2 Samuel 23:1-39
23 David nyagbe munyuhi ji nɛ ɔ nɛ:
“David, Ishai binyumu ɔ munyu,Nyumu ɔ nɛ a wo e nɔ gojoo ɔ munyu,Nɔ nɛ Yakob Mawu ɔ pɔ lɛ nu ɔ,Israel la amɛ a lalɔ nɛ a suɔ e sane ɔ.*
2 Yehowa mumi ɔ tu munyu kɛ gu ye nɔ;E munyu ɔ ngɛ ye lilɛ nɔ.
3 Israel Mawu ɔ tu munyu;Israel Tɛ Sa a de mi ke:
‘Ke dalɔ ngɛ adesahi a nɔ yee,Nɛ e kɛ Mawu gbeye yemi ngɛ nɔ yee ɔ,
4 E ngɛ kaa mɔtu nɛ je mi tsɔ nɛ́ pu ngɛ kpɛe,Mɔtu nɛ́ bɔku be hiɔwe.
E ngɛ kaa je mi nɛ tsɔ heii ngɛ hiɔmi nɛmi se,Nɛ́ haa nɛ nga tsɛ̃ɔ kɛ jeɔ zu mi.’
5 Anɛ pi jã nɛ ye we ɔ ngɛ ngɛ Mawu hɛ mi lo?
Ejakaa e kɛ mi so neneene somi ko,E to he blɔ nya saminya, nɛ e be mi poe gblegbleegble.
Ejakaa lɔ ɔ nɔ nɛ ye yi wami hemi nɛ pi si kɛ ye bua jɔmi tsuo daa si ngɛ,Anɛ pi lɔ ɔ he je nɛ e haa nɛ ye we ɔ bɔɔ ɔ lo?
6 Se a sakeɔ yaka nimli tsuo kɛ pueɔ he kaa mio tsohi,Ejakaa a kɛ nine be nyɛe maa muɔɔ mɛ.
7 Ke nyumu ko maa ta a he ɔ,E sa nɛ e dla e he saminya kɛ dade kɛ akplɔ tso,Nɛ e sa nɛ a kɛ la nɛ sã mɛ kulaa ngɛ he nɛ a ngɛ ɔ.”
8 David tatsɛmɛ nɛ a he wa a, a biɛhi ji nɛ ɔmɛ nɛ: Yosheb Bashebet nɛ ji Takemoni no ɔ, lɛ ji ni etɛ ɔmɛ a nyatsɛ. Be ko ɔ, e kɛ e we akplɔ ɔ gbe nihi 800.
9 Nɔ nɛ nyɛɛ e se ji Eleazar, nɛ ji Ahohi binyumu Dodo binyumu ɔ. E piɛɛ tatsɛmɛ etɛ nɛ a he wa nɛ a kɛ David ngɛ benɛ a bɔ Filisti bi ɔmɛ ahlua a he. A ya bua a he nya ngɛ lejɛ ɔ kɛ ha ta a, nɛ benɛ Israel nyumu ɔmɛ gbla a he si kɛ je ɔ,
10 e da e nane nɔ nɛ e ya nɔ nɛ e gbe Filisti bi ɔmɛ hluu kɛ ya si be nɛ e kɔni gbo, nɛ e nine pee titlii* ngɛ klaate ɔ nɛ e hɛɛ ɔ he je. Lɔ ɔ he ɔ, Yehowa ye kunimi ngua* jamɛ a ligbi ɔ; nɛ ni ɔmɛ kpale kɛ ba, nɛ a ba je nihi nɛ e gbe mɛ pue si ngɛ e se ɔ a he níhi.
11 Nɔ nɛ nyɛɛ e se ji Shama, Harar no Agee binyumu ɔ. Filisti bi ɔmɛ bua a he nya ngɛ Lehi, ngɛ zugba ko nɛ yɔ sɔuu ji nɔ ɔ nɔ; nɛ ni ɔmɛ tu fo ngɛ Filisti bi ɔmɛ a he je.
12 Se e ya da zugba a kpɛti tutuutu, nɛ e fã he, nɛ e ya nɔ nɛ e gbe Filisti bi ɔmɛ, nɛ Yehowa ye kunimi ngua.*
13 Ngɛ ní kpami be ɔ mi ɔ, nyatsɛmɛ 30 ɔmɛ a kpɛti ni etɛ kple kɛ ya David ngɔ ngɛ Adulam tɛ puɔ ɔ mi, nɛ Filisti bi ɔmɛ a tabo ko ya to si* ngɛ Refaim Dɔgba a mi.
14 Jamɛ a be ɔ mi ɔ, David ngɛ he piɛ pomi he ɔ, nɛ Filisti bi ɔmɛ a tabo ko ngɛ Betlehem.
15 Kɛkɛ nɛ David de ke: “Kaa i ná muɔ nɛ a toɔ nyu ngɛ mi nɛ ngɛ Betlehem agbo ɔ nya a mi nyu ɔ, jinɛ i ko nu!”
16 Kɛkɛ nɛ tatsɛmɛ etɛ nɛ a he wa a sɛ Filisti bi ɔmɛ a sito he ɔ pani nya, nɛ a ya sa nyu ngɛ muɔ nɛ a toɔ nyu ngɛ mi nɛ ngɛ Betlehem agbo ɔ nya a mi kɛ ba ha David; se e kua nyu ɔ numi, nɛ e plɛ pue si ha Yehowa.
17 E de ke: “Oo Yehowa, kpaoo kaa ma pee nɔ́ nɛ ɔ! Anɛ e sa nɛ ma nu nyumuhi nɛ a ngɔ a wami* kɛ wo oslaa mi ɔ a muɔ lo?” Enɛ ɔ he ɔ, e kua nyu ɔ numi. Níhi nɛ e tatsɛmɛ etɛ nɛ a he wa a pee ji nɛ ɔmɛ nɛ.
18 Yoab nyɛminyumu Abishai, Zeruya binyumu ɔ ji ni etɛ kpa komɛ hu a nya dalɔ; e ngɔ e we akplɔ ɔ kɛ gbe nihi 300, nɛ e he biɛ kaa ni etɛ ɔmɛ.
19 E ngɛ mi kaa ngɛ ni etɛ kpa amɛ a kpɛti ɔ, lɛ nɛ e bɔ mɔde pe kulaa, nɛ lɛ ji a nya dalɔ mohu lɛɛ, se e ná we kekleekle ni etɛ ɔmɛ.
20 Benaya, Yehoyada binyumu ɔ ji nyumu katsɛ,* nɛ e tsu ní tsumi nguanguahi fuu ngɛ Kabzeel. E gbe Moab no Ariel binyumu enyɔ ɔmɛ, nɛ ligbi ko nɛ snoo ngɛ nɛe ɔ, e kple si kɛ sɛ nyu muɔ ko mi kɛ ya gbe jata ko.
21 E gbe Egipt nyumu oblai kpanaa ko hulɔ. E ngɛ mi kaa Egipt no ɔ hɛɛ akplɔ ngɛ e dɛ mohu lɛɛ, se e kɛ tso ya tua Egipt no ɔ, nɛ e kpɔ̃ akplɔ ɔ ngɛ e dɛ, nɛ e ngɔ Egipt no ɔ nitsɛ e we akplɔ ɔ kɛ gbe lɛ.
22 Ní nɛ ɔmɛ ji níhi nɛ Benaya, Yehoyada binyumu ɔ pee, nɛ e he biɛ kaa tatsɛmɛ etɛ nɛ a he wa a.
23 E ngɛ mi kaa e bɔ mɔde wawɛɛ pe nihi nyingmi etɛ ɔmɛ mohu lɛɛ, se e ná we ni etɛ ɔmɛ. Se David ngɔ lɛ kɛ da lɛ nitsɛ e he buli ɔmɛ a nya.
24 Yoab nyɛminyumu Asahel piɛɛ nihi nyingmi etɛ ɔmɛ a he; ni kpahi nɛ a piɛɛ he ji: Elhanan nɛ ji Betlehem no Dodo binyumu ɔ,
25 Shama, Harod no ɔ, Elika, Harod no ɔ,
26 Helez, Palti no ɔ, Ira, Tekoa no Ikesh binyumu ɔ,
27 Abiezer, Anatot no ɔ, Mebunai, Husha no ɔ,
28 Zalmon, Ahohi no ɔ, Maharai, Netofa no ɔ,
29 Heleb, Netofa no Baana binyumu ɔ, Itai nɛ ji Ribai nɛ e je Gibea ngɛ Benyamin ɔ binyumu ɔ,
30 Benaya, Piraton no ɔ, Hidai nɛ je Gaash dɔ* ɔmɛ a nya a,
31 Abialbon, Arbat no ɔ, Azmavet, Bahurim no ɔ,
32 Eliaba, Shaalbon no ɔ, Yashen binyumu ɔmɛ, Yonatan,
33 Shama, Harar no ɔ, Ahiam, Harar no Sharar binyumu ɔ,
34 Elifelet, Maakat no ɔ binyumu Ahasbai binyumu ɔ, Eliam, Gilo no Ahitofel binyumu ɔ,
35 Hezro, Karmel no ɔ, Paarai, Arab no ɔ,
36 Igal, Natan nɛ je Zoba a binyumu ɔ, Bani, Gad no ɔ,
37 Zelek, Amon no ɔ, Naharai, Beerot no ɔ, Zeruya binyumu Yoab ta hwumi ní hɛɛlɔ ɔ,
38 Ira, Yatir no ɔ, Gareb, Yatir no ɔ,
39 kɛ Uria, Hit no ɔ, mɛ tsuo a yibɔ ji 37.
Sisi Ningmahi
^ Aloo “Nɔ nɛ a suɔ e sane nɛ a po e he lahi ngɛ Israel ɔ.”
^ Aloo “sislii.”
^ Aloo “Yehowa ngɔ yi wami hemi ngua kɛ ba.”
^ Aloo “nɛ Yehowa ngɔ yi wami hemi ngua kɛ ba.”
^ Aloo “Filisti bi ɔmɛ pee bo tsuhi.”
^ Aloo “klaa.”
^ Ngɛ Hebri gbi mi ɔ, “nyumu katsɛ ko binyumu.”
