Ихадоу аматериалқәа рахь аиасра

Иацу амениу ахь аиасра

Иегова Ишаҳаҭцәа

аԥсуа

Изакәызеи аӡӡаахра?

Изакәызеи аӡӡаахра?

Абиблиа иану

Аӡӡаахра — ари аӡы ухыҵәартә уанӡааршьуа ауп *. Убри азы Иисус аӡиас аҿы аӡы иҽӡааихит (Матфеи 3:13, 16). Иара убас, Ефиопиа аҭыԥ ду аанызкылоз хаҵак амҩала дышнеиуаз аӡхықә данхықәгыла, аӡы дӡаархырц а́ҳәара ҟаиҵеит (Аусқәа 8:36—40).

Аӡӡаахра аҵакы

Абиблиаҿы аӡӡаахра аԥсыжра иаҿырԥшуп (Римаа рахь 6:4; Кәаласаа рахь 2:12). Aӡӡаахра иаанарԥшуеит ауаҩы уаанӡатәи иԥсҭазааразы дшыԥсуа, насгьы Анцәа зҽизызкхьоу Христос иҵаҩы иаҳасабала аԥсҭазаара ҿыц дшалаго. Аӡӡаахреи уи аԥхьа иҟаҵатәу ашьаҿақәеи Иисус Христос иԥсхҭынҵара агәра зго ауаа зегьы ицқьоу аламыс аиура ирыцхраауеит (1 Пиотр 3:21). Убри аҟынтә Иисус ишьҭанеицәа аӡы рыҽӡаархларц дирҵон (Матфеи 28:19, 20).

Иухнахуама аӡӡаахра агәнаҳақәа?

Мап. Абиблиа иҳанаҳәоит агәнаҳа аҟынтә ҳазрыцқьо Иисус икеиҭәаз ашьа мацара шакәу (Римаа рахь 5:8, 9; 1 Иоанн 1:7). Аха Иисус иԥсхҭынҵара ауаҩы ахәарҭа изаанагарц азы иара Христос игәра игар, иԥсҭазаара иԥсахыр, еиликааз инақәыршәаны дынхалар, насгьы иҽӡааихыр ауп (Аусқәа 2:38; 3:19).

Ианума Абиблиа асабицәа аӡы иӡаахлатәуп ҳәа?

Мап, ианӡам. Абиблиаҿы асабицәа ӡаахлатәуп ҳәа ахьану џьаргьы иуԥылаӡом. Ари аҵас уахәамақәак рҿы имҩаԥыргоит. Асаби аӡы иқәырпҟҟо, мамзаргьы ихы иақәҭәо «дӡаархуеит», насгьы ахьӡ ирҭоит. Ақьырсиан иеиԥш зыҽӡаазхыр зылшо Анцәа Иаҳра иазку ажәабжь бзиа еиликаартә, насгьы идикылартә еиԥш изызҳахьоу ауаҩ иоуп (Аусқәа 8:12). Ауаҩы иҽӡааихаанӡа Анцәа Иажәа еиликаар, абиблиатә ҵарақәа гәыкала идикылар, насгьы игәнаҳақәа дрыхьхәыр ауп — ари зегьы аԥшқа изыҟамҵо шьаҿақәоуп (Аусқәа 2:22, 38, 41).

Убри адагьы, Абиблиа иаҳнарбоит аҭаацәа ақьырсиантә мҩа ианызар, Анцәа урҭ рхәыҷқәа ԥшьоуп, мамзаргьы ицқьоуп ҳәа шиԥхьаӡо (1 Коринфаа рахь 7:14). Асабицәа рӡаахра амч амазҭгьы, урҭ реиқәхара рҭаацәа рыгәрахаҵара иахьыԥшызаауамызт *.

Аӡӡаахра иазку ииашам ашьақәырӷәӷәарақәа.

Ашьақәырӷәӷәара. Ауаҩы аӡы ихыҵәартә еиԥш иӡаашьра аҭыԥан, аӡы иқәырпҟҟара, мамзаргьы ихы ақәҭәара ҟалоит.

Аҵабырг. Абиблиаҿы зыӡбахә ҳәоу аӡӡаахрақәа зегьы раан, ауаҩы аӡы ихыҵәартә еиԥш дӡааршьуан. Христос иҵаҩы Филипп Ефиопиа аҭыԥ ду аанызкылоз ауаҩы аӡы дӡааихырц азы, урҭ «аӡы иҩҭалеит». Данӡааих ашьҭахь урҭ аӡы иааҭыҵит (Аусқәа 8:36—39) *.

Ашьақәырӷәӷәара. Абиблиа ҩнаҭак иатәыз зегьы рыҽӡаархит ҳәа анаҳәо, ахәыҷқәагьы уахь иаҵанакуеит. Иаҳҳәап, ақалақь Филиппқәа рҿы иҟаз абахҭа ахьчаҩцәа реиҳабы изы иҳәоуп: «Иаргьы иҩнаҭа иеиуазгьы ауха рҽырнаҭит» (Аусқәа 16:31—34).

Аҵабырг. Аха абахҭа ахьчаҩцәа реиҳабы изку ажәабжь аҟынтә иубарҭоуп аӡы зыҽӡаазхыз «Иҳақәиҭу иажәа» шеилыркааз, насгьы Анцәа дахьхарҵаз даара ишеигәырӷьоз (Аусқәа 16:32, 34). Асабицәа Иегова иажәа рзеилкаарымызт, убри аҟынтә иаҳҳәар ҳалшоит аӡы зыҽӡаазхыз рыбжьара асабицәа ыҟамызт ҳәа.

Ашьақәырӷәӷәара. Иисус иҳәеит Анцәа Иаҳра зтәу ахәыҷы ԥшқацәа роуп ҳәа. Уи иаанарԥшуеит асабицәа рӡаахра шаҭаху (Матфеи 19:13—15; Марк 10:13—16).

Аҵабырг. Ара Иисус дызлацәажәоз аӡӡаахра акәмызт. Иара иҳәар иҭахын Анцәа Иаҳра аҵаҟа анхара зҭаху ахәыҷқәа реиԥш — ахынраалара рыманы, насгьы Анцәа Иажәа аилкаара иазхианы — иҟазар ауп ҳәа (Матфеи 18:4; Лука 18:16, 17).

^ 3 абз. «Аӡӡаахра» ҳәа еиҭагоу абырзентә ажәа шьаҭас иамоу аҟаҵарба иаанагоит «аӡаашьра» (Шәахәаԥш Theological Dictionary of the New Testament. Атом 1. Ад. 529, насгьы Дворецкий И. Х. Древнегреческо-русский словарь. М., 1958. Атом 1. Ад. 287).

^ 10 абз. Абиблиатә енциклопедиак излаҳәо ала, Ауасиаҭ Ҿыц аҿы асабицәа рӡаахра иазкны акгьы анӡам. Уа иҵегьы иануп асабицәа рӡаахра иазку аҵас шьаҭас ишамоу ииашам агәаанагара. Уи инақәыршәаны, аӡӡаахра мыцхәы аҵакы арҭоит, избанзар уи агәнаҳақәа ухнахуеит ҳәа рыԥхьаӡоит (The International Standard Bible Encyclopedia. Атом 1. Ад. 416, 417).

^ 13 абз. «Иҿыцу акатоликтә енциклопедиа» иану астатиа «Аӡӡаахра (Абиблиаҿы)» аҟны иҳәоуп: «Иубарҭоуп раԥхьаӡатәи Ауахәамаҿы аӡӡаахра анымҩаԥыргоз, ауаҩы аӡы ихыҵәартә еиԥш дышӡааршьуаз» (The New Catholic Encyclopedia. Атом 2. Ад. 59).