Anga ma Myero Opwony Lutino Lok i Kom Lubanga?

“Lapwonnye pe dit kato dano ma pwonye; ento dano ducu ka dong kipwonyogi maber, gibidoko macalo lapwonygi.”​—LUKA 6:40.

LUNYODO mukene gitamo ni pe gipore me pwonyo lutinogi lok i kom Lubanga. Gin gitwero tamo ni rwom me kwangi lapiny nyo ngecgi nok i lok me dini ma twero weko pe gibedo lupwonye mabeco. Pi meno, miyo gitwero weko tic man ma pire tekki i cing watgi mo nyo latela dini.

Ento, anga ma opore me pwonyo lutino ki lok ada me dini kacel ki cik mabeco ma konyogi me kwo? Nen kong gin ma Baibul waco i kom lok man, ci i por ki gin ma lukwed lok gunongo.

Gin Ango ma Myero Wego Otim?

Gin ma Baibul pwonyo: “Wego, pe wuket kolo i kom litinowu ma miyo kiniga makogi, ento wupitgi gudong maber kun wupwonyogi dok wunyebogi ki kit mabeco ma Rwot pwoyo.”​—Jo Epeco 6:4

Gin ma lukwed lok gunongo: I yo ango ma wego gitwero nongo adwogi maber ka gidongo niyegi i lok me dini? Pwony ma wi lokke tye ni Fathers’ Religious Involvement and Early Childhood Behavior, ma kigoyo i 2009, owaco ni: “Bedo i kin jo ma ludini twero weko co gidoko wego mabeco. Dini miyo kony kacel ki  kit me jukke ken ki dong pwony ki tira ma gikonyo ngat moni i kit ma myero en okwo kwede.”

Baibul nyutu ni tic pa wego i kare me dongo ki pwonyo lutino pire tek adada. (Carolok 4:1; Jo Kolocai 3:21; Jo Ibru 12:9) Ento tira meno tika tiyo i kare-ni? I mwaka 2009, Univaciti me Florida ocoyo pwony mo ma loko i kom adwogi ma wego gikelo i kom lutinogi. Lukwed lok magi gunongo ni lutino ma wegigi obedo ka minigi tira i kare me dongogi onongo gitye ki kica loyo luwotgi dok giwinyo ni gin pigi tek. Pol pa awobe onongo gilubo cik, dok pol pa anyira onongo wigi kwiri. Ada, tira me Baibul kara pud mitte.

Tic pa Mego Pire Tek Marom Mene?

Gin ma Baibul pwonyo: “Pe ikwer winyo pwony pa meni.”​—Carolok 1:8.

Gin ma lukwed lok gunongo: Handbook of Child Psychology 2006 owaco ni: “Mege gibedo kacel ki lutinogi pi cawa ma romo pacen 65 ki 80 makato wege dok pacen man tye ada i twok lobo mapol.” Kodi tero cawa kacel ma kit man weko lok pa mego, jami ma en timogi, ki dong kit ma en tero kwede jami gudu kit ma latin dongo kwede.

Ka mego kacel ki wego gitiyo kacel me pwonyo lutinogi ki lok ada i kom Lubanga, gimiyo bot lutinogi jami aryo ma pigi tego. Mukwongo, lutino ginongo kare me moko larem ki Wongi me polo, larem ma bikonyogi i kare me kwogi ducu. Me aryo, lutino ginongo pwony ki i lanen pa lunyodogi i kom kit ma laco ki dako myero gunote me cobo yub ma pigi tego. (Jo Kolocai 3:18-20) Kadi bed jo mukene gitwero konyo wego ki mego, lunyodo aye gitye ki tic me pwonyo lutinogi ki lok i kom Lubanga ki bene kit ma Lubanga mito ni kwo me ot obed kwede.

Ento lunyodo myero gupwony lutinogi nining? Yo me pwony mene ma nen calo twero tic maber?