Petro Klekleekle Womi 2:1-25
2 Lɔ ɔ he ɔ, nyɛ je nɔ́ yaya fɛɛ nɔ́ yaya,+ kɛ nɔ sisimi kɛ osato kɛ hɛkɔ kɛ nɔ he munyu yaya tumi tsuo kɛ je nyɛ he.
2 Nyɛ ha nɛ munyu ɔ nyɔ nyu nɛ a futuu we mi* ɔ nɛ jlo nyɛ kaa bimwɔwi nɛ a fɔ mɛ ehe,+ konɛ kɛ gu lɔ ɔ nɔ ɔ, nyɛɛ wa kɛ su yi wami hemi he,+
3 ke ji kaa nyɛ sa nyɛ nya* nɛ nyɛ na kaa Nyɔmtsɛ ɔ mi mi jɔ ɔ.
4 Ejakaa nyɛ hɛ kɛ su e he kaa tɛ nɛ hɛ ngɛ, e ngɛ mi kaa nihi kua lɛ mohu lɛɛ,+ se Mawu hla lɛ nɛ e he jua wa kɛ ha lɛ.+
5 Nyɛ nitsɛmɛ hu nyɛ ngɛ kaa tɛhi nɛ a hɛ ngɛ, nɛ a ngɛ nyɛ fiae kɛ ngɛ mumi mi we mae+ konɛ nyɛɛ pee osɔfohi a kuu klɔuklɔu bɔ nɛ pee nɛ nyɛɛ sã mumi mi afɔlehi+ nɛ Mawu kplɛɛ nɔ kɛ gu Yesu Kristo nɔ.+
6 Ejakaa a de ngɛ Ngmami ɔ mi ke: “Hyɛ! i ngɛ tɛ nɛ a hla ko toe ngɛ Zion, sisi tomi kɔ nya tɛ nɛ he jua wa, nɛ nɔ fɛɛ nɔ nɛ e heɔ lɛ yeɔ ɔ nine be si nyɛe* ligbi ko ligbi ko.”+
7 Enɛ ɔ he ɔ, nyɛ lɛ e he jua wa kɛ ha, ejakaa nyɛ ji nihi nɛ nyɛ he ye; se kɛ ha ni nɛmɛ nɛ a he we yi ɔ lɛɛ, “tɛ ɔ nɛ tsu mali ɔmɛ kua a,+ lɔ ɔ lɛ ba pee kɔ nya tɛ titli”*+
8 kɛ “tɛmi tɛ kɛ nane tɔ̃tɔ̃mi tɛsa” a nɛ.+ A nane ngɛ tɔ̃tɔ̃e, ejakaa a yi munyu ɔ nɔ. Jã nɛ a to ngɔ ha mɛ.
9 Se nyɛɛ lɛɛ nyɛ ji “nihi nɛ a hla, odehe osɔfohi, je ma klɔuklɔu,+ nihi nɛ e ngɔ mɛ kɛ pee e nihi titli+ kaa nyɛɛ jaje” Nɔ nɛ e tsɛ nyɛ kɛ je diblii mi kɛ ba e la nɛ ngɛ nyakpɛ ɔ he ɔ+ “we agboje ɔ* kɛ tsɔɔ ngɛ he fɛɛ he.”+
10 Be ko nɛ be ɔ, jinɛ pi ma ko ji nyɛ, se amlɔ nɛ ɔ, nyɛ ji Mawu we bi;+ be ko nɛ be ɔ, jinɛ a nɛ nyɛ mɔbɔ, se amlɔ nɛ ɔ lɛɛ a na nyɛ mɔbɔ.+
11 Nyɛmimɛ nɛ i suɔ, i ngɛ nyɛ he wami woe kaa akɛnɛ nyɛ ji nibwɔhi kɛ ma se bi he je ɔ,+ nyɛɛ ya nɔ nɛ nyɛɛ hi nyɛ he yue ngɛ he lo ɔ we akɔnɔ ɔmɛ+ nɛ a kɛ nyɛ* ngɛ ta hwue ɔ a he.+
12 Nyɛɛ ya nɔ nɛ nyɛɛ ba nyɛ je mi saminya ngɛ je ma amɛ a kpɛti,+ konɛ ke a po nyɛ nya kaa nyɛ ji yayami peeli ɔ, a na nyɛ ní tsumi kpakpa amɛ,+ konɛ kɛ gu lɔ ɔ nɔ ɔ, a wo Mawu hɛ mi nyami ngɛ e níhi a mi hyɛmi ligbi ɔ nɔ.
13 Nyɔmtsɛ ɔ he je ɔ, nyɛɛ ba nyɛ he si kɛ ha adesa blɔ nya tomi fɛɛ adesa blɔ nya tomi,+ ke e ji matsɛ jio,+ ejakaa e nɔ kuɔ pe nyɛ,
14 kɛ amlaalohi nɛ matsɛ tsɔ mɛ kaa a ya gbla yayami peeli a tue nɛ́ á je ni nɛmɛ nɛ a peeɔ nɔ́ kpakpa a yi ɔ.+
15 Ejakaa Mawu suɔmi nya ní ji kaa ke nyɛ peeɔ nɔ́ kpakpa a, nyɛ ma ha nɛ nihi nɛ a susuu we nɔ́ he nɛ a tuɔ munyu kɛkɛ ɔ nɛ a ma a nya.*+
16 Nyɛ ji nihi nɛ nyɛ ye nyɛ he,+ se nyɛ ko ngɔ nyɛ he yemi ɔ kɛ pee nɔ́ nɛ nyɛ maa laa ngɔ wo se* kɛ hi yayami pee,+ mohu ɔ, kaa Mawu nyɔguɛhi.+
17 Nyɛɛ bu nimli slɔɔtohi tsuo,+ nyɛɛ suɔ nyɛmimɛ tsuo,*+ nyɛɛ ye Mawu gbeye,+ nyɛɛ bu matsɛ ɔ.+
18 Ha nɛ sɔmɔli nɛ a ba a he si kɛ ha a nyɔmtsɛmɛ kɛ gbeye yemi tsuo nɛ sa,+ pi kɛ ha nimli kpakpahi kɛ ni nɛmɛ nɛ a nuɔ nɔ́ sisi ɔ pɛ, se mohu kɛ ha ni nɛmɛ nɛ e yee kaa a maa sa a hɛ mi ɔ hulɔ.
19 Ejakaa e hi kaa nɔ ko ma fĩ si ngɛ haomihi* kɛ amanehluhi nɛ sɛ mi ngɛ he nile nɛ e ngɛ ngɛ Mawu blɔ fa mi ɔ he je.+
20 Ejakaa ke nyɛ ngɛ yayami pee nɛ a ngɛ nyɛ kongoe nɛ nyɛ fĩɔ si ngɛ mi ɔ, mɛni se nami lɛ ngɛ he?+ Se ke nyɛ fĩɔ si ngɛ amanehlu mi ngɛ nɔ́ kpakpa nɛ nyɛ ngɛ pee ɔ he ɔ, lɔ ɔ saa Mawu hɛ mi.+
21 Ngɛ anɔkuale mi ɔ, blɔ nɛ ɔ nɔ lɛ a tsɛ nyɛ kɛ ba a nɛ, ejakaa Kristo po na amanehlu ha nyɛ,+ nɛ e si nɔ hyɛmi nɔ́ ha nyɛ konɛ nyɛɛ nyɛɛ e nane mami he ɔmɛ a se haa.+
22 E pee we yayami ko,+ nɛ jã kɛ̃ nɛ sisimi munyu ko hu ji e nya hyɛ.+
23 Benɛ a ngɛ lɛ jɛe ɔ,*+ e jɛ we nɔ ko* kɛ tui nane mi.+ Benɛ e ngɛ amanehlu nae ɔ,+ e wui nɔ ko he gbeye, se mohu e tu e he kɛ wo Nɔ nɛ e kojoɔ+ ngɛ dami mi ɔ dɛ mi.
24 Lɛ nitsɛ e tloo wa he yayami ɔmɛ+ ngɛ lɛ nitsɛ e nɔmlɔ tso ɔ mi ngɛ sɛumi tso ɔ nɔ,*+ konɛ wa gbo kɛ ha yayamihi* nɛ waa hi wami mi konɛ waa pee nɔ́ nɛ da. Nɛ “a gu e pa amɛ a nɔ kɛ tsa nyɛ.”+
25 Ejakaa nyɛ ngɛ kaa jijɔhi nɛ a laa,+ se amlɔ nɛ ɔ, nyɛ kpale kɛ ba to hyɛlɔ ɔ+ kɛ nɔ hyɛlɔ nɛ hyɛɔ nyɛ klaahi* a nɔ ɔ ngɔ.
Sisi Ningmahi
^ Aloo “e mi tsɔ.”
^ Aloo “kpa si.”
^ Ngɛ Hela gbi mi ɔ, “zo be lɛ gbee.”
^ Ngɛ Hela gbi mi ɔ, “kɔ nya yi mi tɛ.”
^ Ngɛ Hela gbi mi ɔ, “su ɔmɛ,” nɛ ji, e su kɛ e ní peepee kpakpa amɛ.
^ Aloo “nyɛ klaa.”
^ Ngɛ Hela gbi mi ɔ, “nyɛ maa fi nihi nɛ susuu we nɔ́ he nɛ a tuɔ munyu kɛkɛ ɔ a nya.”
^ Aloo “nɔ́ nɛ nyɛɛ kɛ ma je nyɛ nya.”
^ Aloo “nyɛmimɛ a kuu ɔ tsuo.”
^ Aloo “nɔ́ nami; nɔ́ yeeyee.”
^ Aloo “tsuaa we nɔ ko ní.”
^ Aloo “ní tsuaae ɔ.”
^ Aloo “ngɛ tso ɔ nɔ.”
^ Aloo “waa kɛ yayami nɛ po tako mi.”
^ Aloo “wamihi.”
