Ento jo mapol gitye ki akalakala ka ce gitwero bedo ki anyim ma gimito. Pekki calo two Korona ma otimme atura obalo kwo pa dano adada, onyayo can lim, dok bene orwenyo kwo pa jo mapol. Macalo adwogine, gitye ki par ni anyimgi pe bibedo maber.

Kit macalo kwo pe genne-ni, dano gitye ka yenyo gin mo ma bitirogi wek gibed ki anyim maber. Jo mogo gigeno teko ma pe nen calo teko pa lakalatwe nyo gum kom. Jo mapol giketo komgi i kwan i rwom ma lamal nyo yenyo lonyo, kun gitamo ni jami magi biweko ginongo jami ma gimito. Jo mukene gitamo ni bedo ngat maber aye gin ma mitte wek gibed ki kwo maber.

Tika gin mo keken i kin jami magi twero weko ibedo ki anyim ma imito-ni? Me nongo lagamme, mitte ni itam i kom lapeny magi:

• Gin ango ma moko anyimmi?

• Tika kwan i rwom ma lamal nyo cente weko ibedo ki anyim maber?

• Tika bedo dano maber biweko ibedo ki anyim maber?

• Gin ango ma twero konyowa me bedo ki anyim maber?

Pwony ma i Wi Lubele man twero konyi me nongo lagam pi lapeny magi.