Si gu ku mbatayo

Mo gu kuti tangaratangara ariihe

ADezire Yekova

Mo sia fugo Zande

Oni du na Nyanyaki Idapase Kuti Kindo

Oni du na Nyanyaki Idapase Kuti Kindo

“Idapase nga ndikidi he, du aboro na maabangirise mbiko ho.”EB. 11:1.

1, 2. Ginihe rengbe ka sarani ani du na nyanyaki idapase nga, ga Mbori Kindo nika digiso gako ringbisapai tipa aboro, na tipagine? (Oni bi gu sura duti tonatonaha.)

WANGIA ani aDezire Yekova, ani naape gupai fu aboro dedede nga ga Mbori Kindo nga ziga kuti agu apai dunduko aboro agbiatiyo na ni, na ani naagbeberã aboro kuti agu averesi rogo Ziazia Kekeapai nafura tipa gipai re. Ani nidu a na bakere wasa mbiko gu maabangirise gu Kindo re afuhe furani. Ono tie, boro mo idi kuti gupai nzunzu nga gu Kindo re nga rengo na si nika manga gupai Mbori aida si mangihe? Ginipai nasarani ani du na nyanyaki idapase kuti gi Kindo re?Eb. 11:1.

2 Gu Kindo Nga ga Masiya nga gu mbakadapai kina Mbori nasigiraha nitiko tipa ka digiso gako ringbisapai tipa gako kusikusiahe. Mburu gu Kindo re rii guhe ka i awonga ti ni ya nga ga Yekova rengo tipa ka zoga aboro. Gu nyanyakipa apai du tipa gi Kindo re nakodapa gaha bakindo, agu aboro nika zogarago na ko, gbiati gu rago i nika zogaha. Gu mbakadapai nga ga mozunga nasigira agi apai re, na aYekova na Wiriko nga Yesu Kristo du namangihe. Pa berã ani kurii agi amozunga re nika undo rani ani kiisi gaani rugatinapai tipa wai ga Mbori ringbisapai nika da nzunzu ti rengo na ki undo rani ani  bi gupai nga he ho rengbe ka gbarasapa gi mbakadapai re te.Oni gedi AEfeso 2:12.

3. Ginipai ani nika wisigopai tipaha rogo gi kekeapai re na gu ngbefuoho?

3 Ziazia Kekeapai fura tipa agu amozunga sita nandu sa na gu Kindo Nga ga Masiya du pa zogaha ku be Kristo Yesu. Agu amozunga re nga (1) gu mozunga naadu dagba Mbori na Abarayama, (2) gu mozunga nga ga aNdiko, (3) gu mozunga naadu dagba Mbori na Davide, (4) gu mozunga naadu tipa boromotumo wa Marekisedeke, (5) gu vovo mozunga, na (6) gu mozunga nga ga Kindo. Ani wisigingo wai agi amozunga re ni basasa andu sa na gu mbakadapai nga ga Kindo na kini sa ga Mbori ringbisapai tipa kpotosende na aboro digisitihe.—Oni bi gu sanduki nga “ Gu Gene Mbori Nika Digiso Gako Ringbisapai Ngbaha.”

GU KIDOHE NAYUGO WAI GA MBORI RINGBISAPAI NIKA DIGISOTIHE

4. A wa duhe rogo Bambata Pai, gini amozunga Yekova apepaha tipa aboro?

4 Fuo Yekova mbakadi gi gaani bawene zegino re tipa aboro niraki rogoho, ko apepai biata tipa aboro nga: Gaani Mbori nika kusa boro ni kpiako, aboro asa kpotosende nabaha ni paradizo kini batika ruru agude rogoho, na ko aza aboro ka i ringa gu ngua nangia ngua ino wenepai na gbegberẽpai ya. (Bam. P. 1:26, 28; 2:16, 17) Ndupai aadunga ho tipa kurapai berewe te. Mbata fu Mbori kusi boro, amozunga ho ue si aaida aboro mangipai kutini tipa ka digiso ga Mbori ringbisapai. Ginipai tie naasa gupai nga gu kura amozunga kuru?

5, 6. (a) Wai Satana aasadi ka gbarasapa ga Mbori ringbisapai? (b) Ginipai Yekova amangihe tipa gu samungu Satana akusihe ati Edene yo?

5 Satana Bakitingbanga amangi bakere ome na ki kusi samungu tipa gbarasa ga Mbori ringbisapai. Ko amangi gipai re ni gbarasa ko pai sa dagba agu apai Mbori apehe fu aboro, gupai re aabipa gia aboro sangba Mbori. Ko aasadi gu bambata dee nangia Eva ri basa gupai Mbori apehe tipa gu ngua nangia ga ino wenepai na gbegberẽpai. (Bam. P. 3:1-5; Yugo. 12:9) Ni manga ko ho wo, ko aasovura kuti gu rengo du Mbori na ni tipa ka zoga gako kusikusiahe. Kusa, Satana aya ga Mbori amoyambu airisongo ko gbua te.Eyo. 1:9-11; 2:4, 5.

6 Ginipai ka Yekova amangihe tipa ka karagapai kuti gu soapai Satana akusihe Edene yo? Ko aima rengba ka gbarasa agi asamungu re. Ono ka gure ayugu gupai nga gu ga Mbori ringbisapai naadu tipa Adamu na Eva hiisi gi kpotosende re na awiriyo si amanganga te. Kuba gupai nga Mbori gbarasi agi asamungu re nibasa ti kina gu regbo re, ko akaragapai kuti gipai re na gu kura sangbanebi kia nga gu kidohe naadu ati Edene yo tipa ka sa agu apai dunduko ko apehe si da nirengo.Oni gedi Bambata Pai 3:15.

7. Gu kidohe naadu Edene yo nafu gini mabangirise furani tipa wo na atita ru?

7 Vurube gu kidohe Yekova amangihe Edene yo, ko asaringbanga wo na atita ru nga gu narukuba Satana Bakitingbanga gbiati agu aboro dunduko nasongoda wai ko asovura kuti ga Mbori rengo tipa ka zoga aboro. Ndikidi Mbori afu pagbia fu tita dee tipa ko gbarasi Satana. Rogo gi gene re, gu kidohe naadu ati Edene yo anyakasi gupai nga i nika gbarasa gu boro natona mburu samungu Edene yo na ki di surungba gako mangapai kusayo, na si ayugu guhe a Mbori nika mangasunge na ni tipa ka manga gipai re.

8. Ginipai rengbe ani ka pehe tipa gu dee gbiati gu tita ri si adu nga Yekova nika amangasunge nayo?

8 Da si adu nga ni nika ngia tita gu dee  re? Wa duhe nga gi tita dee re aye tipa ka fitika rii wo, du rogoyo nga ka ‘gbarasa’ Satana Bakitingbanga nga gu boro du ni toro, si aaida gu tita dee re du a ni toro. (Eb. 2:14) Sidu tie, gu dee si adu nga ri nika vunga gi gu dee re, si aida ri du a ni toro. Wa si adu nga atita wo aima nge, si aima mbu tipa ka ino gu boro nika ngia gi tita dee re tipa agarã naambeda kuti 4,000 fuo Yekova mangi gu kidohe naadu Edene yo re. Ti kina gu bangisa regbo re, Yekova amangi kura amozunga ni dunguhe naayugopa gu tita dee re na kini kido gako amoyambu nga gu tita dee re nga gu mbakadapai Mbori nika mangasunge na ni ka nyasariipa gu gbegberẽ apai Satana aye na ni kurii aboro.

GU MOZUNGA NAYUGOPA GU TITA DEE RE

9. Gini mozunga Yekova amangihe na Abarayama, na gini regbo si atona mangasunge ti ni?

9 Agarã ue kutu fuo Yekova saringbanga Satana, ko aya fu gu bakumba nangia Abarayama ko guari rogo gu kpuko naadu Ura Mesopotamia yo ka ndu ku ringara Kanana yo. (Amo. 7:2, 3) Yekova aya fuko wẽ: “Mo gúari rogo ga ringara dagba agumero na rogo ga bamo kporo, ka ndu ku rogo gu ringara mi ka yugo ho foro. Mi ki sa ro ni bakere rikaaboro, mi ki fu maku foro, ki kiisi rimoro ni bakere he, mo dú ni bafumaku. Mi ki fu maku fu agu yo nikafu maku foro, na gu ni nikatiwa ro, mi atíwa ni. Mbiko ro i ka fu maku ti ni fu angbatunga aboro zegino dunduko.” (Bam. P. 12:1-3) Gere nangia tonatona gu mozunga Mbori amangihe na Abarayama. Boro ho ini gu regbo nzunzu Yekova amangi gi mozunga re ti ni na Abarayama te. Ono tie, si atona mangasunge rogo gu garã nangia 1943 M.B.K., ho ko aguari ni Arana yo ka si gu Di nga Ferata, garãko adu nga 75.

10. (a) Wai Abarayama ayugu nyanyaki idapase kuti ga Mbori akidohe? (b) Gini futufutuapai Yekova atona ka kusaha yeye tipa tita dee?

 10 Yekova atingidi Abarayama na gi mozunga re bara dunguhe, na kini pepa kura futufutuapai tipaha. (Bam. P. 13:15-17; 17:1-8, 16) Na ho Abarayama ayugu nyanyaki idapase ni kuti ga Mbori kidohe ni ida ko ka fu wiriko ni motumo, Yekova anyakasipa gi mozunga re na ki kidoko nga si nika manga amanga. (Oni gedi Bambata Pai 22:15-18; AEbere 11:17, 18.) Fuo gi mozunga re tona mangasunge, Yekova ayugu gu nyanyakipa pai naadu tipa tita dee. Ko aya gi tita dee re nika ye rogo ngbatunga Abarayama yo, na ki nge ni bakerehe, na kingia abakindo, na ki gbarasi avurayo, na ki gbia kura dungu amaku.

Abarayama adu na nyanyaki idapase kuti ga Mbori akidohe (Oni bi genewaraga 10)

11, 12. Wai Ziazia Kekeapai ayugo gupai nga gu mozunga Mbori amangihe na Abarayama na bakere digisidigisi rogoyo ti ni, na rogoyo nga gine furani?

11 Wa vura duhe nga gu mozunga Mbori amangihe na Abarayama adigisitihe kuti atitako ho i arimi ni ku rogo Ringara Mokido, Ziazia Kekeapai nayugo gupai nga kurapai kinaho gipai re ayugoho rogo toro yo. (Gara. 4:22-25) Ga Mbori toro adu kugii Pauro ko sakirogo gipai re nga bambata papara tita Abarayama nga Kristo na ue papara tita Abarayama nga gu mbedimbedi aKristano du bangeyo nga 144,000. (Gara. 3:16, 29; Yugo. 5:9, 10; 14:1, 4) Gu dee navungu gi tita dee re nga “gu Yerusarema du ari yo” nga ga Mbori papara riigbu du na agu aboro rogoho nga atoro. (Gara. 4:26, 31) Gu mozunga Mbori amangihe na Abarayama akidohe nga, gu tita dee re, ko nika ye na amaku fu aboro.

12 Gu mozunga Mbori amangihe na Abarayama aayugo gupai nga gu Kindo nga ga ngbangbaturũ re nika daada ni rengo, na si azakigene fu Bakindo na agu aboro nika zogarago na ko i dikumbo gu Kindo re. (Eb. 6:13-18) Si adu nga gi mozunga re nika mangasunge tipa bagizo regbo wai? Bambata Pai 17:7 naya, si nga “nyenye mozunga.” Si nika mangasunge daho gu Kindo Nga ga Masiya nika gbarasa avura Mbori ni na ki fu maku kurii aboro auru kpotosende ane. (1 Kor. 15:23-26) Nirengo, agu aboro nika raka ti gu regbo re auru kpotosende nika gbia undo nyeanye kindi. Gu mozunga Mbori amangihe na Abarayama ayugo gupai nga Yekova ima diaberã tipa ka digiso gako ringbisapai tipa ruru aboro “hisi kpotosende”!Bam. P. 1:28.

GU MOZUNGA NAYUGO GUPAI NGA GU KINDO RE NIKA NYEANYE KINDI

13, 14. Ginipai gu mozunga Mbori amangihe na Davide ayugoho nibipa gu zogarago nga ga Masiya?

13 Gu kidohe Mbori amangi Edene yo gbiati gu mozunga Mbori amangihe na Abarayama nasigira nyanyakipa pai tipa ga Yekova bakere pagbia nga mburuhe rii gako ruru arugute, na kina gu bangisapai re du tipa gu Kindo Nga ga Masiya. (Tam. 89:14) Ya mo gu Kindo Nga ga Masiya nika da ni gbegberẽhe si ki idi i dihe kusayo? Gu kura mbakadapai nga ga mozunga nayugo gupai nga gipai re amanganga te.

14 Ani bingo gupai Yekova akido Bakindo Davide tipaha vurube gu mozunga Mbori amangihe na ko. (Oni gedi 2 Samuere 7:12, 16.) Yekova amangi gi mozunga re na Davide ti gu regbo ko aazogarago Yerusarema yo na ki kidoko nga Masiya nika ye rogo ngbatungako yo. (Rk. 1:30-33) Sidu, Yekova ayugu gu ngbatunga Masiya nika ye rogoho na ki pe gupai nga ko nika fu gu Kindo Nga ga Masiya fu gu tita Davide “du he ni gako.” (Yeze. 21:25-27) Vurube Yesu, Mbori “anyákasa” gu zogarago nga ga Davide nyeanye kindi.  Nirengo, tita Davide “anyé anye kindi, na gako mbatabakindo a wa du uru.” (Tam. 89:34-37) Nirengo, gu zogarago nga ga Masiya agberãnga te, na agu apai si nika mangaha nika nyeanye kindi.

GU MOZUNGA DU TIPA SUNGE ABOROMOTUMO

15-17. Nibi gu mozunga naadu tipa boromotumo wa Marekisedeke, gini kura sunge gu tita dee re ka mangaha, na tipagine?

15 Wa vura duhe nga gu mozunga Mbori amangihe na Abarayama gbiati Davide aima yugo gupai nga gu tita dee re nika ngia bakindo, sunge abakindo nisaha aarengbanga ka fu amaku fu aboro dunduko te. Tipa aboro gbia maku wenengai, si aidi i di ingapai tiyo kusayo na ki sayo i da ni papara ga Yekova ruru amoyambu du ngbangbaturũ yo na auru kpotosende ane. Tipa ka manga gipai re, si aida gi tita dee re mangisunge a ni boromotumo. Bakusiahe amangi gu kura mbakadapai tipa gipai re nga gu mozunga naadu tipa boromotumo wa Marekisedeke.

16 Yekova ayugupai vurube Bakindo Davide nga ko nika manga gu kura mozunga na Yesu du na rogoyo ue nga: ka sako ko ‘súngu ku kumbabeko’ daho ko kadu ni na pagbia kurii avurako na ki du ni ‘boromotumo nyeanye kindi wa Marekisedeke.’ (Oni gedi Atambuahe 110:1, 2, 4.) Tipagine si adu ti ni nga ko du ni ‘boromotumo wa Marekisedeke’? Mbiko dungu agarã kusayo mbata fu atita Abarayama raki rogo Ringara Mokido, Marekisedeke nangia bakindo Sarema, ko angia gu “boromotumo nga ga [gu] Mbori nga Bahe.” (Eb. 7:1-3) Kina boro Yekova nafu gu sunge re fuko ko mangihe. Ko nga gu yangara boro Ziazia Kekeapai nafura tipa ni nga ni angia bakindo na ni boromotumo. Kurigure, wa duhe nga pangbanga ho nayugo gupai nga kura boro ho nadiba ko te, ani rengbe ka ya tiko ko nga “gu boromotumo namangisunge nyeanye kindi.”

17 Yekova sia Yesu ko du ni boromotumo vurube gu mozunga ko amangihe na ko, na ko nika nye ni ‘boromotumo nyeanye kindi wa Marekisedeke.’ (Eb. 5:4-6) Gipai re nayugo gupai nga Yekova ima diaberã tipa ka mangasunge na gu Kindo Nga ga Masiya tipa si digisi gako bambata ringbisapai tipa aboro na kpotosende.

GU MOZUNGA DU TIPA GU MBAKADAPAI NGA GA KINDO

18, 19. (a) Agu amozunga ani nawisigihe tipa Kindo re, ginipai si ayugoho tipaha? (b) Gini asanahe nye koyo?

18 Ka ani ngererii agu amozunga biata ani nawisigipai tipaha re, ani nabi wai abi si andu sa na pa gu Kindo Nga ga Masiya na wai du gu Kindo re rii gu mbakadapai Yekova amangihe. Gu kidohe Mbori amangihe Edene yo nasa Yekova ko digisi gako ringbisapai tipa aboro na kpotosende vurube tita dee. Da nika ngia gu tita dee re, na gini sunge ko nika mangaha? Gu mozunga Mbori amangihe na Abarayama nafu karagapai furani kuti gipai re.

19 Gu mozunga Mbori amangihe na Davide fura tipa gu ngbatunga si adu nga bambata papara gu tita dee re nika ye rogoho, na si fu rengo fuko ko zogorago auru kpotosende tipa agu apai gu Kindo re ka mangaha nyeanye kindi. Gu mozunga naadu tipa boromotumo wa Marekisedeke nasa gu tita dee re ko mangisunge ni boromotumo. Ono tie, Yesu adu nga nisako kuti gu sunge nga ga dia ingapai kusayo ti aboro te. I mbedi gu kura aboro a na ziazia toro tipa i mangisunge ni abakindo na ni aboromotumo na ko. Wari agu aboro re ka ye ni? Ani nika sakapai tipa gipai re rogo gu kekeapai ngbefuo gere.