Ododo 102

Yecu Tye Makwo

IN INGEYO anga ma dako-ni kacel ki co aryo-ni gubedo? Dako-ni Maliam Magdala, larem Yecu. Dok co ma guruko bongngi matar-ri gin lumalaika. Kicika man matidi ma Maliam tye ka neno iye-ni aye ka ma kiketo iye kom Yecu i nge tone. Kilwongo ni lyel. Ento kombeddi kome dong pe! Anga mukwanyo? Wanenu kong.

I nge to pa Yecu, lulam dog guwaco bot Pilato ni: ‘Ma Yecu onongo pud tye kwo en owaco ni kibicere woko i nge nino adek. Pi meno mi cik wek gigwok lyelle. Ci lupwonnyene pe bitwero kwalo kome ka dok giwaco ni kicere woko ki i to!’ Pilato owaco bot lulam dog ni gucwal lumony wek gugwok lyel-li.

Ento odiko con i nino me adek-ke i nge to pa Yecu, lamalaika pa Jehovah mo obino atura. En oloro kidi woko ki dog lyel. Lworo omako lumony-nyi tutwal ma pe giromo wot. Motmot, ka guneno i lyel, kome dong pe! Lumony-nyi mogo gucito i boma ci gutito bot lulam dog. In ingeyo gin ma lulam dog magi maraco-ni gutimo? Guwilo lumony me loko goba. Lulam dog magi guwaco bot lumony-nyi ni: ‘Wuwac ni lupwonnyene gubino i dyewor, ma wan wanino, ci gukwalo kome woko.’

Ma man tye ka timme, mon mogo ma lurem Yecu gucito ka limo lyel. Gin guuro mada me nongo iye nono! Cutcut lumalaika ma guruko bongo matar gunen woko atura. Gupenyo ni: ‘Pingo wuyenyo Yecu kany? Kicere woko. Citu oyotoyot wucitit bot lupwonnyene.’ Mon-ni pud dong guringo oyotoyot ya! Ento ki i yo laco mo ojukogi. In ingeyo anga ma ngat-ti obedo? Obedo Yecu! En owaco ni: ‘Wucit wucitit bot lupwonnyena.’

I kare ma mon-ni guwaco bot lupwonnye ni Yecu tye makwo ki dok ni gin ginene, lupwonnye gunongo ni tek tutwal me ye. Petero gin ki Jon guringo wa i lyel me nenone ki komgi, ento lyel iye tye nono! Ka Petero gin ki Jon gua woko, Maliam Magdala odong cen. Man aye kare ma en ongiyo iye ci oneno lumalaika aryo-ni.

In ingeyo ka ma kom Yecu odok iye? Lubanga omiyo orweny woko. Lubanga pe ocero Yecu ki kom me lobo ma en oto kwede-ni. En omiyo bot Yecu kom manyen me cwiny, kit ma lumalaika gitye kwede i polo-ni. Ento me nyuto bot lupwonnyene ni en etye makwo, Yecu twero tic ki kom mo ma dano gitwero neno, kit ma wabikwano kwede.

Matayo 27:62-66; 28:1-15; Luka 24:1-12; Jon 20:1-12.