¿Pal naclo buñtzay labúu sabanylo sacró ló dzú ni sietra la?
Ma por xidal íz, xidal buñ rony pensary que pal nac buñtzay labúu sabany sacró ló dzú ni sietra. Por ejemplo, xidal buñ de Asia noʼyibu de acuerdo né ni goniʼ toib buñ famos ni góc laa Confucio, ni bibany ló íz 551 a 479 antes de xtzúno, láabu goniʼbu scareʼ: «Diti gonylo cós ni diti rioladxlo gony stipnés looy». *
NI RONY XIDAL BUÑ
Xidal buñ láaca rony pensary que pal nacyibu buñtzay sabanyibu sacró ló dzú ni sietra. Por ngú rapyibu respet buñ, nacyibu buñ ni natzaay xcalrrien, ronyibu xchiinyibu, ranyibu xfamilyibu né diti ronyibu cós mal. Linh, toib buñgonaʼ de gudx Vietnam, ná: «Guirá ór buni pensary que pal diti nascúya né diti nabana ñeeni naʼ sacró».
Tipnésyibu rony cós tzaay portín ngú ni rasuidyibu ló religión xtunyibu. Toib buñguieeu ni rabés gudx Taiwán, ni laa Hsu-Yun, ná: «Bisuidyibu naʼ que órni toib buñ raity pal gócbu buñtzay diti sadudybu ló galrrioʼob, per pal gócbu buñ mal sadudybu ló galrrioʼob por tipzó».
¿RACNÉNI LAYIBU LA?
Nanno que órni ronyno cós tzaay por stipnés rieeni más galán lóono. Per xidal buñ ni racné stipnés radudy cuent que diti rarecaani modpa goniiny layibu. Shiu Ping, toib buñgonaʼ ni rabés Hong Kong, ná: «Por mod gosacloya, naana que buñ ni racné a stipnés diti guirá ór racaʼ galnasác. Nigolú goyoʼya galrrasaʼ goona xfamila né buni xinésni, per tzeʼela bisian naʼ tobi né xiinna».
Xidal buñ ma bidudy cuent que diti por ni noʼyibu lad toib religión ma nacyibu buñtzay. Etsuko, toib buñgonaʼ de Japón, ná: «Goyoʼya lad toib religión né bisudi mbioxhlas. Diti gosaca sacró órni bibiʼya que buñ de religión xtuni diti natzaay xcalrrien, godíilyibu por chú láabu gony mandary né láaca diti biquiinyibu galán bidxiich xtuny xireligiondo».
«Nigolú goyoʼya galrrasaʼ goona xfamila né buni xinésni, per tzeʼela bisian naʼ tobi né xiinna» (SHIU PING, HONG KONG)
Tipnés buñ ni goyodieʼ ló religión diti gosacyibu sacró órni bibiʼyibu que diti noʼ pu biquiin guirá ni bunyibu. Scúpa gosac Van, toib buñgonaʼ de gudx Vietnam. Láabu nábu: «Guirá dzú bicuatzaya cuánnax, guieʼ né galrro ló bidaʼ par bienna xfamila ni ma goity né modreʼ nadudyibu galnasác naʼ ló dzú ni sietra. ¡Diti noʼ pu biquiin guirá cós ni buni...! Portín bidxin midid tzeʼela bixogoluʼ. Né láaca xiindzapa, ni casuidy lainy stoib gudxrop, goity órni nap gál íz».
Por ngú pal diti nosi raquiin gacno buñtzay par guibanyno sacró ló dzú ni sietra, ¿xí raquiin gonyno? Par ganno láani, raquiin tzoʼ ni conés lóono, ni guicapy guirá ni ranabdiitzno né ni gaiby lóono ni raquiin gonyno par labúu guibanyno sacró ló dzú ni sietra. ¿Pu labúu guidzelno ni conés lóono?
^ Párrafo. 2 Pal nainy looy ganlo más ni bisuidy Confucio, bíil párrafos 31 a 35 ni sieed ló capítulo 7 xtuny libro El hombre en busca de Dios, ni goleʼ testigos xtuny Jehová né noʼni ló www.jw.org.
