Si gu ku mbatayo

Si gu kuti ue abanguaha

Mo gu kuti tangaratangara ariihe

ADezire Yekova

Zande

Ngbaõbambu Sinziri  |  Tanvuo 2014

 AGU APAI NANDU NA GUPAI DU TI KPOTOHO | GA MBORI KINDO WAI RENGBEHE KA UNDO RO?

Ga Mbori Kindo—Tipagine Nyakipaha ti ni fu Yesu?

Ga Mbori Kindo—Tipagine Nyakipaha ti ni fu Yesu?

Ti regbo ga Yesu sunge tungusapai, ko afura tipa dungu apai. Ni kpiapai, ko ayugupai fu apefuoko tipa wai ka kparakpee, ka fu ngbarago fu Mbori, na ka gbia ndikidi ngbarago. (Matayo 6:5-13; Marako 12:17; Ruka 11:28) Ono gupai Yesu afura tipaha kisusi kura apai dunduko angia gupai paha aima nyaka gbe tiko nga pa ga Mbori Kindo.Ruka 6:45.

A wa ani nifura tipaha rogo gu kekeapai ye mbata fu gere, Yesu ‘anaatungusapai ki niyugu gu wene pangbanga nga ga ga Mbori ngbi,’ gere nangia gako raka. (Ruka 8:1) Ko afu tiko nyanyaki kaa ndu dungu amairo rogo ringara Yisaraere tipa ka tungusapai fu aboro tipa ga Mbori Kindo. Gako sunge tungusapai ni kekehe rogo agu abuku Wene Pangbanga du biama, na si na pa tungusa pa Kindo rogoho niima susa wa bara 100. Afugo Yesu du na paha rogoho, ono wa vura duhe wo, anga agu apai dunduko ko apehe tipa pa ga Mbori Kindo du ni kekehe te, kina betehe gbua.Yoane 21:25.

Tipagine pa ga Mbori Kindo anyaki ti ni fu Yesu ho ko adu ni auru kpotosende ane? Tipa ndupai sa, ko aima ino gupai nga Mbori ima siako ko du ni Bazogo ho. (Yesaya 9:6; Ruka 22:28-30) Yesu amaanga berãko tipa pagbia watadu taarimo fu tiko te. (Matayo 11:29; Marako 10:17, 18) Gu kura nyanyaki ndupai adu kinaho ko anaatungusapa Kindo ti ni. Gu nyanyaki ndupai ko anaatungusapa ga Mbori Kindo * ti ni adu tipa gupai si nika mangaha fu agu aboro ko gbiati Bako akpinyemu yo nangia ruru apefuoko.

GUPAI GU KINDO RE NIKA MANGAHA FU BA YESU

Yesu na bakere nyemuse tipa Bako ngbangbaturũ yo. (Asanza 8:30; Yoane 14:31) Ko na ngbarago tipa agu asino Bako du wa nyemuse, nunga, na rurupai. (Pa Fu Rugute ni Ue he 32:4; Yesaya 49:15; 1 Yoane 4:8) Nirengo, si nawira wa rago naangbanga ti Yesu ka gia agu aziree aboro naapehe tipa Bako te, wa gu nga Mbori aberãnga pa ga aboro rungo te, watadu ko naida ani rungo. Gere nga ndupai sa dagba agu nduapai naasa Yesu ko tungusi “gu wene pangbanga nga ga ngbi.” Ko aima inoho nga fuo bete aregbo gu Kindo re nika dia gbarasarimo kusayo ti rimo Bako. (Matayo 4:23; 6:9, 10) Wai du si nika manga gipai re?

Vurube Kindo, Yekova nika manga bakere ariapai nga gu nika fu undo fu aboro. “Ko awéga aume” ti bangiri agu aboro nika du ni ruruyo fuko kusayo. Ko nika dia agu apai naye na aume, na “kpio adú nga berewe te, rungo adú nga yo na akpe na ima a te.” (Yugoti 21:3, 4) Mbori nika mangasunge na Kindo tipa ka dia arungo ti aboro dunduko kusayo. *

 Ani ima ino ndu gupai Yesu adu ti ni na nyemu ka fura na aboro tipa ga Mbori Kindo. Ko aima inoho nga si nika yugopa gu ome gbiati nunga du Bako na ni. (Yakoba 5:11) Yesu aima ino gupai a nga gu Kindo re nika undo gu ruru aboro ko akpinyemuyo.

GUPAI KINDO NIKA MANGAHA FU RURU ABORO

Dungu agarã mbata fu Yesu ye ku auru kpotosende, ko araki ngbangbaturũ yo na Bako. Bako amangisunge na ko tipa ka kusa agu ahe naabaha du ariyo na gu du auru kpotosende no. (AKorosaio 1:15, 16) Dagba agu ahe re dunduko, gu Yesu ‘angi’ tipaha gbe angia aboro.Asanza 8:31.

Gu nyemuse du Yesu na ni tipa aboro adu ni yuguyuguhe rogo gako tungusapai yo. Tona kinaho ko aengehe ni, ko aima yugo na ni gbaiga nga ko aye ku auru kpotosende ka tungusa “wene pangbanga” fu agu aboro naarungo. (Ruka 4:18) Ono tie, Yesu aima mangapai kisusi kungbo fura tipa undo aboro. Dedede, ko anaayugo gako nyemuse fu aboro rogo mangaapai yo. Ni kpiapai, ho rimbasa aboro adunguratiyo ni tipa ka gia gupai ko aapehe, “nunga yo ki mangi ko, ko ki husi gayo akaza.” (Matayo 14:14) Ho gu kumba naadu na kere kaza tiko ayugu gako idapase ni nga ko naida Yesu husi ko, nyemuse afõngbadu Yesu yo ko ki mangihe. Ko ahusi ko na ki ya fuko: “Mi nakpi nyemu he, mo hú.” (Ruka 5:12, 13) Ho Yesu abi nakureako nangia Maria ni ri nikpari kawiri nangia Razaro, “nunga ki zi ko toroko yo ko ki nirungo” arungo na ko “ki nikpari ni aume.” (Yoane 11:32-36) Fuani, ko amangi iiriwopai nga ka zingisa Razaro be kpio naima kpi ki mangi arame biama.Yoane 11:38-44.

Yesu aima inoho nga gu undo ko afuhe ti gu regbo re adu gbua tipa kina bete regbo. Ko aima inoho nga agu aboro dunduko ko ahusi yo watadu ko azingisi yo, i nika woka awoka na ki kpiki berewe. Ono tie, ko aima ino gupai a nga ga Mbori Kindo nika nyasa anyasa riipa agu apai re kusayo. Si du nga ndu gupai ko aamanganga kina iiriwoapai ti ni ya; ko atungusi “gu wene pangbanga nga ga Mbori ngbi” kakaka. (Matayo 9:35) Gu iiriwoapai ko amangihe aayugo gupai ga Mbori Kindo nika mangaha barambeda rogo zegino dunduko. Mo bingo agu akidohe Ziazia Kekeapai apehe tipa gu regbo nika ngiaha re.

  •  Akaza adunga berewe te.

    “Si du bangiri airavurari azá, tu airangbianga ki ha; terengeterenge aboro agúka wa ngbiimo, mirã kisikisi ngba boro abi bia ni ngbarago.” Kurigure, “a nga boro kporo sa ayá, ‘mi nawoka’ te.”Yesaya 33:24; 35:5, 6.

  • Kpio adunga te.

    ‘Ruru aboro adía kumbo ringara, ki nye anye kindi.’Atambuahe 37:29.

    “Ko adígisa pa kpio nye anye kindi, Gbia Mbori awéga aume ti bangirise ku sa yo dunduko.”Yesaya 25:8.

  • Agu aboro nakpi akaragatiyo berewe.

    ‘Aguyo agia fugoko dunduko du rogo amurã yo, ki kuru.’Yoane 5:28, 29.

    ‘Zingabekpio’ nika manga amanga.—Amokedi 24:15.

  • Akporo adu be aboro gbiati sunge.

    “I adúdua abambu ki niraki rogo; i arũka bakakue aati yo ki niri zuzuhe. I adúa nga bambu kura aboro ki raki rogo ho te; i arũ nga he kura aboro ki ri he te . . . Gimi siasia aboro ará zezeredi tipa gbanga rago mbiko gu mangapai nga ga beyo.”Yesaya 65:21, 22.

  •  Avura adunga berewe te.

    “Ko namanga pai, vura nyasi digida kpotosende no.”Atambuahe 46:9.

    “Rikaaboro amófa nga basape kuti gu rikaaboro te, i awírika nga pa sovura berewe a te.”Yesaya 2:4.

  • Zingo riahe adunga te.

    “Sende azugasi gaha zuzu ahe; Mbori, kina gaani Mbori, naafu maku fu rani.”Atambuahe 67:6.

    “Zende ahe zúku rogo ringara kpaima; si wó ri abaagangara yo.”Atambuahe 72:16.

  • Rungo adunga berewe te.

    “Bangirise ago nga ti aboro zingo ahe kindi te.”Atambuahe 9:18.

    “Ko nabatasa irazingo ahe ho ni nakpara ni ku ari; na irarungo na gu ni adu nga mounda ti ni ya. Nunga rurungbura boro du ti ko na irazingo ahe a, ko nabanda unga airazingo ahe.”Atambuahe 72:12, 13.

Wa bi mo agi akidohe naabaha du tipa ga Mbori Kindo re, ya mo mo bingo ndu gupai pa gi Kindo re nanyaki ti ni fu Yesu? Ho ko adu ni auru kpotosende, ko adu na nyemu ka fura tipa ga Mbori Kindo fu agu aboro dunduko naadegatuyo fuko, mbiko ko aima inoho nga gu Kindo re nika digiso agu apai dunduko namanga areme.

Ya mo rago ngba tiro na pa agu akidohe du rogo Ziazia Kekeapai tipa Kindo? Kangia wo duhe, wai rengbe mo ka wirikapai ni bakerehe tipa gu Kindo re? Na ginipai rengbe mo ka mangaha tipa ka gbia undo be agu amaku nika du yo? Gu yangara kekeapai du fuo gere nafura tipa Kindo nika karagapai foro kuti agi asanahe re.

^ genewaraga 5 Gi kekeapai re nafura tipa Yesu nga ko nakpinyemu Kindo awere mbiko ko ni ungako ngbangbaturũ yo, na naatona ti gu regbo ko aga ku ngbangbaturũ yo, Kindo nga gupai nyakipaha gbe bangiriko.Ruka 24:51.