1, 2. Yecu ojingo cwiny lupwonnyene nining i nino ma en ocer iye?

 OBEDO i nino ma kicero iye Yecu. Lupwonnyene aryo onongo gitye ka cito i paco mo ma tye mairo abiro (kilomita 11.2) nia ki i Jerucalem. Gin onongo pe gingeyo ni kicero Yecu dok cwinygi onongo oballe adada pi jami mutimme nino mogo manok mukato angec. Cutcut, Yecu otuc ci ocako wot kacel kwedgi. En obedo ki kare me kweyo cwiny lupwonnye magi. En okweyo cwinygi nining? “Cakke wa i kom Moses, ki lunebi ducu, en ogonyo botgi lok ducu ma i ginacoya ma mako kome.” (Luka 24:13-15, 27) Lacen, cwinygi ocako pukke pien en obedo ka ‘gonyo’ botgi Ginacoya.​—Luka 24:32.

² I otyeno meno, lupwonnye aryo-ni gudok cen i Jerucalem. I kare ma gunongo lukwena, gin gutito botgi jami mutimme i komgi. Ma pud gitye ka lok, Yecu otuc botgi ducu. Ento, lukwenane lworo omakogi matek adada. Gin gucako bedo ki akalakala i cwinygi. Yecu ojingo cwinygi nining? Baibul waco ni: ‘Oyabo tamgi wek guniang ginacoya.’​—Luka 24:45.

3. Pekki macalo mene ma waromo rwatte kwede, dok ngo ma romo konyowa me bedo ki neno mupore ma lubbe ki ticwa me pwony?

³ Calo lupwonnye me kare ca, wan bene i kine mukene cwinywa cwer. Twero bedo ni walungo wiwa i tic pa Rwot  ento cwinywa cwer pienni pe watye ka neno adwogine. (1 Kor. 15:58) Romo bedo ni jo ma wakwano Baibul kwedgi gitye ka dongo mot adada i yo me cwiny. Jo mukene ma watye ka konyogi bene giromo kwero Jehovah. Ngo ma myero watim wek wabed ki neno mupore i kom ticwa me pwony? Gin acel ma romo konyowa aye ni omyero waniang maber adada carolok pa Yecu ma kicoyogi i Ginacoya. Kong dong wanyamu carolok adek ki dok wanenu pwony ma waromo nongone.

4. Carolok ma Yecu obolo i kom dano ma ocoyo kodi ci onino woko-ni te lokke ngo?

⁴ Kwan Marako 4:26-29. Carolok ma Yecu obolo i kom dano ma ocoyo kodi ci onino woko-ni te lokke ngo? Laco ma i carolok pa Yecu-ni cung pi latit kwena acel acel me Ker-ri. Kodi cung pi kwena me Ker-ri ma kitito bot jo ma cwinygi tye atir. Calo kwo me nino ducu, laco kodi-ni “buto piny i dyewor, dok a i dyeceng.” Dongo pa kodi-ni tero kare mo olo, cakke ki i coyone nio wa i kayone. I kare meno ‘kodi cako twi, ci dongo.’ Dongo man timme “kene” motmot. I yo acel-li, dongo i yo me cwiny timme motmot. Ka ngat moni odongo i yo me cwiny nio ka omoko tamme me tic pi Lubanga, ci en “nyako nyige” kun dyero kwone bot Jehovah ci nongo batija.

5. Pingo Yecu obolo carolok i kom dano ma ocoyo kodi ci onino woko-ni?

⁵ Pingo Yecu obolo carolok man? Yecu onongo mito ni wange ni Jehovah keken aye weko lok me ada dongo i cwiny “jo ducu ma myero.” (Tic 13:48; 1 Kor. 3:7) Wan wapito dok waonyo pii iye, ento pe waweko dongo. Pe waromo ruyone ni odong oyotoyot. Calo laco ma i carolok-ki, pe wangeyo kit ma dongo meno timme kwede. Ka nongo wamedde ki kwowa me nino ducu, pe waneno kit ma kodi me Ker-ri dongo kwede i cwiny ngat moni. Ento, i nge kare mo, kodi me Ker-ri twero nyako nyige. I ngeye, lapwonnye manyen-ni ribbe kwedwa i tic me kac dok wanongo adwogi maber pienni en nongo tye ka konyo korwa.​—Jon 4:36-38.

6. Gin ango ma myero waye ma lubbe ki dongo i yo me cwiny?

⁶ Pwony ango ma wanongo ki i kom carolok man? Mukwongo, omyero waye ni pe watwero doro kit ma latin kwanwa myero odong kwede i yo me cwiny. Ka wamwol, man bikonyowa pe me diyo latin kwan me Baibul adiya ni myero onong batija. Omyero watim jami ducu ma twere me konyo ngat moni, ento myero waye ni en aye moko tamme pire kene me dyere bot Jehovah. Dyere obedo gin ma myero oa ki i cwiny ngat moni pien en maro Lubanga. Mapat ki meno Jehovah pe jolo.​—Jab. 51:12; 54:6; 110:3.

7, 8. (a) Pwony ango ma wanongo ki i kom carolok ma Yecu obolo i kom dano ma ocoyo kodi ci onino woko-ni? Mi labol acel. (b) Carolok man pwonyowa gin ango i kom Jehovah gin ki Yecu?

⁷ Me aryo, niang pwony ma wanongo ki i carolok man weko cwinywa pe tur ka ce tutewa me tito kwena-ni pe tye ka nyako nyige. Omyero wadi cwinywa. (Yak. 5:7, 8) Kadi bed ni watute matek me konyo latin kwan moni ento kodi ma wacoyo-ni pe onyako nyige, man pe myero omi watam ni wape lupwonye mucwiny. Jehovah aye weko kodi me lok me ada dongo i cwiny jo mamwol, ma gitye atera me timo alokaloka i kwogi. (Mat. 13:23) Pi meno, pe omyero watam ni ticwa me pwony-nyi  pe tye ka nyako nyige pienni wel dano ma gitye ka nongo batija ginok. Ento Jehovah pe neno kit ma dano gijolo kwede lokwa me mokone ni ticwa me pwony tye ka nyako nyige. Ma ka meno, en tero tutewa ki cwinywa ducu calo gin ma pire tek.​—Kwan Luka 10:17-20; 1 Jo Korint 3:8.

⁸ Me adek, pol kare pe waneno alokaloka ma timme i cwiny ngat moni. Me lapore, luot mo acel ma lamiconari mo obedo ka kwano kwedgi Baibul gupenye ni gimito doko lutit kwena. En owaco bot luot man ni ka gimito bedo mupore me doko lutit kwena, ci gin myero kong guwek mato taa. Lamiconari-ni obedo ki ur madit i kare ma luto man guwacce ni dong giweko mato taa woko dwe mapol mukato angec. Pingo gin guweko mato taa? Gin guniang ni Jehovah romo nenogi ka gimato taa dok ni en dag jo ma gikwo kwo laiye aryo. Pi meno, gin gumoko tamgi ka ce myero gimat taa ma lamiconari-ni neno nyo me giko matone matwal. Mar manyen ma gudongo pi Jehovah-ni okonyogi me moko tam matir. Gin gudongo i yo me cwiny kadi bed ni lamiconari-ni pe oniang alokaloka mutimme.

9. Carolok ma Yecu obolo i kom obwo-ni te lokke ngo?

⁹ Kwan Matayo 13:47-50. Carolok ma Yecu obolo i kom obwo-ni te lokke ngo? Yecu oporo tic me tito kwena me Ker-ri bot dano ducu ki obwo ma giciko i nam. Kit macalo obwo man mako “kit kwa rec-gu ducu[-ni],” ticwa me tito kwena-ni gudo cwiny dano milion mapol. (Ic. 60:5) Man nen ka maleng ma lubbe ki wel dano ma gibedo tye i gure madito kacel ki kwer me Nipo mwaka ki mwaka. Jo mogo i kingi gitye calo rec “mabecone” dok gin gibino i kacokke. Ento mukene kinongo ni gitye calo rec “maracone” dok Jehovah pe mitogi.

10. Pingo Yecu obolo carolok i kom obwo?

¹⁰ Pingo Yecu obolo carolok man? Yero rec man pe nyuto ngolo kop me agikki ma bitimme i kare me twon can madit atika-ni. Ma ka meno, man nyuto gin ma bitimme i kare me agikki-ni. Yecu owaco ni pe jo ducu ma gijolo lok me ada gibitic pi Jehovah. Dano mapol dong gubedo ka bino i cokkewa. Jo mogo gukwano Baibul kwedwa ento pe gimito moko tamgi me tic pi Jehovah. (1 Luker 18:21) Jo mukene bene dong pe gibino i cokke. Bulu mukene lunyodogi gupwonyogi ki yo pa Jehovah ento gin pe gudongo cwiny me maro cikke. Yecu owaco ni ngat acel acel myero omok tamme pire kene. En neno jo ma gimoko tam ma kit man calo “lonyo me rok ducu.”​—Ag. 2:7.

11, 12. (a) Pwony ango ma wanongo ki i kom carolok madok i kom obwo-ni? (b) Carolok man pwonyowa gin ango i kom Jehovah gin ki Yecu?

¹¹ Pwony ango ma wanongo ki i carolok madok i kom obwo-ni? Ka waniang pwony ma wanongo ki i carolok-ki, ci man konyowa wek cwinywa pe ocwer nyo otur ka ce latin kwan me Baibul nyo lutinowa pe gimito tic pi Jehovah. Man twero timme kadi bed watute ma rom mene. Ka ngat moni oye kwano Baibul nyo lunyodone gupwonye ki lok me ada, pe te lokke ni en dong bibedo ki wat macok ki Jehovah. Jo ma gidag mine i te loc pa Jehovah gibikwanyogi woko ki i kin jone.

¹² Man mono te lokke ni jo ma guweko lok me ada pe dong kibiye ni gudwog cen i kacokke? Nyo ka ngat moni  pe odyero kwone bot Jehovah, tika en bibedo ngat ‘marac’ matwal? Pe. Ngat ma kit meno pud tye ki kare me doko larem Jehovah ma peya twon can madit atika-ni ocakke. Man bedo calo iwacci Jehovah tye ka waco botgi ni: “Wudwog bota, an bene abidwogo botwu.” (Mal. 3:7) Man aye bene gin ma Yecu oloko iye i carolokke ma en obolo madok i kom latin awobi ma orwenyo.​—Kwan Luka 15:11-32.

13. Carolok ma Yecu obolo i kom latin awobi ma orwenyo-ni te lokke ngo?

¹³ Carolok ma Yecu obolo i kom latin awobi ma orwenyo-ni te lokke ngo? Wego ma lakica i carolok man cung pi Wonwa me polo, Jehovah. Latin ma openyo pi ginaleyane ci ocito olanyo woko-ni cung pi jo ma gua ki i kacokke. Gin gidoko jo me lobo pa Catan, ma bedo calo iwacci “lobo mabor,” ma opokke woko ki bot Jehovah. (Ep. 4:18; Kol. 1:21) Ento lacen, jo mogo giniang ni onongo gitimo bal, ci gimoko tamgi me dwogo cen i dul pa Jehovah. Jo magi ma gungut pienni gimwol-li Wonwa ma lakica jologi ki yomcwiny.​—Ic. 44:22; 1 Pet. 2:25.

14. Pingo Yecu obolo carolok i kom latin awobi ma orweny-nyi?

¹⁴ Pingo Yecu obolo carolok man? Me gudo cwiny dano, Yecu obolo carolok man me nyuto ni Jehovah mito ni jo ma guweke myero gudwog cen Bote. Wego ma i carolok-ki omedde ki bedo ki gen ni wode bidwogo paco. I kare ma oneno wode tye ka dwogo paco, kadi bed ni “onongo pud tye cen ka mabor,” en oringo ka jolle. Carolok man cuko cwiny jo ma guweko lok me ada me dwogo cen bot Jehovah oyotoyot. Oromo bedo ni watgi ki Jehovah tye magoro dok lewic makogi me dwogo cen. Ento ka gudwogo, meno kelo adwogi maber​—kadi wa Jehovah, Yecu kacel ki lumalaika cwinygi bedo yom.​—Luka 15:7.

15, 16. (a) Pwony ango ma wanongo ki i carolok madok i kom latin awobi ma orweny-nyi? Mi labol mogo. (b) Carolok man pwonyowa gin ango i kom Jehovah gin ki Yecu?

¹⁵ Pwony ango ma wanongo ki i carolok madok i kom latin awobi ma orweny-nyi? Omyero walub lanen pa Jehovah. Pe myero watimme ni wan dok ‘kitwa atir tutwal’ ma weko wakwero jolo labalo mo ma ongut. Man miyo ‘wanekke woko’ kekenwa i yo me cwiny.  (Latit. 7:16) Tye pwony mukene ma wanongo ki i carolok man. Omyero wanen ngat ma oweko kacokke calo “romo murwenyo,” ma pud twero dwogo cen. (Jab. 119:176) Ka warwatte ki ngat mo ma oweko kacokke ento pe kiryeme aryema, tika wabitute me konye wek odwog cen? Tika wabiniango luelda con wek gumi kony ma mitte? Wabitimo meno ka waketo i tic pwony ma wanongo ki i carolok ma Yecu obolo i kom latin awobi murwenyo-ni.

¹⁶ Nen kong kit ma jo mogo ma gudwogo i kareni gunyuto kwede pwocgi pi kica pa Jehovah ki dok mar kacel ki cwak ma kacokke onyuto botgi. Omego mo ma kiryemo orii pi mwaki 25 owaco ni: “Yom cwinya tye ka medde ameda nicakke ma kidwoka i kacokke pien anongo “nino me yweyo” ki bot Jehovah. (Tic 3:19) Dano ducu gitye ka teno kora dok gimara! Kombeddi-ni, atye ki omege ki lumege ma giworo Jehovah.” Laminwa mo ma onongo oweko kacokke dok bene pe cito i ticwa me pwony pi mwaki abic owaco kuman i kare ma odwogo: “Pe aromo tito kit ma mar ma Yecu oloko pire-ni tye ka cobbe kwede i koma. Bedo i dul pa Jehovah ber kato gin mo keken!”

17, 18. (a) Gin ango ma wapwonyo ki i carolok adek ma wanyamogi-ni? (b) Gin ango ma omyero wamok tamwa me timone?

¹⁷ Gin ango ma wapwonyo ki i carolok adek ma wanyamogi-ni? Mukwongo, omyero wange ni pe watye ki twero mo keken i dongo pa ngat moni i yo me cwiny. Jehovah aye weko dongo. Me aryo, pe pore me bedo ki tam ni jo ducu ma gibino i cokke dok wakwano Baibul kwedgi gibitic pi Jehovah. Me agikkine, kadi bed ni jo mogo giweko kacokke kun giloko ngegi bot Jehovah, omyero wabed ki gen ni gibidwogo. Dok ka gudwogo, omyero wajolgi i yo me mar calo Jehovah.

¹⁸ Pi meno, wan ducu ki acel acel myero wamedde ki yenyo ngec, niango, ki dong ryeko. Ka wakwano carolok ma Yecu obologi-ni, omyero wapenye kekenwa ni: ‘Carolok man te lokke ngo? Pingo kicoyo i Baibul? Aromo keto pwony ma anongo i tic nining? Carolok man pwonyowa gin ango i kom Jehovah gin ki Yecu?’ Ka wapenye ki lapeny magi, ci man binyuto ni waniang lok pa Yecu.