Yesu fiɛɛ “Mawu Matsɛ Yemi ɔ he sane kpakpa a.” (Luk 4:43) Jehanɛ se hu ɔ, e tsɔɔ nihi kaa a sɔle konɛ Matsɛ Yemi nɛ ɔ nɛ ba. (Mat 6:9, 10) Ngɛ November nyɔhiɔ ɔ mi ɔ, wa maa bɔ mɔde fɛɛ nɛ wa ma nyɛ konɛ waa fia Mawu Matsɛ Yemi ɔ he gɔgɔ. (Mat 24:14) Moo to o be he blɔ nya konɛ o nyɛ nɛ o ngɔ o he kɛ wo fiɛɛmi klɛdɛɛ nɛ ɔ mi kɛ pi si. Nihi tsuo nɛ a ma sɔmɔ kaa blɔ gbali a wali ngɛ November nyɔhiɔ ɔ mi ɔ ma nyɛ maa ngɔ ngmlɛfia 30 aloo 50 kɛ tsu ní.

O kɛ nihi babauu nɛ a ngɛ o zugba kpɔ ɔ mi ɔ nɛ susu ngmami ko nɛ kɔɔ Mawu Matsɛ Yemi ɔ he ɔ he. Ke o maa hla ngmami ko nɛ o kɛ nihi ma susu he ɔ, mo susu jami nɛ nihi nɛ a ngɛ o zugba kpɔ ɔ mi ɔ ngɛ mi ɔ he. Ke nɔ ko nɛ o ya na lɛ kekleekle ligbi ɔ bua jɔ munyu ɔ he ɔ, ha lɛ ma bi a Hwɔɔmi Mɔ No. 2 2020 ɔ eko. Lɔ ɔ se ɔ, moo kpale ya slaa lɛ nɔuu, nɛ o bɔ mɔde nɛ o kɛ lɛ nɛ je Baiblo mi ní kasemi sisi ngɛ wa Ní Tsɔɔmi Ga Dade ɔ eko mi. Be nɛ piɛ nɛ Mawu Matsɛ Yemi ɔ ma kpata adesa nɔ yemihi tsuo a hɛ mi ɔ pi kulaa. (Dan 2:44; 1Ko 15:24, 25) Enɛ ɔ he ɔ, nyɛ ha nɛ waa ngɔ he blɔ klɛdɛɛ nɛ ɔ nɛ wa ná a kɛ tsɔɔ kaa wa fĩ Yehowa kɛ e Matsɛ Yemi ɔ se kpɛii!