1, 2. Jo mapol gineno ticgi nining?

JO MAPOL gitamo ni tic ma gitiyo aye pol kare nyuto ka pigi tek nyo pe. I tekwaro mukene, ka dano gimito ngeyo ngat moni, pol kare gicako ki penyo lapeny calo: “Tic ango ma itimo?”

² Baibul bene i kine mukene loko i kom jo mogo kun tito tic ma gutimo. Me labolle, wacci “Matayo lajog-mucoro,” “Cimon lanyong pyen,” ki bene “Luka ma en daktar ma wamaro.” (Matayo 10:3; Tic pa Lukwena 10:6; Jo Kolocai 4:14) I kine mukene, Baibul loko i kom mot me tic ma jo mukene gubedo kwede i dul pa Jehovah. Tam kong i kom Kabaka Daudi, lanebi Elia, ki lakwena Paulo. Jo magi gutero tic ma Jehovah omiyo botgi calo mot ma pire tek adada. Wan bene, myero water tic mo keken ma watye kwede i dul pa Jehovah calo mot ma pire tek adada.

3. Pingo mitte ni jo muteggi myero gupwony jo matino? (Nen cal ma tye i pot karatac 26.)

³ Wamaro dok watero ticwa pi Jehovah calo gin ma pire  tek adada. Jo mapol gimaro ticgi adada dok nongo gimito medde ki timone tekki pud gitye ki kero. Ento ki cwercwiny, inongo ni ka dong dano gutii nongo pe giromo timo tic ma onongo gitimo con i kare ma pud gitino. (Latitlok 1:4) Man kelo ariya mo ma kite dok pat i kwo pa lutic pa Jehovah. I kare-ni tic me tito kwena tye ka medde ameda anyim, dul pa Jehovah bene gitye ka tic ki diro me tet manyen me tero kwena maber bot dano mapol. Ento i cawa mukene twero bedo tek bot jo muteggi me pwonyo diro magi manyen-ni. (Luka 5:39) Medo i kom meno, kero pa ngat moni woto ki dok piny ka woto ki tegi. (Caralok 20:29) Pi meno, tye me mar ki dok me ryeko ka jo muteggi gupwonyo jo matino wek gubed atera me jolo mot me tic mapol i dul pa Jehovah.—Kwan Jabuli 71:18.

4. Pingo tek tutwal ki jo mukene me miyo mot me ticgi bot jo mukene? (Nen bok ma wiye tye ni “Gin Mumiyo Tek me Weko Mot me Ticwa.”)

⁴ Pol kare pe yot ki jo ma gitye ki twero me miyo tic mukene bot jo ma pud gitino. Utmege mogo cwinygi twero cwer adada pien nongo gibirwenyo mot me ticgi ma gimaro adada. Cwinygi twero tur ka gutamo i kom miyo mot me tic ma gimaro timone. Nyo gitwero bedo ki par ni ka dong pe gitye ka telo wi tic meno, ci pe bitimme maber. I kare mukene gitamo ni gipe ki cawa me pwonyo jo mukene. Kitungcel bene, jo matino myero gudi cwinygi ka pe kitye ka minigi tic me atima.

5. Lapeny mene ma wabinyamo i pwony man?

⁵ Pi meno, pingo pire tek ni jo muteggi myero gukony jo matino me bedo atera me jolo mot me tic? Gitwero timo man nining? (2 Temceo 2:2) Ki dok pingo jo matino bene myero gubed ki cwiny maber dok gupwony jami mapol ka gitye ka tic kacel ki jo muteggi nyo utmege ma gitye ki ngec? Me cakone, kong wanen kit ma Kabaka Daudi opwonyo kwede ki wode pi tic mo ma pire tek adada.

6. Gin ango ma onongo Daudi mito timone? Ngo ma Jehovah owacce?

⁶ Pi mwaki mapol kibedo ka unu Daudi dok kare ducu en obedo i wi ngwec. Lacen, i kare ma en odoko kabaka, en okwo i ot mamwonya adada. Pi meno en owaco ki lanebi Natan ni: “Nen ba, an dong abedo i ot bao me cedar, ento canduk me gicikke pa Rwot pud bedo i kema.” Daudi onongo mito gero ot mamwonya adada pi Jehovah. Natan owacce ni: “Ti gin ducu ma tye i cwinyi, pien Lubanga tye kwedi.” Ento man onongo pe gin ma Jehovah mito. Jehovah owaco ki Natan ni owac bot Daudi ni: “In pe ibigerra ot me bedo.” Kadi bed Jehovah ocikke bot Daudi ni kare ducu ebibedo kwede, Daudi oniang ni wode aye bigero ot pi Lubanga. Daudi odok iye nining?—1 Tekwaro 17:1-4, 8, 11, 12; 29:1.

7. Daudi odok i lok pa Jehovah-ni nining?

⁷ Daudi onongo mito gero ot pi Jehovah ki cwinye ducu, dok twero bedo ni cwinye otur adada. Ento en pud okonyo wode Solomon me yubbe pi gero ot man. Daudi otute matek me yubo  lutic ki yenyo nyonyo, mola, ryal, jabu, ki dong bao. En pe oketo cwinye tutwal i kom ngat ma kibipwoyo pi gero ot pa Lubanga, ma lacen kicako lwongone ni ot pa Solomon. Maka meno, en ocuko cwiny Solomon kun wacce ni: “Iyo latinna, Rwot [Jehovah] obed kwedi, wek ityek gero ot pa Rwot Lubangani, kit ma yam oloko kwede i komi-ni.”—1 Tekwaro 22:11, 14-16.

8. Pingo onongo Daudi tamo ni Solomon pud peya twero gero ot pa Lubanga? Ento gin ango ma Daudi otimo?

⁸ Kwan 1 Tekwaro 22:5. Twero bedo ni meno Daudi otamo ni Solomon pud pe twero telo wi yub macalo meno. Ot pa Lubanga onongo myero “obed me deyo makato ducu,” ki dok Solomon onongo ‘tidi, dok pud peya tye ki ngec mo.’ Ento Daudi onongo ngeyo ni Jehovah bikonyo Solomon me timo tic man ma pire tek-ki. Pi meno, Daudi otimo jami ducu ma en twero me yubbe pi tic man.

9. Omege ma guteggi gitwero winyo nining ka guweko tic bot jo mukene? Mi lapor.

⁹ Utmege ma guteggi pe myero cwinygi otur ka mitte ni gujal mot me ticgi bot jo matino. Waniang ni meno gin ma pire tek i kare-ni en aye tiyo tic pa Jehovah. Pwonyo jo matino me timo tic man konyo wek ocobbe maber. Kong itam i kom lok man. I kare ma pud itidi, twero bedo ni ineno ka lanyodoni dwoyo mutokane. Ma dong iwoto ki dongo, twero bedo ni en obedo ka titi kit me dwoyone. Ka kare woto ki kato, in bene inongo license ma megi ci icako dwoyo mutoka in kikomi. Kadi bed kit meno, lanyodoni onongo pud mini tam. I kare mukene wuleyo dwoyo mutoka aleya. Ento ka dong en woto  ki teggi, in aye ma dong ibedo ka dwoyo mutoka pol kare. Tika cwiny babani owang? Pe, ngene kene ni cwinye obedo yom pien in aye ma onongo dong idwoye. I yo acel-li, omege ma guteggi cwinygi bedo yom ka gineno omege matino ma gipwonyo ka timo tic i dul pa Jehovah.

10. Cwiny ango ma Moses onongo tye kwede i kom deyo ki twero ma kimine?

¹⁰ Myero wagwokke kun pe waweko nyeko makowa ka jo mukene gunongo mot me tic. Wanongo pwony ki i kom gin ma Moses otimo i kare ma Luicrael mukene gucako lok calo lunebi. (Kwan Wel 11:24-29.) Yocwa onongo mito jukogi woko, ento Moses owaco ni: “In nyeko omaki pira ce? Kono jo pa Rwot [Jehovah] ducu gubedo lunebi, kono ber mada, wek Rwot oony cwiny mere i komgi!” Moses onongo ngeyo ni Jehovah tye ka doro ticce. Ma ka yenyo yweka pire kene, Moses onongo mito ni lutic pa Jehovah ducu gubed ki tic me atima. Wan kono? Tika cwinywa bedo yom ka jo mukene gunongo mot me tic i dul pa Jehovah?

11. Gin ango ma omego acel owaco madok i kom miyo mot me tic bot jo mukene?

¹¹ Tye utmege mapol ma gutiyo matek pi kare malac i dul pa Jehovah dok gupwonyo jo matino me jolo mot me tic ma kiminigi. Me labolle, kong wanen labol pa omego mo ma nyinge Peter. Pi mwaki 74 ma en obedo ka tic pi kare malac, en otiyo i jang gang kal ma tye Europe pi mwaki 35. Pi mwaki mapol, en aye ma obedo ngat ma loyo wi dipatmen ma doro tic me tito kwena. Ci lacen kiweko Paul aye ma ocako loyo wi dipatmen man, ngat matidi ma Peter aye opwonyo. Tika cwiny Peter ocwer? Pe. En owaco ni: “Cwinya yom adada me neno omege ma kipwonyogi ka giye mot me tic ma kiminigi dok gitye ka tute matek me cobo ticgi.”

12. Gin ango ma wapwonyo ki i labol pa Rekoboam?

¹² I kare ma Rekoboam wod pa Solomon odoko kabaka, en openyo tam ki bot jo muteggi madok i kom kit ma myero eti kwede ki ticce i yo maber. Ento lacen en dok okwero lubo tamgi! Ma ka meno, en olubo tam pa jo me yalwakke ma odongo kwedgi. Adwogine obedo marac adada. (2 Tekwaro 10: 6-11, 19) Gin ango ma wapwonyo ki iye? Ber me penyo pi tam ki bot jo muteggi ma yamo okuto wigi. Jo matino myero pe gubed i lyeto me timo jami kit ma onongo kitimo kwede con. Ento kadi bed kit meno, myero guwor tam pa jo ma yamo okuto wigi dok pe myero gungwette me tamo ni kit ma gitimo kwede ki jami dok ber loyo.

13. Jo matino gitwero tic kacel ki jo ma yamo okuto wigi nining?

¹³ I cawa mukene, kimiyo ni jo matino aye gulo wi tic ma jo muteggi dok ma yamo okuto wigi gitimo. Bedo me ryeko ka gunongo pwony ki bot omege ma yamo okuto wigi-ni. I labol ma waloko iye malo-ni, i ngeye ma Paul oleyo ka wang Peter macalo ngat ma loyo wi dipatmen mo ma i Betel, en owaco ni, “akwanyo kare me penyo tam pa Peter, dok bene acuko cwiny jo mukene i dipatmen me timo kit meno bene.”

14. Gin ango ma wapwonyo ki i kit ma Temceo gin ki Paulo gubedo ka tic kwede kacel?

¹⁴ Kadi bed Temceo onongo tidi loyo Paulo, ento gutiyo kacel pi mwaki mapol. (Kwan Jo Pilipi 2:20-22.) Lakwena Paulo owaco bot jo Korint ni: “Man en gin mumiyo acwalo Temceo botwu. Temceo aye latinna ma amaro i Rwot, dok genne. En bipoyo wiwu i yo ma atye ka lubone i Kricito Yecu, ma apwonyo ki jo ducu muye Kricito i kabedo ducu.” (1 Jo Korint 4:17) Ki i lok man, waneno ni Paulo gutiyo kacel ki Temceo maber adada dok ngat man onongo teno kor lawote. Paulo okwanyo kare me pwonyo Temceo ‘i yo ma en onongo tye ka lubone i Kricito Yecu,’ dok Temceo onongo pwonye maber adada. Paulo onongo maro Temceo adada dok onongo ngeyo ni en bigwoko utmege ma i Korint maber adada. Luelda gitwero lubo lanen pa lakwena Paulo ka gitye ka pwonyo jo mukene i kacokke.

15. Jo Roma 12:3-5 twero konyowa me ngi ki alokaloka nining?

¹⁵ Wakwo i kare ma dok pat adada. Dul pa Jehovah ma tye i lobo kany tye ka dongo i yo mapol mapatpat. Man te lokke ni jami bibedo ka lokke aloka kare ki kare. Alokaloka magi gudo wan ki acel acel dok pe bibedo yot me ngi kwede. Man bikonyowa ka wamwol me keto cwinywa i kom tito kwena maber me Ker ma ka keto cwinywa i kom gin ma wamito. Ka watimo man, wabibedo ma wanote kacel. Paulo ocoyo waraga bot Lukricitayo ma i Rome ni: “Atito botwu ni, dano acel acel myero pe opar pi ditte mukato kare.” Lacen, en dok otito ni kit macalo dul kom ducu tye ki tic mapatpat ma gitiyo i komwa, kit meno bene wan ducu ma i  kacokke watye ki tic mapatpat.—Jo Roma 12:3-5.

16. Lakricitayo acel acel twero timo gin ango wek kuc ki note obedo tye i dul pa Jehovah?

¹⁶ Lutic ducu pa Jehovah gimito tyelo kor yub me Ker-ri kun bene gitimo gin mo keken ma kiwaco ni gutim. Utmege ma yamo okuto wigi gitwero pwonyo jo matino. Jo matino gitwero jolo mot me tic ki cwiny me woro kacel ki mwolo. Ki dok omege ducu ma gunyomme gibedo ki pwoc madit ka mongi tyelo korgi ka alokaloka mo keken otimme. Mon magi gitwero lubo labol pa Pricikila ma obedo ka tic kacel ki cware Akwila ki cwinye ducu.—Tic pa Lukwena 18:2.

17. Yecu opwonyo lulub kore me timo ngo?

¹⁷ Yecu oweko labol i kit ma myero wabed atera me pwonyo jo mukene. Yecu onongo ngeyo ni jo mukene myero gumedde ki tiyo ticce. Ki lok ada, en onongo ngeyo ni lupwonnyene gitye ki roc. Ento en onongo tye ki gen i komgi ni gibitito lok me kwena maber makato kit ma etimo kwede. (Jon 14:12) En opwonyogi maber adada, dok man oweko gin gutito kwena i lobe ducu ma gucito iye.—Jo Kolocai 1:23.

18. Tic ango ma wabibedo kwede i anyim? Gin ango ma watwero timone kombeddi-ni?

¹⁸ I nge to pa Yecu, Jehovah ocere ci omine tic mapol mukene me atima kacel ki twero ma malo “loyo kit loc ducu ma tye i polo, ki nying mo ma oywek i lobo.” (Jo Epeco 1:19-21) Ka wagwoko genewa nio wa i to ma peya Armagedon oo, pud wabikwo doki kun bene wabibedo ki tic mapol me atima i lobo manyen. Kombeddi-ni watye ki tic me tito kwena maber ki loko dano me doko lupwonnye. Kadi bed ni pud watino nyo dong wateggi, wan ducu pud watwero medde ki tiyo tic mapol i “tic pa Rwot nino ducu.”—1 Jo Korint 15:58.