GALRRACNÉ PAR BUÑ NI NOʼ NABANN XTOL GALGOITY

Ni más racné buñ ni noʼ nabann

BICAʼ GUII LÁANI LÓ

LÓ NDEʼGA, BUÑ MA BIYOPY XIDAL GALRRACNÉ PAR BUÑ NI NOʼ NABANN. Per xomod ma bibiʼno, guirá consej reʼ radzakni né ni ná la Biblia. Ndeʼ radudy diitz que xconsej la Biblia raquiinrani dada ló xtzúno. Per la Biblia diti nosi ragonésni lóono. Láaca sitnéni consej ni diti labúu radzelno stoib lagary, láani nigolú racnéni buñ ni noʼ nabann.

Raibyni lóono que buñ ni ronladxno diti cadudy ló galrrioʼob.

Ló Eclesiastés 9:5, la Biblia ná que «gueʼet diti nan xitcal» (Salmo 146:4). Por ngú, la Biblia raniʼ que galgoity nacni xomod toib bacaʼalnix (Juan 11:11).
Rasacno sacró portín napno fe que Dios ronladx lóono.

La Biblia ná: «Jehová * cabiʼ buñ ni rony xinésni né racadiagbu buñ ni ranab xcalrracnébu» (Salmo 34:15). Diti nosi raninéno Dios par guisacno sacró o par ganno xi láani gonyno. Xalagary ngú racnéni lóono par guidzakno Dios ni bisaʼ lóono, portín láabu napbu galnadip par guisialdóbu xcalnabanyno.
Raibyni lóono que sabanyno sacró ló dzú ni sietra.

La Biblia xidal buelt rasetlaa dzú ni guiás gueʼet. Por ejemplo, órni raniʼni ximod guibanyno ló Gudxlio ló dzú ni sietra, náni que Dios «saspiichbu nís ni rareʼ [bisaló buñ], né ma diti sioʼ galgoity, ma diti sioʼ galnabann, nili sioʼ galrribdxaʼ nili sioʼ galrrioʼob» (Apocalipsis 21:3, 4). ¿Ronylo pensary loni la?

Xidal buñ ni nap fe lóo Jehová, Dios ni rasetlaa la Biblia, napyibu esperanza né ngú racné layibu órni raity buñ ni ronladxyibu. Por ejemplo, toib buñgonaʼ ni laa Ann goity tzeelbu después de 65 íz ni golesnéyibu saʼyibu, láabu nábu: «La Biblia ná que buñ ni ronladxno diti cadudy ló galrrioʼob né Dios salís guirá buñ ni rasetnaladxbu. Roni pensary ló ngú órni rasetnaladxi tzeʼela, né modreʼ riabloo galrrioʼob ni rasaca».

Tina, ni bisetlano antes, ná: «Desde dzú goity Timo, ma bibiʼya ximod racné Jehová naʼ. Ma bibiʼya ximod racnébu naʼ órni cadudi ló galrrioʼob. Nandxichi que gueʼet siás né radudyni fuers naʼ gony guantary dada guidxin dzú guibiʼya Timo stoib».

Scá rasac xidalguixo buñ ni nap confianz ló la Biblia. Pal ronylo pensary que ni ná la Biblia nacni toib bacaʼal, ranabdo looy bisuidy láani par guidudylo cuent que diti nagan guirá ni ranabni né que sac cumplirni. Sadudylo cuent que nosi la Biblia racné buñ ni cadudy ló galrrioʼob xtol galgoity.