Cit atir i jami ma tye

Cit atir ka ma nyuto lok ma tye iye

 LOK MA I POK NGEYE | YECU LAROWA—KI I GIN ANGO?

To pa Yecu Kacel ki Cerre—Keli Adwogi Maber

To pa Yecu Kacel ki Cerre—Keli Adwogi Maber

“Ye Rwot Yecu, ci ibilarre.”Tic pa Lukwena 16:31.

Lok meno ma wic pe biwil iye-ni lakwena Paulo gin ki Cira aye guwaco bot askari mo ma gwoko mabuc i Pilipi, boma madit me Makedonia. Lok meno ma Paulo gin ki Cira guwaco-ni te lokke ngo? Wek waniang kit ma bedo ki niye i kom Yecu kubbe kwede ki laro dano ki i to, omyero kong waniang gin mumiyo wato. Nen kong gin ma Baibul pwonyo.

Dano pe kicweyogi ni myero guto

“Rwot Lubanga otero dano, oketo i poto Eden wek opur, dok ogwok bene. Ci Rwot Lubanga ociko dano ni, ‘Yadi ducu ma tye i poto, camgi macalo imito; ento yat me ngeyo gin maber ki marac pe icam, pien i nino ma ibicamo iye, en aye ibito iye bene.’”Acakki 2:15-17.

Lubanga ocweyo Adam ci okete i poto me Eden ma opong ki lee kacel ki yadi mabeco adada. Yadi ma Adam romo camo nyiggi onongo gipol ata. Lubanga Jehovah owacci Adam pe myero ocam nyig yat mo acel dok ocikke ni ka ce ocamo ci en bito.

Tika Adam oniang cik meno ma kimiye-ni? En onongo ngeyo gin ma to obedo pien oneno ka lee gito. Ka onongo Adam kicweyo ni myero okwo ci oto i nge kare mo, ci lok ma Lubanga ocikke kwede ni nongo konye pe. Ma ka meno, Adam onongo ngeyo ni ka elubo cik pa Lubanga kun pe ecamo nyig yat meno, ci ebikwo pi naka labongo to.

Jo mukene gitamo ni yat meno cung pi tim me buto, ento meno obedo lok goba ma tere otuc. Ki lok ada, Jehovah onongo mito ni Adam gin ki dakone, Kawa, ‘gunywal, gunya’ ki dong ‘gupong lobo dok gulo bene.’ (Acakki 1:28) Kigeng ma Jehovah omiyo onongo tye pi yat kikome. Jehovah olwongo ni “yat me ngeyo gin maber ki marac” pien cung pi twerone me moko gin maber nyo gin marac pi dano. Ka Adam onongo pe ocam nyig yat-ti, en onongo binyuto ni ebedo lawiny dok etye ki pwoc pi Ngat ma ocweye ki dok omiye mot mapol.

Adam oto pien pe owinyo lok pa Lubanga

“Ki bot Adam [Lubanga] owacce ni, ‘Pien in . . . icamo nyig yat ma aciki iye ni, . . . ibicamo kwon ki kwok ma cwer ki i tur nyimi, nio ka ibidok i ngom, kit ma con gikwanyi ki iye; in apwa, dok bene ibidok i apwa.’”Acakki 3:17, 19.

 Adam ocamo nyig yat ma onongo kigenge ni pe ocam. Kwero bedo lawiny pa Adam-mi pe omyero kiter calo gin me tuko. Jemo man onongo nyuto cac pi jami mabeco ma Jehovah otimo bote. I kare ma Adam ocamo nyig yat-ti, en okwero Jehovah kun yero me lone keken ma man okele adwogi marac adada.

Adam oto kit ma onongo Jehovah owaco kwede. Lubanga onongo ocweyo Adam “ki i apwa me ngom” dok en onongo owacce ni ‘bidok i ngom.’ Adam dok pe okwo i yo mo mukene nyo i kabedo mapat. I nge to, Adam odok i apwa ka ma onongo kikwanye ki iye.Acakki 2:7; Latitlok 9:5, 10.

Wato pien wan lutino pa Adam

“Bal yam obino i lobo kun wok ki i dano acel, ka dong to obino pi bal, kit meno bene to onya oromo kin dano ducu, pien dano ducu gubalo.”Jo Roma 5:12.

Bal pa Adam-mi okelo adwogi marac adada. Bal ma Adam otimo-ni omiyo en pe orwenyo kwo me mwaka 70 nyo 80 keken, ento orwenyo gen me kwo pi naka. Medo i kom meno, en orwenyo kwo ma pe ki roc dok onywalo lutino ma gitye ki roc.

Wan ducu wabedo litino pa Adam. Pien en aye onywalowa, man oweko pe waromo timo gin mo mapat ki lako kom me roc ma weko watimo bal ki dok wato. Paulo oloko i kom peko ma watye iye. En ocoyo ni: “An dano me kom ma gicato woko macalo opii i te bal . . . An ma koma kec kuman-ni, anga ma bilara ki i kom man ma to woko-ni?” Paulo ogamo lapeny ma en openyo ni kuman: “Apwoyo Lubanga pi Yecu Kricito Rwotwa!”Jo Roma 7:14, 24, 25.

Yecu omiyo kwone wek wakwo pi naka

“Lubanga Won ocwalo Wode me bedo Lalar me lobo.”1 Jon 4:14.

 Lubanga Jehovah oketo yub me jwayo adwogi marac ma bal okelo ki dok me gonyowa ki i to pi naka. En otimo meno nining? En ocwalo Wode ma en maro ki i polo wek kinywale labongo roc calo Adam. Ento, ka iporo en ki Adam, “bal mo pe ma en [Yecu] otimo.” (1 Petero 2:22) Pien en onongo pe ki roc, man weko en pe i te twec me to dok en onongo romo kwo pi naka macalo dano ma pe ki roc.

Ma ka meno, Jehovah oye ni lumone pa Yecu guneke woko. I nge nino adek, Jehovah ocere me kwo macalo dano i yo me cwiny wek en obedo ki kare me dok i polo. Ki kunnu, Yecu otero bot Lubanga wel me kwone ma pe ki roc-ci wek edwok gin ma Adam orwenyo pire ki pi likwayone. Jehovah ojolo gityer meno dok man oweko twere pi jo ma giketo niyegi i kom Yecu me nongo kwo ma pe tum.Jo Roma 3:23, 24; 1 Jon 2:2.

Pi meno, Yecu owilo gin ma Adam orwenyo. En oto piwa wek wabed kwo pi naka. Baibul waco ni: ‘Yecu ociro arem me to wek pi kica pa Lubanga ebil to pi jo ducu.’Jo Ibru 2:9.

Mic man miyo waniang anga ma Jehovah obedo. Rwomme me ngolo kop atir oweko pe twere pi dano ma gitye ki roc me kokke kekengi. Ento, marre kacel ki kicane oweko en ocobo gin ma en onongo mito timone i wel madit—en ocwalo Wode kikome wek okokwa.Jo Roma 5:6-8.

Kicero Yecu dok kibicero jo mukene bene

“Kricito dong gicero woko ki i kin jo muto, en tye macalo wi mwaka pa jo muto. Pien dano aye mukelo to, dok bene cer pa jo muto dano mukelo. Pien macalo dano ducu to i Adam, en i kit yo acel-lu jo ducu gibimiyogi kwo i Kricito.”1 Jo Korint 15:20-22.

Wape ki akalakala mo keken ni Yecu okwo dok oto, ento gin ango ma nyuto ni en ocer? I kin jami ma pigi tego ma omoko ni en ocer aye ni Yecu onen bot dano mapol i nino kacel ki kabedo mapat pat. I nino mo acel, en onen bot utmege makato 500 kulu. Lakwena Paulo otito lok meno i waragane ma ocoyo bot jo Korint, dok owaco ni pol lucaden mogo i kin jo-nu pud gitye kwo, ma te lokke ni pud giromo miyo caden i kom gin ma guneno dok guwinyo.1 Jo Korint 15:3-8.

Ma dong pire tek loyo aye ni i kare ma Paulo ocoyo ni Kricito tye “wi mwaka” pa jo ma kicerogi, en onongo tye ka wacci jo mukene bene kibicerogi lacen. Yecu kikome owaco ni kare bibino ma “jo ducu ma tye i lyel . . . gibikatti woko.”Jon 5:28, 29.

Wek wakwo pi naka, omyero waket niyewa i kom Yecu

“Lubanga con omaro lobo kumeno, omiyo iye Wode acel keken, wek dano ducu ma ye en owek to, ento obed ki kwo ma pe tum.” Jon 3:16.

 Buk me Acakki loko i kom kare ma to ocakke kwede ki kit ma Paradic orweny kwede. Buk me Niyabo loko i kom kare ma gibityeko to woko ki kit ma Jehovah bidwoko kwede Paradic i lobo kany. I kare meno, dano gibikwo pi naka ki yomcwiny. Niyabo 21:4 waco ni: “To bene dong bibedo pe.” Me moko ni cikke man pe bipoto nono, tyeng 5 waco ni: “Lok magi lok ma genne dok me ada.” Jehovah tye ki kero me cobo gin ducu ma en ociko.

Tika iye ni “lok magi lok ma genne dok me ada”? Ci dong, pwony jami mapol madok i kom Yecu dok iket niyeni i kome. Ka itimo meno, ci ibinongo cwak pa Jehovah. Pe ibinongo motte keken i kareni ento bene ibibedo ki gen me kwo pi naka i Paradic, ka ma to bibedo pe iye matwal, “kadi kumo nyo koko, nyo arem.”