Delphine nɛ wa tu e he munyu kɛ sɛ hlami ɔ ba na kaa e haomi ɔmɛ ha nɛ e ba bɔni dã fuu numi. Baiblo ɔ tsi we dã kɛ ní tsumi nya, se e de ke “Ko ya piɛ nihi nɛ nuu wai fuu tsɔ a he.” (Abɛ 23:20) A yɔse kaa dã nɛ a kɛ tsuɔ ní ngɛ blɔ yaya nɔ ɔ haa nɛ nihi nuɔ hiɔ yaya komɛ, wekuhi gbɛɔ, nɛ nihi gboɔ kpatu gbenɔ daa jeha. Jinɛ adesahi bu ga womi kpakpa nɛ ngɛ Baiblo ɔ mi tue ɔ, a ko nyɛ yu a he ngɛ nyagba nɛ ɔmɛ a he.

Delphine pee jã. Nɛ amlɔ nɛ ɔ, e de ke: “I na kaa dã tsu we ye nyagba amɛ a he ni ha mi. Nɛ i kɛ ga womi nɛ ngɛ Filipi Bi 4:6, 7, ɔ tsu ní. Lejɛ ɔ de ke: ‘Nyɛ ko pee yeyeeye ngɛ nɔ́ ko nɔ́ ko he, se . . . nyɛ ha nɛ Mawu nɛ e le nyɛ ní bimi ɔmɛ.’ Daa nyɔ mi ɔ, ke ye haomi ɔmɛ ha nɛ i ngɛ ye yi mi susue ɔ, i sɔleɔ ha Yehowa. I deɔ le bɔ nɛ ye we abofu, tsui yemi kɛ bɔ nɛ i ngɛ gbeye yee ha a tsuo. I kpaa lɛ pɛɛ kaa e ye bua mi konɛ ma ná juɛmi nɛ da. Ke je na a, i bɔɔ mɔde kaa ma ngmɛɛ jamɛ a he numi ɔmɛ a he. Enɛ ɔ nɛ i peeɔ ɔ ye bua mi nɛ i kɛ ye juɛmi maa níhi nɛ i ngɛ ɔ nɔ se pi níhi nɛ i be. I ma ye juɛmi nya si kaa i be dã nue hu kɔkɔɔkɔ. Akɛnɛ tue mi jɔmi nɛ i na a pã nɔ́ fɛɛ nɔ́ he je ɔ, i sume nɛ e je ye dɛ.”

Jemi bami yayami ji su ko nɛ haa nɛ nihi haoɔ nɛ a yeɔ tsui wawɛɛ. Se Baiblo sisi tomi mlaahi ma nyɛ  maa ye bua wɔ konɛ waa yu wa he ngɛ nyagba nɛ ɔ he, a ma nyɛ ma ha nɛ wa kua suhi nɛ haa nɛ nihi kɛ a he woɔ jemi bami yayami mi. Kaa nɔ hyɛmi nɔ́ ɔ, ni kpahi a he akɔnɔ yaya nami kɛ bɔmi nami he fonihi a hyɛmi. Niheyo ko nɛ a tsɛɛ lɛ ke Samuel ɔ de ke: “E yi ha mi kulaa kaa ma ná yihi a he akɔnɔ yaya. Be komɛ ɔ, i ná we nɔ kpa a he bua jɔmi, se i naa kaa e bua jɔ ye he, nɛ enɛ ɔ bliɔ blɔ kɛ haa akɔnɔ yaya a.” Samuel ba na kaa a pɔɔ e nya pomi kaa e náa ni kpahi a he akɔnɔ yaya​—ke e juɛmi be nɔ́ po​—nyagbenyagbe ɔ, e de ke, jehanɛ lɛɛ e ma je blɔ nɛ e pee. Se subai nɛ ɔ gbaa e nya wawɛɛ. E de ke, “E yeɔ nɔ awi, ejakaa e haa nɛ nɔ foɔ lɛ pe e nɔ mi.”

Samuel kane munyu ko nɛ a pee ha nihewi kɛ yihewi nɛ ngɛ jw.org ɔ nɔ. Nɛ e susu Abɛ 20:11 nɛ de ɔ ke: “Jokuɛyo tete po e ní peemi níhi a kɛ yoɔ lɛ kaa e yeɔ anɔkuale, loo e peeɔ nɔ́ nɛ da.” Kɛ enɛ ɔ ye bua lɛ ha kɛɛ? Samuel ba na kaa ni kpahi a he akɔnɔ yaya nami ɔ dɛ, nɛ e sɛ hulɔ. Amlɔ nɛ ɔ e de ke: “Niheyo aloo yiheyo nɛ náa ni kpahi a he akɔnɔ yaya a, ngɛ su yaya nɛ ma nyɛ ma puɛ e gba si himi hwɔɔ se ɔ kasee. I bɔni bɔ nɛ ye yo nɛ ma ngɔ hwɔɔ se ɔ maa nu he ha ke e na kaa i ná yo kpa he akɔnɔ yaya a he susumi. Jã nɛ i pee ɔ ha nɛ i na kaa subai nɛ ɔ maa ye mi awi. E peemi yi, se lɔ ɔ tsɔɔ we kaa jã peemi da.” Samuel tsake e subai ɔ. Ni kpahi a he akɔnɔ yaya nami nɛ e kpa a, ha nɛ e yu e he ngɛ jemi bami yayami he.

Antonio sane ɔ ngɛ oslaa wawɛɛ nitsɛ. Ke e hyɛ we ajuama bɔmi he fonihi ɔ, e he mi dɛ lɛ. E ngɛ mi kaa e sɛ gba si himi mi, nɛ e suɔ e yo ɔ saminya mohu lɛɛ, se e kɛ we kɛkɛ e sɛ klama nɛ ɔ mi ekohu. E de ke 1 Petro 5:8 ɔ nɛ i pɔɔ he susumi ɔ ji nɔ́ nɛ ye bua mi. Lejɛ ɔ de ke: “Nyɛ hɛ mi nɛ ka si, nɛ nyɛɛ hwɔɔ! Nyɛ he nyɛlɔ Abosiami ɔ nyɛɛɔ kɛ yaa kɛ baa kaa jata nɛ ngɛ huãe nɛ e ngɛ hlae nɛ e maa mi nɔ ko.” Antonio tsɔɔ kaa: “Ajuama bɔmi he fonihi bɔle wɔ kɛ kpe ngɛ je ɔ mi tsuo nɛ foni nɛ ɔmɛ ma nyɛ na tlɔ wa juɛmi mi. Ngmami nɛ ɔ ye bua mi nɛ i na nɔ nɛ ngɔɔ ni nɛ ɔmɛ kɛ kaa wɔ. E he ba hia nɛ ma kai ye he be tsuaa be kaa foni nɛ ɔmɛ ji mu níhi, nɛ nɔ nɛ ha nɛ ní nɛ ɔmɛ pɔ he ɔ hu e zo tɔ ywia. Amlɔ nɛ ɔ, i ba na kaa Yehowa pɛ ji nɔ nɛ ma nyɛ maa ye bua mi konɛ ‘ye hɛ mi nɛ ka si, nɛ ma hwɔɔ, konɛ ma nyɛ ma yu ye he ngɛ foni nɛ ɔmɛ nɛ ma nyɛ ma puɛ ye juɛmi, ye tsui kɛ ye gba a he.” Antonio ná yemi kɛ bua mi nɛ sa, nɛ nyagbenyagbe ɔ, e ngmɛɛ e su yaya nɛ ɔ he. Jã nɛ e pee ɔ ha nɛ e yu e he ngɛ nyagbahi nɛ a he ngɛ oslaa wawɛɛ ɔ he.

E ngɛ heii kaa ga kpakpahi ngɛ Baiblo ɔ mi nɛ ma nyɛ maa ye bua wɔ konɛ waa yu wa he ngɛ nyagba nguahi a he. Se nyagbahi nɛ he si momo, nɛ e pee kaa a sume nɛ a je ɔ hu nɛɛ? Wa maa hyɛ bɔ nɛ Mawu Munyu ɔ ma nyɛ maa ye bua wɔ konɛ wa nyɛ nɛ wa tsu nyagba ngua nɛ ɔmɛ a he ní ha.