɔmɛ wawɛɛ he je ɔ, wa bɔɔ mɔde kaa wa maa ye kɛ bua jamɛatsɛ ɔ mla konɛ e ko ba kaa a ma je lɛ kɛ je asafo ɔ mi. Nɛ ke e ba kaa a je lɛ ngɛ asafo ɔ mi po ɔ, wa yaa nɔ nɛ wa jeɔ suɔmi kɛ bumi kpo kɛ tsɔɔ lɛ kaa bɔ nɛ Baiblo ɔ woɔ wɔ he wami kaa waa pee ɔ.​—Marko 12:31; 1 Petro 2:17.

Mɛni haa nɛ a jeɔ nɔ ko kɛ jeɔ asafo ɔ mi?

 Baiblo ɔ tsɔɔ heii kaa ke Kristofono ko pee yayami nɛ hɛdɔ ngɛ he, nɛ e sume kaa e ma tsake e tsui ɔ, e sa nɛ a je lɛ kɛ je asafo ɔ mi. a (1 Korintobi 5:11-13) Baiblo ɔ tsɔɔ yayamihi nɛ hɛdɔ ngɛ a he nɛ ke nɔ ko peeɔ ɔ, a ma nyɛ ma je lɛ kɛ je asafo ɔ mi. Kaa nɔ hyɛmi nɔ́ ɔ, Baiblo ɔ wo yayami komɛ kaa gba puɛmi, dã demi, nɔ gbemi, yiwutso ní nɛ nɔ ko maa pee nihi nɛ a ngɛ e weku ɔ mi ɔ, kɛ jumi ta.​—1 Korintobi 6:9, 10; Galatiabi 5:19-21; 1 Timoteo 1:9, 10.

 Se kɛ̃ ɔ, waa kɛ oya yemi je we nɔ ko nɛ pee yayami nɛ hɛdɔ ngɛ he ɔ kɛ je asafo ɔ mi. Kekleekle ɔ, asafo mi nikɔtɔma amɛ b bɔɔ mɔde kaa a maa ye bua lɛ konɛ e tsake e je mi bami. (Romabi 2:4) A jeɔ mi mi jɔmi, he jɔmi kɛ suɔmi mi kɛ yeɔ buaa lɛ konɛ e nyɛ nɛ e pee tsakemi. (Galatiabi 6:1) Ke a ye bua yayami peelɔ ɔ ngɛ blɔ nɛ ɔ nɔ ɔ, lɔ ɔ ma nyɛ ma ha nɛ e hɛli e he si kaa e tɔ̃ konɛ e pee tsakemi. (2 Timoteo 2:24-26) Ke asafo mi nikɔtɔma amɛ bɔ mɔde si abɔ kaa a maa ye bua lɛ, se e ní peepee tsɔɔ kaa e sume nɛ e kɛ je mi bami he mlaahi nɛ ngɛ Baiblo ɔ mi ɔ ma tsu ní, nɛ e tsakee we e tsui ɔ, lɛɛ e sa nɛ a je lɛ kɛ je asafo ɔ mi. Ke e ba lɛ jã a, asafo mi nikɔtɔma amɛ haa asafo ɔ lemi kaa jamɛatsɛ ɔ pi Yehowa Odasefono ji lɛ hu.

 Mɛni se namihi lɛ jeɔ mi kɛ baa ke a je nɔ ko nɛ e pee yayami nɛ hɛdɔ ngɛ he nɛ́ e sume kaa e ma tsake e tsui ɔ kɛ je asafo ɔ mi? Se nami kake ji kaa, lɔ ɔ haa nɛ asafo ɔ fĩɔ Mawu dami mlaahi nɛ kɔɔ je mi bami nɛ he tsɔ ɔ se, nɛ e poɔ asafo ɔ he piɛ kɛ jeɔ jamɛatsɛ ɔ su yayami ɔmɛ a he. (1 Korintobi 5:6; 15:33; 1 Petro 1:16) Jehanɛ se hu ɔ, lɔ ɔ yeɔ buaa yayami peelɔ ɔ nɛ e jeɔ e he kɛ jeɔ yayami he, nɛ enɛ ɔ haa nɛ e peeɔ tsakemi ngɛ e si himi mi.​—Hebribi 12:11.

Kɛ Yehowa Odasefohi kɛ nihi nɛ a je mɛ kɛ je asafo ɔ mi ɔ yeɔ ha kɛɛ?

 Baiblo ɔ tsɔɔ kaa e sa nɛ Kristofohi kɛ nihi nɛ a je mɛ ngɛ asafo ɔ mi ɔ “nɛ kpa bɔmi,” nɛ a kɛ ‘jamɛ a nɔ ɔ nɛ ko ye ní tete po.’ (1 Korintobi 5:11) Enɛ ɔ he ɔ, waa kɛ nɔ nɛ a je lɛ ngɛ asafo ɔ mi ɔ bɔɛ. Se kɛ̃ ɔ, wa kua we lɛ pɛsɛpɛsɛ. Waa kɛ lɛ yeɔ ngɛ bumi mi. E ma nyɛ maa ba asafo mi kpehi nɛ wa peeɔ ɔ, nɛ wa ma nyɛ ma nga lɛ ke e ba. c Jehanɛ hu e ma nyɛ ma bi asafo mi nikɔtɔma amɛ konɛ a ye bua lɛ nɛ e nyɛ nɛ e kpale kɛ ba Yehowa ngɔ ekohu.

 Nɛ ke a je nyumu ko d kɛ je asafo ɔ mi, se e yo kɛ e bimɛ lɛɛ loloolo ɔ, a ji Yehowa Odasefohi ɔ hu nɛɛ? E be nyɛe nɛ e kɛ e weku ɔ maa pee kake ngɛ Mawu jami mi, se weku kpa nɛ ngɛ a kpɛti kaa weku ɔ lɛɛ e mi pui. Akɛnɛ mɛ tsuo a ngɛ we kake mi he je ɔ, e gba si himi ɔ kɛ suɔmi kpo nɛ a ma je kɛ tsɔɔ a sibi kaa weku ɔ maa ya nɔ.

 Nɔ nɛ a je lɛ ngɛ asafo ɔ mi ɔ ma nyɛ ma bi asafo mi nikɔtɔma amɛ a yemi kɛ buami, nɛ a maa je Ngmami ɔ mi kɛ ye bua lɛ konɛ e nyɛ nɛ e pee tsakemi nɛ e kpale kɛ ba Yehowa ngɔ ekohu. (Zakaria 1:3) Ke e kua e je mi bami yaya a, nɛ e suɔ kaa e kɛ je mi bami he mlaahi nɛ ngɛ Baiblo ɔ mi ɔ ma tsu ní daa a, a ngɔɔ lɛ ngɛ asafo ɔ mi ekohu kaa Yehowa Odasefono. Nyɛmimɛ nɛ a ngɛ asafo mi ɔ ‘jeɔ mi mi himi mi nɛ a kɛ e yayami ɔ keɔ lɛ nɛ a woɔ e bua,’ kaa bɔ nɛ Kristofohi nɛ a hi si ngɛ Korinto ɔ pee benɛ yayami peelɔ ko tsake ɔ.​—2 Korintobi 2:6-8.

Kɛ nihi nɛ a je mɛ ngɛ asafo ɔ mi be ko nɛ be ɔ nuɔ he ha kɛɛ?

 Moo hyɛ níhi nɛ Yehowa Odasefohi komɛ nɛ be ko nɛ be ɔ a je mɛ kɛ je asafo ɔ mi nɛ pee se ɔ, a kpale kɛ ba Mawu ngɔ ɔ de.

 “Benɛ i ma ye juɛmi nya si kaa ma kpale kɛ ba asafo ɔ mi ekohu ɔ, i susu kaa nikɔtɔma amɛ maa suɔ nɛ a le níhi tsuo nɛ i pee ngɛ jeha babauu nɛ a kɛ je mi ngɛ asafo ɔ mi ɔ. Se nɔ́ nɛ a de mohu ji, ‘Wa suɔ nɛ o ngɔ o juɛmi kɛ ma níhi nɛ o ma nyɛ maa pee amlɔ nɛ ɔ nɔ.’ Benɛ a de jã a kɛkɛ nɛ ye tsui nɔ ye mi.”​—Maria, United States.

 “Asafo ɔ tsuo bua jɔ kaa i kpale kɛ ba. I nu he kaa ye he jua wa. Nyɛmimɛ ɔmɛ nɛ a ngɛ ye we asafo ɔ mi ɔ ha nɛ i na kaa a kɛ Yehowa tsuo ngɔ ye he yayami ɔmɛ kɛ ke mi, nɛ enɛ ɔ wo mi he wami konɛ ma ya ye hɛ mi. Asafo mi nikɔtɔma amɛ pee klaalo kaa a maa ye bua mi kɛ dla huɛ bɔmi nɛ ngɛ i kɛ Yehowa wa kpɛti ɔ. A wo ye bua nɛ a ha nɛ i na kaa ye he jua wa ha Yehowa loloolo, nɛ e suɔ mi.”​—Malcom, Sierra Leone.

 “Ye bua jɔ kaa Yehowa suɔ e we bi wawɛɛ, nɛ e suɔ nɛ asafo ɔ he nɛ tsɔ. E ngɛ mi kaa nihi nɛ a sɔmɔ we Yehowa a maa na blɔ tsɔɔmi nɛ Ngmami ɔ kɛ ha kaa a je yayami peelɔ kɛ je asafo mi ɔ kaa e ngɛ kpɛii tsɔ mohu lɛɛ, se e ji nɔ́ ko nɛ he hia nɛ e tsɔɔ suɔmi hulɔ. I naa wa hiɔwe Tsɛ ɔ si kaa e ji Mawu nɛ ngɛ suɔmi nɛ e kɛ yayaymi keɔ.”​—Sandi, United States.